​​Байгал далайн эрьедэ загаһашад һайндэрөө тэмдэглэбэ

Арюухан далай – алдарта Байгалай эрьедэ, Баргажан аймагай Хүрбэлиг һууринда, июлиин 16-ай нюрга шатама халуун үдэр хэдэн мянган зон сугларжа, Загаһашадай һайндэрые үндэр хэмжээндэ үнгэргэбэ.

Заншалта ёһоороо долоодохи найрые Буурал Байгал эсэгэ эхилбэ. Һай һанажа үршөөһэнһөө загаһашад олзотой байдаг ха юм. Хэды ехээр зорижо, хаба шадалаа гаргабашье, эсэгэ Байгалай үгөөгүй һаань, жараахайшье баригдахагүй юм гэжэ хэлсэдэг. Тиимэһээ амтатайхан загаһанай шүлэтэйхэн, хэлэеэ хазама шараһан хадаритай, шүлһэеэ гоожомо сонгоогдоһон омолитой байхаяа Буурал эсэгэ Байгалдаа хүндэ ямбаяа барина.

Тиигээд лэ эндэхи зон уран шүлэгүүдээ зэдэлүүлжэ, ирагуу дуунуудаа хангюурдажа, жороо түргэн хатарнуудаа харуулаа. Удаань эртэ урдын наадануудаар загаһашад мүрысөө. Байгалай уян нугархай хүүхэд арга шадалаа дүүрэнээр элирүүлээ.

Уланай һургуулиин номой сангые даагша Наталья Гомбоева үшөө нёдондо "Байкальская русалка” урилдаанда хабаадахаяа шиидэһэнээ мэдүүлээ. Тиигэжэ яһала бэлэдхэл гараһан юм байна:

- Зунай галдама халуун , хүжэ ногоон тала, гал улаан наран, Байгалай эршэтэй долгинууд, ялалзама хашарһатай загаһанууд – энэл даа хүнэй нэгэ жаргал, - гэжэ бахархана.

Олоной хабаадалгатайгаар губшуур татагдан гаргагдажа, баригдаһан загаһад бултанда хубаагдана. Энэ ажалда хабаадаһан багашуул үнэхөөр загаһашад болобот гэжэ магтуулхадаа, бүри урмашанад. Тэдэнэр эрэ болоходоо, Байгал далайн нюрууе эсхэжэ, Буурал баабайн хэшэгтэ хүртэжэ, гэр бүлэеэ элбэг дэлбэгээр тэжээн, Байгал шадарай дайдые хүгжөөхэл даа гэһэн бата найдал түрүүлнэ.

"Заповедное Подлеморье" гэһэн дархан газарай захиралМихаил Овдин:

- Энэ һайндэр нэн түрүүн Байгал шадарай зоной найр юм ааб даа. Тиигэбэшье айлшалһан зондо ехэ удха шанартай. Тэдэнэр Байгал шадарай зоной ажабайдалтай, үндэһэн соёлтой тон дүтөөр бодото дээрэнь танилсана ха юм, - гэжэ ойлгуулна.

Байгал далайн эрьедэ үнгэргэгдэдэг энэ найр жэлһээ жэлдэ олоной анхарал татана. Тиимэһээ холын айлшад, аяншад энэ үдэрые алдахагүй гэжэ оролдоно.

Һайндэрөөр загаһашадые болон Байгал шадарай бүхы зониие халуунаар амаршалаад, Буурал Байгалайнгаа хэшэгтэ элбэг дэлбэгээр хүртэжэ байхыень хүсэе.