​​Эрхимэй эрхимүүдтэ – онсо хүндэ

Мүнөө жэл мэргэжэлэй һуралсалаа эрхимээр дүүргэгшэдтэ улаан дипломуудынь Бүхэроссиин залуушуулай һайндэртэ Буряадай Засагай газарай байшан соо барюулагдаа.

Бүхэроссиин ба уласхоорондын урилдаанууд болон фестивальнуудай лауреадууд, һайн һуралсалһаа гадна эрдэмэй, тамирай хэмжээ ябуулгануудта эдэбхитэйгээр хабаадагшад, гүрэнэй Юрэнхылэгшын ба Засагай газарай, Буряад Уласай стипенди абагшад – хамта дээрээ 100 гаран хүн баяр ёһололдо хабаадаа. Олонхинь ниигэмэй-соёлой түсэлнүүдые зохёон эмхидхэжэ үрдинхэй юм.

Буряадай Засагай газарай Түрүүлэгшын нэгэдэхи орлогшо Игорь Зураев эрхимэй эрхимүүдые амаршалхадаа, иигэжэ тэмдэглээ:

“Оюутан хаһадаа таанад эрдэм мэдэсэ абаат, бэлиг шадабарияа хүгжөөгөөт, һанал бодолоо бэелүүлжэ һураат. Гадна олон соо эмхи журамтайгаар хүдэлхэ, шиидхэбэринүүдые абаха шадабаритай болоот. Энэтнай ехэ шухала, юундэб гэхэдэ, бидэ мүнөө шэнэ эдэй засаг байгуулнабди. Таанад бүхы һалбаринуудта урагшатай хүдэлхэт гэжэ найданаб. Бэлигтэй, ухаатай, бэрхэ залуушуул Буряад орондомнай хэрэгтэй ха юм”.

Буряадай болбосоролой ба эрдэм ухаанай сайдай орлогшо Доржи Ангархаевай тэмдэглэһээр, уластамнай жэл бүхэндэ 700 гаран оюутад улаан дипломтойгоор һургуулияа дүүргэдэг юм. Харин мүнөө жэлдэ тэдэнэй тоо аяар 1361-дэ хүрөө: дунда мэргэжэлэй эмхинүүдэй 448 түлөөлэгшэ, дээдэ һургуулинуудай 913 хүн.