Хүндэтэ шүүгшэдэй хүдэлмэри асуудалтай байгаа гү?
«Ёохорой hүни», юрэнхыдөө, hайнаар үнгэрөө гэжэ омогорхолтойгоор тэмдэглэмээр. Арад зон үндэhэн ёохороо хатараа, дуулалдаа, танилсаа, hонирхолсоо, баясаа, бахархаа.
Ёохорой дуунууд
Теэд минии hанахада, харагшадай болон мэргэжэлтэ дүрбэн шүүгшэдэй hанамжанууд таарахагүй байшоо. Монголой хатарай багшада ямаршье асуудал үгы, харин манай хатарай ба хүгжэмэй мэргэжэлтэдтэ, эрдэмтэ фольклорист шүүгшэдтэ хандаха дуран хүрэнэ. Юуб гэхэдэ, Санага нютагайхидые түнхэнэй ёохор хатарба, үгыень hэлгээд дуулаба гээ.
Хүндэтэ шүүгшэд, онсолон тэмдэглэнэб, энэ удаа гансал санагынхид ёохорой hүнидэ хабаадаа. Санага нютагай шошоологууд, хонгоодорнууд гурбан зуугаад жэлэй саана эгээл тэрэ Түнхэнэй Жэмhэг, Охор-Шэбэр нютагуудhаа хилэ харахаяа эльгээгдэжэ, Санагада hуурижаhан юм. Тэрэ үедэ Захаамин гэжэ нютаг нэрэ үшөө үгы байгаа. Сагаан хаанай зарлигаар, мүн баhа ажабайдалай шэрүүн хуулиин ёhоор hарьдаг дабан нүүжэ ябахадаа, манай элинсэгүүд дуулажа байhан ёохороо, хатаржа байhан наадаяа мартаагүй. Гурбан зуугаад жэлнүүдэй үнгэрөөшье һаа, санагаархид тэрэл түнхэнэйнгөө ёохор дуулажал, хатаржал байна ха юмбибди. Иимэ эрхэгүйбди гэжэ бидэнэр үшөө ойлгоогүй байгаалди. Хонгоодорнуудай орёо уг гарбал, түүхэ шэнжэлэгшэ эрдэмтэднай мүнөө болотор арсалдаhаар, тоосолдоhоор байдаг. Иимэ бэлэхэнээр, үндэhэн наадаарнь нэгэ уг удамтай, нэгэ гарбалтай арад зониие хоёр тээшэнь хубаажа болодог юм гэжэ тэдэнэрнай ойлгодоггүй юм гээшэ гү?
Манай нютагта “долоон hүниин наадан” гэжэ ойлгосо бии юм. Энэ хадаа долоон hүниин туршада санагаархидай ёохорлодог байhаниие гэршэлнэ. Долоон hүниие дууhан ёохорложо байхадаа, дуулахада дууhахагүй дуун гэжэ хаана байхаб? Тиимэhээ ёохорой дуунуудые манайхин доронь зохёогоод, үе сагтаа тааруулаад дууладаг байhан. Хэн, ямар эрдэмтэн манай ёохорые энэнь Түнхэнэй, энэнь Захааминай гээд, хэзээ шэнжэлээд хубаажархёо юм? Алайрай хонгоодор, мэдээжэ багша Татьяна Ефремовна Гергесовагай бүхы зохёохы шэнжэлгэнүүдээр тодорхойлогдонхой ха юм.
Эмхидхэгшэдтэ үшөө нэгэ асуудал байна. Хэмжээ ябуулга саарhан дээрэ эльгээгдэhэн байгууламжа- положениһээ ондоошогоор үнгэрбэ. Жэшээнь, хоёр түхэлэй ёохор соносхогдожо, саарhан дээрэ хоюулыень “а-капелла” дуулаха гэжэ бэшээтэй аад, шэнэ үеын ёохорто диилээшэд дуу дуулангүй, бэлэн хүгжэм доро хатараа.
Үндэһэн хубсаһан
Эгээ хүндүүлхэй асуудал гэхэдэ, буряад арадаймнай үндэhэн хубсаhан тухай. Ёохор наадандаа, Сагаалгандаа үндэhэн хубсаhаяа үмдөөгүй болбол, бидэнэр, мүнөө сагай эрхээр, хаана тэрэнээ үмдэхэ болонобибди? Арадайнгаа хубсаhа үмдэхэ, hэргээхэ, залуу үетэндөө харуулха, дамжуулха гээд лэ, хаа- яанагүй хэлэдэг, бэшэдэг, уряалдаг болонхойбди.
Эртэ урда сагhаа манай арад зон гоёлойнгоо хубсаhа үнэтэй сэнтэй торго хоргойгоор оюулха, алта мүнгэн зүүдхэл дархалуулжа, олон тоотой мал зөөриеэ хүлhэндэнь туужа үгэдэг байhан гэжэ мэдээжэ. Ёохор наадандаа олон хоног уридшалан бэлдэдэг, хубсаһаяа, шэмэг зүүдхэлээ, мори унаагаа гоёодог байhан. Харин бидэ, мүнөө үеын буряадууд, үдэрһөө үдэртэ үмдөөд ябаhан уйтан, уринхай, хахархай үмдэнүүдээрээ, иишэ тиишээ арбайшаhан hаглагар үhэнүүдээшье хуряагаагүй (басагад, эхэнэр зон тухай хэлэгдэнэ), нюргандаа үргэлhэн үргэбшэтэеэ дүхэригтэ гараад ябанабди. Мүрысөөнэй харалган дээрэ иимээр гараад байhан бүлгэмүүд байгаа. Мүрысөөнэй бэшэ, hүүлдэнь болодог харагшадтаяа, дуратайшуултаяа хатардаг дүхэригтэ иимэ ябадал хамаашьегүй юм ааб даа. Заха холын нютагhаа ерэhэн далаад хүнүүд холые холо гэнгүй, бүхы хубсаhа, малгай, гуталаа, үмэдхэл зүүдхэлээ машинанууд соогуураа үлгөөд, өөhэдөө арай гэжэ эндэ тэндэнь хабшуулдаад ерээбди. Мүн хотодо байhан нютагаархидтаа үндэhэн хубсаhaяа абаашаабди, бултадаа арадайнгаа хубсаhатай байха гэжэ оролдообди гээ hэн.
Буряад арадаймнай эрдэни зэндэмэни
Ёохор наадамнай манай буряад арадай эрдэни зэндэмэни гээшэ. Ёохорнай ганса эмхидхэгшэдэй, шүүгшэдэй, мэргэжэлтэдэй бэшэ, арад зоноймнай үндэhэн түүхэ, уг гарбалаймнай домогууд, шуhан соохи амин hүлдэмнай гээшэ! Тиимэhээ, буряад арад түмэн, Ёохор наадаяа хүндэлэел, үнэхөөр үшөө дээшэнь үргэел!
Санжай-Ханда ДАРМАЕВА
Анна ОГОРОДНИГОЙ гэрэл зураг