893
Ородой Холбоото Уласай Олониитын танхимай «Сообщество» гэһэн хуралдаан «Сбережение народа. Национальные проекты: потенциал Сибири и Дальнего Востока» гэһэн сэдэбээр Улаан-Үдэдэ майн 30-31-нэй үдэрнүүдтэ үнгэргэгдэхэ.
Бүхэроссиин хэмжээ ябуулгада Ородой Холбоото Уласай Зүүн зүгэй хүгжэлтын яаманай, Сибириин болон Алас Дурнын тойрогой түлөөлэгшэд, федеральна мэргэжэлтэ шүүбэришэд болон олониитын ажал ябуулагшад хабаадаха юм.
Хуралдаанай хэмжээндэ мүнөөдэр «Человеческий потенциал», «Культура», «Здоровая нация», «Территориальное развитие», «Экономика», «Университет Общественной палаты РФ», «Профилактика абортов» гэһэн сэдэбүүдээр секцинүүд эмхидхэгдэхэ. Тиихэдэ олониитын хүгжэлтын шухала шэглэлнүүдээр дүхэриг шэрэнүүд үнгэргэгдэхэ юм. Г.Ц. Цыдынжаповай нэрэмжэтэ оперо болон баледэй театрта үдэрэй 15 сагта пленарна суглаан ажалаа эхилхэ.
Үглөөдэр, майн 31-дэ, «2025 болон 2035 онууд болотор Алас Дурнын тойрогой Үндэһэтэнэй программатай» танилсалга эмхидхэгдэхэ. Ородой Холбоото Уласай Юрэнхылэгшэ Владимир Путин Зүүн зүүгэй эдэй засагай дүрбэдэхи хуралдаанда Үндэһэтэнэй программа бэлдэхэ тухай даалгаһан байна. Тиигэжэ 2018 онһоо хойшо үндэһэтэнэй түсэлнүүдые болон гүрэнэй программануудые бэелүүлхэ талаар гэр байра, гэр байрын ажахы, унаа тээбэри, элүүрые хамгаалга, соёл, спорт болон ниигэмэй бусад һалбаринуудта, эдэй засаг болон эрдэм хүгжөөхэ гэһэн зорилготой программа бэлдэгдэнэ. Алас Дурнын федеральна тойрогой хүгжэлтын Үндэһэтэнэй программада оруулһан дурадхалнуудай дүнгүүд хуралдаанда согсологдохо.
Гэхэтэй хамта майн 31-дэ «Хүдөө нютагуудые хүгжөөлгэ», «Элүүрые хамгаалгын һалбари», «Олониитын зүбшэлнүүд», «Демографи», «Ниигэмэй-эдэй засагай хүгжэлтэ» гэһэн бусадшье сэдэбүүдээр дүхэриг шэрээ, секци, форсайт-сесси болон дискуссинууд үнгэргэгдэхэ.
Хуралдаанай дүнгүүдээр дурадхалнууд согсологдожо, жэлэй һүүл багта Москва хотодо эмхидхэгдэхэ хуралдаанда оруулагдаха юм.
Ородой Холбоото Уласай Олониитын танхим 2015 онһоо хойшо бүхы можо нютагуудта бүхэроссиин хэмжээ ябуулга эмхидхэнэ гээд тэмдэглэлтэй.
Буряад Уласай Засагай газарай мэдэээслэй албанай гэрэл зураг
