​​Хэшэгэйнь түлөө – хүшөө

Загарай аймагта, Асагадай дасан шадар буряад арадай хэр угһаа үдхэжэ байһан табан хушуу малда хүшөө бодхоогдожо, гарагай 1-дэ нээлтынь баяр ёһолол үнгэрбэ.

Имагтал табан хушуу малайнгаа ашаг шэмэһээ хүртэжэ, мянга-мян­гаад жэл арадаа орхижо ерэһэн анха­най нүүдэлшэ буряад арад энэ хүшөө бодхооһониинь ойлгосотой.

- Иимэ юумэ хэхэ гэһэн бодол ар­баад жэл соо толгойдоо хабшуулаад ябааб. Нэгэтэ Монгол ошоходоо, уран һайханай студи ябуулдаг найзадаа энээн тухайгаа хөөрэһыемни: « Хэрэг­тэй материалнуудыень лэ абажа үгэхэ һаатнай, уран дархашуулые эндэһээ ябуулһуу. Буряад аха, дүүнэртээ ми­нии бэлэг болуужаг!» - гэжэ дэмжэһэн юм, - гээд, тус хүшөөгэй барилга үүсхэһэн Хори аймагһаа гарбалтай олзын хэрэг эрхилэгшэ Баир Долго­ров хөөрэнэ.

Тиигэжэ хүшөө бүтээлгэдэ хэ­рэгтэй материалнуудта гэжэ 1 сая түхэриг Үбэр Байгалай хизаарай Горнорудна предприяти һомолоо, дархашуулай хүлһэ – 3 сая түхэриг – Монголой тала даажа абаа гэжэ тэм­дэглэлтэй.

Хотодо дүтэхэнэ оршодог Асагад нютаг һүүлэй үедэ холо, ойрын аян­шалагшадые олоор татадаг болон­хой. Тиигэжэ буряад зоной жэнхэни байра байдал, ёһо заншал табан ху­шуу малгүйгөөр яажа танилсуулжа болохоб? Угайдхадаа Буряад орон­домнай үхэрнүүд, хонид, адуун, яма­ад яһала бии аад, тэмээд үгы шахуу бшуу. Асагад нютагһаа холо бэшэ байгуулагдаһан «Талын нүүдэлшэн» гэһэн аяншалгын согсолбориин ажа­хыда хэдэн толгой тэмээд биил ааб­за, зүгөөр һүрэг-һүрэгөөрөө бэлшэ­жэ ябадаггүйнь мэдээжэ. Тиимэһээ тус хүшөө аяншалга хүгжөөлгэдэшье нүлөөлхэнь дамжаггүй.

Табан хушуу малай хүшөөгэй бодхоогдоһон ушараар Буряад Уласай аймагуудһаа, Үбэр Байгалай хизаарһаа, Монгол, Хитад гүрэнүүдһээ сугларһан олон тоото айлшадай һонорто гоё гэгшын наадан табигдаа, мүры- сөөнүүдшье үнгэрөө.

Владимир Шираповай гэрэл зураг