1130
Байгша оной октябриин 18-да Доржо Банзаровай нэрэмжэтэ ехэ һургуулида «Нүхэдэйм дүхэригтэ…» гэһэн уласай урилдаан 6-дахияа эмхидхэгдэхэ. «Түрэл Буряад дайдаяа түүрэн магтаха золтойлби...» гэһэн мүрнүүдэй автор Гунга Чимитовэй 95 жэлэй ойдо хэмжээ ябуулга зорюулагдана гэжэ Буряад Уласай соёлой яаман дуулгана.
Буряадай элитэ уран зохёолшо Гунга Чимитовэй зохёохы ажалтайнь танилсуулха, буряад уран зохёолнуудые олоной дунда дэлгэрүүлхэ, хүүгэдэй болон эдиршүүлэй, уласай ажаһуугшадай зохёохы бэлиг хүгжөөхэ, дэмжэхэ зорилготой хэмжээ ябуулга эмхидхэгдэнэ.
Урилдаанда хабаадагшад наһанай илгаагаар 3 бүлэгтэ хубаарха:
- 5-дахи - 8-дахи ангинуудай һурагшад.
- 9-дэхи – 11-дэхи ангинуудай һурагшад.
- дунда мэргэжэлэй болон ехэ һургуулинуудай оюутад.
«Уянгын шүрэ» – «Уран шүлэг», «Уран һайханай юртэмсэ», «Хурса гуурһан» болон «Уран зурааша» гэһэн дүрбэн секцидэ урилдаан үнгэргэгдэхэ. Тиихэдэ «Уянгын шүрэ» – «Уран шүлэг» гэһэн шэглэл хоёр шатада үнгэргэгдэхэ:
1. Гунгаа Чимитовэй шүлэгүүдые али баснинуудые уран гоёор уншаха;
2. «Эжы, эжы, эльгэ зүрхэнш, эгээл дүтэл намдаа...» гэһэн сэдэбтэй өөрын зохёол дурадхаха.
«Уран һайханай юртэмсэ» гэһэн секци баһа хоёр шататай:
1. «Үргэлжэлһэн зохёол». Сэдэбынь «Түрэл буряад дайдаяа түүрэн магтаха золтойлби...»;
2. «Найруулга» (Эссе) – «Буряадайм хэшэг – буурал далай...».
«Хурса гуурһан» - «Журналистика» - энэ урилдаанда 9-дэхи-11-дэхи ангинуудай һурагшад ба оюутад хабаадаха. «Нютагаймнай түрүү хүнүүд» гэһэн сэдэбээр найруулгануудаа уласай олондо мэдээсэл тараадаг хэрэгсэлнүүдтэ толилуулһан байха ёһотой.
«Уран зурааша» гэһэн секцидэ Гунга Чимитовэй зохёолнуудай удхаар зурагуудай урилдаан үнгэргэгдэхэ: зураг, графика; сахим зураг, графика гэһэн шэглэнүүдээр зурагууд байха юм.
Урилдаанда хабаадаха тухай мэдүүлгэеэ октябриин 1 болотор [email protected] хаягаар эльгээхэ, үгы һаа Улаан-Үдын Ранжуровай гудамжа, 4 (8-дахи байшанай 1 дабхар, 8123 танхим) Халхарова Лариса Цымжитовнада асархада болоно. Харилсаха утаһан 89246543772.
Эрхим бүтээлнүүд «Буряад Үнэн» сониндо хэблэгдэхэһээ гадна, тусхайта согсолбориин ном боложо гараха.
Мүрысөөн тухай дэлгэрэнгы мэдээсэл эндэ харагты.
Буряад Уласай соёлой яаманай сайтһаа гэрэл зураг абтаба
