820
Сентябриин 12-һоо 18 болотор Ярославль хотодо үнгэрхэ Бүхэроссиин баледэй тэмсээнэй шэлэн абалгын шата дабаһан Буряадай гүрэнэй Оперо болон баледэй театрай бүжэгшэд Анна Петушинова, Алиса Шишкина, Валерий Видманкин, Эрдэм Сандаков гэгшэд зорихонь.
Байгша ондо тус тэмсээн “Хүгжэмэй театрта шэнэ үеын хатар” гэһэн шэглэлээр үнгэргэгдэнэ. Баледэй артистнуудай ба бүжэг найруулан табигшадай бүхэсоюзна тэмсээнүүдые үнгэргэжэ, шэнэ нэрэнүүдые тодоруулдаг урдын заншал һэргээн үргэлжэлүүлхэ зорилготой тус арга хэмжээнэй жюриин бүридэлдэ нэрэ түрэтэй хореографууд, Ородой болон дэлхэйн баледэй түрүү артистнууд, багшанар, театрай дарганар болон бүжэгэй уралигай мэдээжэ ажал ябуулагшад оролсоно. Тэдэнэй тоодо “Кремлиин балет” гэһэн театрай уран һайханай хүтэлбэрилэгшэ Андрей Петров, Мари Уласай Оперо болон баледэй театрай уран һайханай хүтэлбэрилэгшэ Константин Иванов, мүнөө үеын хореографиин театр-студиин уран һайханай хүтэлбэрилэгшэ Ирина Афонина, “Скрим” гэһэн хатарай театрай уран һайханай хүтэлбэрилэгшэ Эльвира Перова, Свердловскын хүгжэмтэ комедиин театрай балетмейстер Сергей Смирнов, дэлхэйн түрүү хореограф ба балетмейстернүүдэй нэгэн Александр Пепеляев гэгшэд бии. Жюриин түрүүлэгшэ – СССР-эй арадай зүжэгшэн Юрий Николаевич Григорович.
Тиихэдэ Буряадай гүрэнэй Оперо болон баледэй театр 80-дахи ойн баярта хаһаяа нээхэеэ бэлдэжэ байна гэжэ һануулая. Сентябриин 29-дэ болон октябриин 3,4-эй үдэрнүүдтэ “Буряад онтохонууд ба домогууд” (Бурятские сказки и легенды), “Һахюуһан” (Талисман) гэһэн баледэй түрүүшын зүжэгүүд харагшадай һонорто дурадхагдаха.
Буряад уласай соёлой яаманай мэдээсэлэй албанай гэрэл зураг
