1491
Буряад Уласта “Болбосорол” гэһэн үндэһэн түсэлэй “Хүүгэд бүхэнэй амжалта” гэһэн нютаг можын түсэлэй хэмжээндэ “Сириус” түхэлөөр бэлигтэй хүүгэдые элирүүлхэ ба дэмжэхэ талаар болбосоролой түб нээгдэхэ. 2021 ондо Улаан-Үдэдэ Байгалай аяншалгын колледждо үндэһэлэн түб байгуулагдаха юм.
“Сириус” гэһэн болбосоролой түб хадаа эрдэм ухаанай, уралигай, спортын талаар талаан бэлиг харуулһан, мүн баһа техникын зохёохы ажалда амжалта туйлаһан бэлигтэй хүүгэдые эртээнһээ элирүүлжэ, хүгжөөжэ, саашадаа залан хүтэлэлбэрилхэ зорилготой.
Болбосоролой түь түхэреэн жэлдэ ажалаа ябуулха. Хүүгэд байлга түлбэригүйгөөр тэндэ байха. Уласай бүхы аймгуудһаа 10-17 наһатай 500 хүүгэд эндэ жэл бүри ерэхэ аргатай. 2024 ондо 2000 хүүгэд эндэ хабаадуулагдаһан байхаар түсэблэгдэнэ. Физикэ-математикын, химико-биологиин һургуулинуудай, олимпиин халаанай һургуулинуудай түрүү багшанар, мүн баһа уран зурагай, уралигай ба гэрэл зурагай мэргэжэлтэд тэдэниие һургаха юм.
21-24 үдэртэ болбосоролой программын хэмжээндэ мэргэжэлэй хэшээлнүүд үгтэхэ, мүн лэ хүгжөөхэ наада, мастер-классууд, мэргэжэлтэдтэй зохёохы үдэшэнүүд, бэе махабад элүүржүүлгэ, харин һуралсалай жэлэй туршада юрэнхы болбосоролой хэшээлнүүд боложо байха гэжэ хараалагданхай.
- “Сириус” моделиин нютаг можын түб Буряад Уласай бодото омогорхол ба бренд боложо магадгүй, эндэ бэлигтэй хүүгэдэй “социальна лифтын» байгуулга боложо үгэхэ, - гэжэ Буряад Уласай болбосоролой ба эрдэм ухаанай сайд Баир Жалсанов тэмдэглээ. 2019 ондо Буряад Уласай Засагай газарай ба “Бэлиг ба амжалта” гэһэн болбосоролой жасын хоорондо хүүгэдэй ба залуушуулай оюун ухаанай-зохёохы ажалай хүсэн шадалые хүгжөөхэ, тэрэ тоодо уласта бэлигтэй хүүгэдые тодоруулха ба дэмжэхэ нютаг можын түб байгуулха талаар хамта ажаллаха тухай хэлсээн баталагдаа һэн.
“Үхибүүн бүхэнэй амжалта” гэһэн федеральна түсэлэй хэмжээндэ Буряад Уласта түб байгуулгада федеральна бюджедһээ 309 сая түхэриг тэдхэмжэ абаа һэн.
“Сириус” түб 2014 ондо Сочидо Ородой Холбоото Уласай Юрэнхылэгшэ Владимир Путинай үүсхэлээр олимпиин һуури бүтэсын бааза дээрэ “Бэлиг ба амжалта” гэһэн болбосоролой жасаар байгуулагдаа һэн.
