​Буряад Уласай Кабанск аймагта ерэхэ гурбан жэлдэ шубуунай фабрика ашаглалда тушаагдахань

Кабанскын Селенгинск һууринда ерэхэ гурбан жэлдэ шубуунай фабрика баригдажа, ашаглалда тушаагдахань. Жэл бүри тэндэ 30 мянган тонно мяхан үйлэдбэрилэгдэхөөр хараалагдана.

Ород гүрэнэй моно-хотонуудай тоодо Селенгинск һуурин оруулагданхай. Тэндэхи саарһа болон картон үйлэдбэрилдэг комбинат ажаһуугшадые са­лингаар хангажа шадахаяа бо­линхой. Тиимэһээ эндэ ямар бэ даа нэгэ үйлэдбэри нээхэ тухай асуудал нэгэнтэ бэшэ Буряад Уласай Засагай газар бодхоодог байгаа.

Июнь һарада Ород гүрэнэй премьер-министр Дмитрий Медведев Буряад Уласта “Бу­рятия” гэжэ нэрэтэй урид­шалан хүгжэлтын дэбисхэр байгуулха тухай зарлиг доро гараа табяа. Тиигэһэнэйнь ашаар шубуунай фабрика бариха эмхи олдоо. Юундэб гэхэдэ, иимэ дэбисхэргүй можо хизаарнуудта мүнгэ алтаяа хэншье дамжуулхаяа һананагүй бшуу.

«Ноябрьскпродсервис» гэһэн бүлгэм 2019-2021 онуудта шубуунай фабрика барилгада 4,8 миллиард түхэриг мүнгэ гаргашалаа. Бодхоогдоһон ажа­хыда 770 хүн хүдэлхэ аргатай болохоор хүлеэгдэнэ.

Шубуунай фабрика өөрын талханай таһагтай байха юм. Гадна үүсэлэлгын, консервын таһагууд байгуулагдаха. Тусхай таһагтань үсхэбэрилгын шубууд тэжээгдэхэ.

Буряадай Толгой­логшо Алексей Цыде­новэй хэлэһээр, шубу­унай фабрика манай эндэ тон хэрэгтэй. Юундэб гэхэдэ, Буря­ад Уласай ажахынууд ажаһуугшадаа шубуу­най мяхаар 2018 ондо оройдоол 60 процен­тээр хангаһан байна.

Һүүлэй мэдээсэлээр, бүхы дээрэ Буряадай арад зон 14-15 мянган тонно мяха жэлэй хугасаада хэрэглэнэ. Харин тус фабрика 30 мянган тонно үйлэдбэрилхэ аргатай байха. Үлэһэн мяхаяа Эрхүү можодо, Үбэр Байгалай хизаарта, Мон­голдо, Хитадта наймаалха юм.