«Зүб, зүб! Хүдөөдэ ажал хэжэ байһан зониие урмашуулха, нэрэ хүндыень үргэхэ хэрэгтэй. Мүнөө мал хараха, таряа ургуулхаһаа эхилээд, юрэнхыдөө, хүдөө ажахыда хүдэлхэ хүсэлтэй зон тон үсөөн гэжэ өөһэдөө мэдэжэ байгаа аабзат. «Малшадые бэдэрнэб. Һайн салин түлэхэб» гэһэн соносхолнууд сониндошье хэблэгдэнэ, телевизорээршье байд гээд лэ гарана ха юм. Теэд хонишон гү, үхэршэн гү боложо, хүдөө амидарха «зүрхэтэй» хүнүүдые үдэр дунда гал носоогоод бэдэрээшье һаа, олохонь хэсүү болонхой. Би өөрөө Загарай аймагта бууса түхеэржэ түбхинэнхэйб. Мяханай үүлтэрэй казах малаан, һүнэй – симментал үхэр, мүн эдельбай хони үдхэдэгби. Ажахымнай бага бэшэ, яһала томошье гэхээр. Тиимэһээ хони адуулалсаха, үнеэ һаалсаха мэтын ехэ-бага ажалда хүниие хүлһэлжэ хүдэлгэхэ гэхэдэшни – олдоод орхихогүйнь хабатайл даа. Мүнгэ түлэхын хажуугаар, үшөө эдеэ ундаар хангаа аабзаш, заримдаа хубсаһа хунарыньшье абажа үгэхэш. Тиигэбэшье хүдөөдэ хүдэлхэ хүсэлтэй хүнүүд үгы», - гээд, фермер Булат Цыденович Цыренжапов Буряад оронойнгоо малшадай ажабайдал тухай сониндоо бэшэхэ гэһэн хүсэлыемнай абаһаар лэ дэмжэбэ.
Буряад ёһо заншалаа сахидаг Булат Цыренжапов
Цыренжаповтанай ажахын эхин 2011 ондо табигдаһан юм. Түрүүшээр үмсэдөө хэдэн толгой мал үдхэжэ, өөһэдөө эдихэ мяха шүлэ, тоһо зөөхэйтэй байха гэһэн лэ зорилготой һэн. Теэд эхилһэнһээ хойшо ажал хэрэгынь урагшатай, үхэр малынь үдэсэтэй байжа, удангүй ажахыгаа үргэдхэхэ бодол түрэдэг болобо. Тиигэжэ Загарай аймагай Хуушан Хүрбэ, Первомаевка һууринуудай дэбисхэр дээрэ 3 мянга 500 гектар газар хүлһэлжэ абаа. Мүнөө дээрээ имагтал малаа олошоруулха талаар ажал ябуулна. Бэеэр томо, мяхалиг үхэрнүүдые, хонидые тэжээхэһээ гадна, һүнэй үүлтэрэй үнеэдые үдхэдэг юм.
- Эндэмнай шулуугаар баригдаһан малай байра байгаа. Тэрэниие һэргээжэ, хүсэндэнь оруулаад, һаали болгообди. Заһахыень заһажа, һэлгэхэ юумыень һэлгэжэ, дулаа оруулаабди, үшөө үнеэ һааха автомат абажа тодхообди. Хуул мүнгэнэй хэрэг юм аабза. Һайниинь гэхэдэ, хүдөө ажахын яаман фермернүүдтэ дэмжэлгэ үзүүлхэ зорилготой грантын урилдаа соносхоно. Бидэ 2015 ондо 7 сая түхэриг гүрэнһөө абажа, дээрэһээнь үшөө 4 сая түхэриг өөһэдһөө нэмээд, энэ ажал хээлди даа. Үшөө 50 толгой симментал үнеэдые, «МТЗ-82» түхэлэй трактор, анзаһа, хажуур, тармуур грантын мүнгөөр худалдажа абаа һэмди, - гэжэ Булат Цыденович хөөрэнэ.
Хотоһоо дутахагүй бата бэхи байдал түхеэрэнхэй
Дэлгүүртэ гараха зам нээхэ
Мүнөө Цыренжаповтан түхэреэн жэлэй туршада адагынь гушаад үнеэ һаана. Һүеэ буйлуулжа, тоһо, зөөхэй, творог гаргаад, наймаанда табина. Элдэб химиин бодосгүй, холисогүй хоол, хүнэһэн хадань хүнүүд тэрэнииень буляалдаха тооной абажархидаг юм. Харин юрэнхы дээрээ өөһэдынгөө гараар үйлэдбэрилһэн эд бараагаа хэрэглэгшэдтэ хүргэхэ гээшэ хүдөөгэй малшадай урда тобойһон нэгэ ехэ бэрхэшээл болонхой. Улаан-Үдэ асаржа, дэлгүүртэ табяад, өөрөө наймаалха арга үнинэй үгы. Нэгэнһээнь үнэгүйгөөр абаһанаа хэды нугалаад, нүгөөдэдэнь «түлхижэ», хоёрой хоорондоһоо олзо олодог хүнүүд лэ хотын томо-томо дэлгүүрнүүд дээрэ ноёрхожо байдагынь мэдээжэ ха юм.
- Хото соо хүнэй олоор ябадаг газарнуудта хэдэн талмай байгуулаад, нэгэ үдэрынь Хэжэнгынхид, нүгөөдэрынь Баргажанайхид хүдэлхэ гэһэн шэнгеэр хубаарилаад, малшадта өөһэдөө мяха шүлэ, һү зөөхэйгөө наймаалха арга олгохо байгаа ха гэжэ һанадагби. Үгы һаа, аймаг бүхэн Улаан-Үдэдэ өөрын мэдэлэй багахан дэлгүүр - павильон нээг лэ. Мүнөө малшад хүдөөһөө мяхаяа шэрэжэ ерээд, Түб дэлгүүртэ, жэшээлхэдэ, 200 түхэригөөр тушаахадань, тэндэхи наймаашад тон багаарнь хэлээ һаа, 300 түхэригөөр саашань худалдана. Харин иимэ үнэгүйгөөр үгэжэрхингүй, бэеэрээ зогсоод, 250 түхэригшье болгоод худалдаа һаань, нэн түрүүн өөһэдтэнь ашагтай байхаһаа гадна, мяхыень абаһан хүнэйшье мүнгэ алмаха болоно бшуу, - гэжэ Булат Цыденовичэй хэлэхэдэ, үдэр һүнигүйл бодожо байдаг юумэниинь ха гэжэ ойлгохоор.
Малайньшье байра жэншэдгүйгөөр ажаллаатай
Урданайхияа улам нарижуулан һэргээхэ
Булат Цыденович өөрөө агроном мэргэжэлтэй юм. 1992 ондо Буряадай хүдөө ажахын дээдэ һургуули дүүргэһээр, амжалтатай һайнаар ажаллаһанайнгаа ашаар харюусалгатай тушаалнуудташье дэбжүүлэгдээ. Ородой Холбоото Уласай Хүдөө ажахын хиналтын (Россельхознадзор) Буряадтахи хэлтэсэй дарга байтараа, Эрхүү можын болон Буряад Уласай тус албануудай нэгэдүүлэгдэжэ, түбынь Эрхүү хото руу шэлжүүлэгдэхэдэнь, орлогшо дарга болоодшье, ашаг үрэтэйгөөр ажаллаһан. Теэд үмсынгөө ажахы улам хүгжөөхэ, үргэдхэхэ хэрэгэй гарахадань, гүрэнэйнгөө ажал орхихо баатай болоо һэн. Харин тэндэ хүдэлжэ олоһон дүршэлынь мүнөө тон хэрэгтэй ааб даа. Юумэнэй ушар удхые гүнзэгыгөөр ойлгохо һэн хойноо, алхам бүхэнөө шүүжэ, бодомжотойгоор, бата үндэһэтэйгөөр хүдэлмэриеэ эрхилнэ.
- Мал үдхэжэ байһан хүндэ үбһэ тэжээлэй асуудал тон шухала. Харин Буряад орондомнай хүсэһэн соо хура бороо ороод орхидоггүй, ехэнхидээл гандуушаг байхаяа һанадаг ха юм даа. Илангаяа манай байһан Загарайда үбһэ хулһан, орооһо таряан муугаар ургана. Сабшалан дээрээ һогооборишье үлөөнгүй, хуу хуряан гэһээшни, заримдаа үбэлэй тэнгээр үбһэн дууһашаха. Тиихэдэнь шэнэ ногооной гаратар, эндэ-тэндэһээ худалдажа абаха баатай болохош. Жэшээлхэдэ, урзанда 1 сая 500 мянган түхэриг гансал үбһэндэ гэжэ гаргашалаабди. Иимэ байдалда орохогүйн түлөө сабшалан, бэлшээри, таряаланаа уһалдаг болохо хэрэгтэй. Һүүлэй 3 жэл соо Буряадай мелиоводхоз, Загарай аймагай захиргаан, Хүрбын сомоной арад зонтой хамтаржа, хуушанай уһалууриин һубагуудые ажаллуулха ябуулга хэжэ байнабди, - гэжэ Булат Цыденович хөөрэхэдөө, шэнэ юумэ һанажа зобохо бэшэ, урданайхиие улам нарижуулан һэргээхэ гэһэн бодолтойгоо мэдүүлнэ.
Хоёр жэлэй саана Цыренжаповтан газараа хахалжа, таряа ургуулха гэжэ шиидээ һэн. Өөһэдөө хоёр лэ трактортай ушарһаа техникэ һайтай нэгэ ажахын даргада хандаһыень тэрэнь: «100 гектар 200 мянган түхэригөөр хахалхабди. Хажуугаарнь тоһо түлишэ даахат, мүн ажалшадыемнай эдеэлүүлхэт», - гэжэ харюу үгөө һэн ха. Иимэ ушарнуудай гарахагүй тула, Булат Цыденовичэй һанамжаар, аймаг бүхэн өөрын МТС байгуулжа, 2-3 комбайн болон бусад хэрэгтэй техникэ абаад, фермернүүдэйнгээ орооһо таряа ургуулха, хуряахадань, туһаламжа үзүүлжэ байгаа һаань, ажалынь нилээдгүй ашагтай болохо һэн.
Цыренжаповтанай 3 үхибүүд - аба эжын тулга. Зураг дээрэ - Зоригто
Гүрэнэй дэмжэлгын горитойшье һаань...
Эбэртэ бодо болон багашье малай тоо толгой дээшэлүүлхэ, һүнэй үйлэдбэриин зарим гаргаша хүсэлдүүлэн бусааха, анхан таряалан байһан газарнуудые һэргээн эдлүүрилхэ, хүрьһэнэй үтэгжүүлгэ, ургамал хорхой шумуулһаа хамгаалха бодосуудые, мүн һайн шанартай үрэһэ таряа худалдажа абаха талаар ажахы эрхилжэ эхилжэ байһан малшад, таряашадта, һүнэй фермэнүүдтэ, хүдөө ажахын хамжаануудта гүрэнһөө горитой дэмжэлгэ үзүүлэгдэнэ. Жэшээлхэдэ, Буряад Уласай хүдөө ажахын яаманай шугамаар байгша ондо 1 миллиард шахуу түхэриг тараагдана.
- 2014 ондо Евросоюзһаа эд бараанай оруулагдахаяа болиходонь, иигэжэ хүдөө ажахыгаа һэргээхэ, һүн, мяхан, таряа талхан, алим жэмэс гээд лэ, бусадшье эдеэ хоол үргэнөөр үйлэдбэрилжэ, өөһэдыгөө хангаха зорилготой ажал ябуулагдажа эхилээ һэн. Теэд гүрэнһөө һомологдоһон мүнгэн хэр зүбөөр хэрэглэгдэнэ гээшэб? Баһал ехэ асуудал. Минии бодоходо, нэн түрүүн томо-томо хамжаануудые һайнаар дэмжэхэ хэрэгтэй. Мүнөө фермернүүдтэ техникэ абажа гаргашалһан мүнгэнэйнь 50 хуби хүрэтэр бусаагдажа байһаниинь тон һайн. Харин малай тоо толгой дээшэлүүлхэ талаар ажал муушагаар хинагдана. Мүнөө улас доторнай бүридхэгдэжэ байһан хонин, үхэр, адуунай нилээд ехэхэн хубинь саарһан дээрэ тэмдэглэгдэнхэй аад, үнэн дээрээ үгы бшуу. Хүдөөгэйхиднай бэе бэеһээ хэдэн толгой худалдажа абахадаа, нэгэндээ нэмүүлээд, нүгөөдэһөө хороолгонгүйгөөр, малайнгаа тоо нилээд ехээр «дээшэлүүлжэрхинэ» ха юм, - гээд, Булат Цыренжапов хүдөө ажахы хүгжөөлгын хүндүүлхэй асуудалнуудые тобойлгожо гаргахадаа, заатагүй хэгдэхэ ёһотой хүдэлмэринүүдые нэрлэнэ. Тиигэжэ аймаг бүхэндэ таряалан, сабшалан, бэлшээри гэхэ мэтын газарнуудые бүридхэжэ гаргаха хэрэгтэй. Тус асуудал үшөө Зүблэлтэ засагай үеһөө хойшо тодорхойгоор шэнжэлэгдээдүй юм.
- Юрэнхыдөө, хүдөө ажахы эрхилхэдээ, эрдэм ухаанай үндэһэ һуури дээрэ тулгалжа, ажалаа ябуулха хэрэгтэй. Орооһо таряашье һуулгахадаа, эгээл эндэ ургаха гэжэ зорюута зохёогдоһон үрэһэ хэрэглээгүй һаа, заабол гарзада орохош. Теэд анхандаа үрэһэ үйлэдбэрилжэ, бүхы уласаа хангадаг байһан томо ажахынууднай мүнөө энэ үүргэеэ дүүргэжэ биранагүй. Гол түлэб ондоо можо нютагуудһаа асарагдаһан таряа ургуулнабди, - гээд, мэргэжэлтэ агрономой һанаа алдахань зүйтэй.
Үндэр ургаса хуряахаар түсэблэгдэнэ
Залхуурангүй хүдэлхэ хэрэгтэй!
Нёдондо Буряад Уласай Хүдөө ажахын яаманай дэргэдэ Үүлтэрэй албан байгуулагдаа һэн. Мал адуу хэмэл аргаар үрэжүүлхэ, үүлтэрыень һайжаруулха талаар ажалай ябуулагдажа эхилһэниинь һайшаалтай. Саашадаа улас доторнай үүлтэртэ мал үсхэбэрилдэг ажахынууд бии болохо ёһотой.
- Малшад нэн түрүүн ямар мал хараа һаа, үлүү ашагтайб гэжэ бодолгото болоно ха юм. Тиимэһээ тэдээндэ мэргэжэлтэ зүбшэл үгэжэ, туһаламжа үзүүлхэ гээшэ хүдөө ажахын яаманай үүргэ байха ёһотой. Бидэ, жэшээлхэдэ, түрүүшээр бүүбэй үүлтэрэй хони харадаг байгаабди. Яһала шэрхи, һайн хонид лэ даа. Зүгөөр бэеэр багашаг – мяханиинь дунда зэргэ 20 килограмм лэ татадаг. Тиихэдэнь эдельбай хони үдхөөд үзэхэ гэһыемнай, мяхаараа 30-35 килограмм болоно. Алиниинь ашагтайб? Энэ мэтын асуудалаар зүбшэлсэхэ гэхэдэшни, мэргэжэлтэй хүн олдодоггүй байгаа һэн, - гэжэ Цыренжаповтан ехэнхидээ туршалгын гуримаар лэ, заримдаа алдуу эндүүшье гаргажа байжа, ажахыгаа эрхилжэ эхилһэнээ дурдана.
Һүүлэй үедэ арад зон сэбэр, элүүр эдеэ хоол хэрэглэхэ гэжэ оролдодог болонхой. Аяар далайн саанаһаа асарагдаһан мяхан хямда аад, эдихэдэшье амтагүй, үлгүй мүртөө, аминдашье аюултай байхадаа болохо гэжэ ойлгоходоо, нютаг дээрээ үйлэдбэрилэгдэһэн хүнэһэнэй халта үнэтэйшэгшье һаань, тэрэнииел абаха гэжэ шармайна ха юмбибди. Иимэ байдалда хүдөөгэй малшадшье, таряашадшье ажахыгаа үргэдхэхэ тухай бодоно. Булат Цыренжапов үбэлдөө овощ ургуулжа наймаалха хүсэлтэй:
- Аймагуудаар теплицэнүүдые барижа, үгэрсэ, помидор ургуулха хэрэгтэй. Тиихэдээ хоротой бодос ашаглахагүй гээшэ шухала. Мүнөө харыт даа, хари гүрэнэй зон ерээд, нэгэ хэдыхэн соо эдлүүрилжэ, юумэ ургуулһан газарһаань юун үлэнэб? Элдэб муухай юумээр хүрьһыень үтэгжүүлжэ, хороор уһалжа, үндэр гэгшын ургаса хуряагаад: «Эдигты», - гээд, манай урда үнэгүйхэнөөр табяад үгэнэ ха юм. Эдэ бүгэдые ойлгожо, өөһэдөө залхуурангүй, хүдөө ажахыгаа хүгжөөхэ арга боломжо биил даа.
Булат ЦЫРЕНЖАПОВАЙ хубиин архивһаа гэрэл зурагууд