Анна Огороднигой гэрэл зураг
Дээдэ Онгостойн Хамбын Хүреэ дасанда эхэ зургаан зүйл хамаг амитанда нигүүлэсхы сэдьхэлээр туһалха Арьяа-Баала бурханай ордоной барилга үргэлжэлһөөр. Энэ ехэ үйлэ хэрэгые анхан һанамжалжа түсэблэһэн, мүнөө ажалыень ударидан ябуулдаг Диваажан дуганай шэрээтэ Баир ламатай манай сурбалжалагша уулзажа хөөрэлдэбэ.
- Нэн түрүүн юундэ имагтал Арьяа-Баалада ордон бодхоохо хэрэг гараа юм гэхэдэ, тон ехэ удха шанартай юм. Бүхы Будаадын шажантан, илангаяа буряад-монголнууд бага, ехэгүй “Ум маа ни бад май хум” тарни, али маани гэдэг (мааниин зургаан үзэг) булта уншажа ябадаг гээшэ. Энэ маани Арьяа-Баала бодисадын зүрхэн тарни - эхэ зургаан зүйл хамаг амитан жаргалангаа эдлэг гэһэн маани юм, - гэжэ Баир ламбагай хөөрөөгөө эхилбэ.
Анна Огороднигой гэрэл зураг
Ордоной барилга
- Ородой Холбоото Уласай Будаадын шажантанай эгээл ехэ дасангуудай нэгэн болохо 31 метр үндэртэй, 65х42 метр үргэнтэй, 3096 дүрбэлжэн метр талмайтай Арьяа-Баалын ехэ ордон онсо, өөрсэ аргаар бодхоогдоно, - гэжэ Баир ламбагай сурбалжалагшадые барилгын талмайгаар дахуулжа, ямаршье архитектор, барилгын прорабһаа үлүүгээр асари ехэ барилгын яажа бүтэжэ байһаниие харуулба.
Анна Огороднигой гэрэл зураг
Һуурииеньшье табихадаа, тон өөрсэ янзаар хэдэн мянган жэлдэ хэлбэришэгүйгөөр байхынь, айхабтар ехэшье, орёошье ажал бүтээгдэһэн юм ха. Далай лама Буряадтамнай залархадаа, эндэл Арьяа-Баалын ордон бодохо юм байна гэжэ айладаһан байгаа. 1990 оной эхеэр энэ үүсхэл гаргагдаад, һуурииень татахаар хоёр газар этэгдэжэ, Москваһаа мүнгэн бага сагаар һомологдоод, һуури шудхагдажа эхилэгдээд орхигдоһон юм. Тэрэ һууришье сагай эрхээр һалаа, гантаа. Тиимэһээ 2014 оной августын 4-дэ дахин шэнээр барилга эхилээ. Түсэлынь баһал һэлгэгдэжэ, Хамбын хүреэнэй Дуйнхор, Согшон, Диваажан дугануудай дүхэригтэ тааралдуулжа бодхоогдожо байна. Ойхонһоо гарбалтай архитектор Бронислав Борисович Михайлов ордоной түсэл тон өөрсэ янзаар зохёоһон габьяатай.
Анна Огороднигой гэрэл зураг
Богонёор хэлэбэл, эгээл доодо дабхарынь гол хаалга үүдэнүүдэй добжоонойнь доогуур өөрын үүдэтэй байха. Энэ дабхар хэдэн таһалгатайгаар, үһээтэйгээр баригдаа. Эндэ мүргэлэй хэдэн танхим, Россиин Будаадын шажантанай Заншалта Сангхын музей, шажанай сударнуудай сан нээгдэхэ, хэдэн зуун мүргэлшэдэй хонон үнжэн байхаар байранууд түхеэрэгдэхэ. Тиимэһээ оёорынь хэдэн дабхараар хушагдажа, тусхай түхеэрэлгээр һайнаар дулаалагдаха.
Һууринь болон доодо дабхарынь Түнхэнһөө угтай Вячеслав Намсараевич Байминовай хүсөөр баригдажа хушагдаа. Буряадаймнай хүн зон, хаа-хаанаһаа бууһан айлшад, мүргэлшэд Диваажан дуганай дэргэдэ дураараа хэдышье хирпиисэ худалдажа абаад, Арьяа-Баалын ордоной барилгада үргэхэ аргатай байгаа. Хирпиисэ бүхэндэ худалдажа абаһан хүнэй нэрэ бэшэгдээ. Тиигэжэ энэ барилга бүгэдэ зоной нангин хэрэг болоо. Хүнэй боди сэдьхэл, һүзэг бишэрэл шэнгээжэ, бүгэдэ зоной арга шадалые, хамтын хүсые гэршэлжэ, буурал эхэ Буряад ороноймнай, арад зоноймнай хэтын хэтэдэ хүгжэн һалбархые найдуулна. Хирпиисэһээ гадна модонһоо эхилээд, шабын түмэр, бетон гэһэн барилгын зүйлнүүд мүнөө ямар үнэтэй гээшэб – олонойл оролдолго!
Анна Огороднигой гэрэл зураг
Мүнөө дээдэ дабхарнуудайнь 21 метр үндэртэй хананууд бодхоогдоод, ербылдэжэ байна. Хоорондоо үһээ-дотор хушалтагүй иимэ үндэр ханануудые бариха гээшэмнай орёоһоо орёо хэрэг гэжэ харагдана. Энэ барилга юрын хүнэй ойлгохыншье аргагүй.
Доторнь дүрбэн ехэ тулганууд бодхогдожо байна гэжэ манда ойлгуулба. Хараһаар, тулганууд гэжэ ойлгохошьегүйш. Эдэ тулга-бахананууд баһал өөрын онсо барилгатай. Үргэн ехэ тэбхэр, үндэрһөө үндэр (21 метр) эдэнэр дотороо хүндытэй юм байна. Тэдэнэй соогуур дээдэ дабхарнуудта гараха гэшхүүрнүүд аятайханаар табигдана. Иимэ һонин түсэл Бронислав Борисович зохёогоо бшуу.
Энэ асари ехэ ажал хэнэй хүсөөр, мүнгэ алтаар бүтээгдэнэ гээшэб гэһэн асуудал эжэлүүдгүй бии болоно:
- Эдэ бүгэдэ ажал хүдэлмэриие Ойхонһоо угтай, нигүүлэсхы сэдьхэлтэй Валентина Спиридоновна Урбаева бүтээлгэнэ, - гэжэ Баир ламбагай урматайгаар тэмдэглэхэдээ, - элбэг гартай, үргэн дэлисэтэй үнэн сэхэ жиндагтаа юртэмсын бүхы һайн һайханиие, буян хэшэг, үлзы хутаг, аза жаргал хүсэжэ байнабди, - гэжэ мэдүүлээ.
Хамбын Хүреэ дасанай зуу гаран лама багшанар, хубарагууд энэ ехэ жиндагайнгаа урагшатай урматай, олзотой омогтой, үлзы хутагтай ажаллажа ябахыень одо ехэ заяашадтань, орон хангайн эзэдтэ, Ойхон ехэ баабайдань гээд лэ, дээдын ехэ һахюуһадта даадхажал байдаг.
Анна Огороднигой гэрэл зураг
Тус ордон юундэ дотор хушалтагүйгөөр баригдаа юм гэхэдэ, 21 метр үндэртэй Арьяа-Баала бурхан залагдаха ха юм. Тиихэдээ дабхар бүхэнэй табсангуудһаа энэ туйлай ехэ хүрэг бүхы тээһээнь хүн бүгэдэдэ жэгдээр харагдажа байха.
Эдэ хананууд болон дүрбэн тэгшэ тулгануудһаа залгамжалан, баһал хэдэн дабхар – хубинуудһаа бүридэһэн оройнь тодорхо. Холо, ойроһоо толорон харагдаха оройень заншалта ёһоор алтаар шараха гү, али Диваажан дуганаа номин хүхөөр, хүжэ ногооноор шэмэглүүлһэн Баир ламбагайн һанамжаар болохо гү - барилга шэмэглэн түгэсхэхэ урашуул, хабаадаһан жиндагууд шиидхэхэ.
Хушын хангалаар...
- Ордон соо залагдаха Арьяа-Баалын хүрэг 21 метр үндэртэй байха. Тэрэ Бурханай магнай зулайда (гурбадахи нюдэн байдаг) Диваажан дуганай дэргэдэ бодхоогдоһон Арьяа-Баала бурхан тодхогдохо юм. Энэ бурха хоёр жэлэй саада тээ Ивалгын дасанай Цырен багша уран наринаар хуша модоор бүтээгээ. Манай эдэбхитэй жиндаг Элеонора Александровна Зангеева энэ бурхандамнай шэлээр бунхан барюулаа. Тиимэһээ мүргэлшэднай хоёр нюдөөрөө хаража мүргэхэ аргатай болоо юм. Тиигээд эдэ жэлнүүдтэ хушаар бүтээгдэһэн хүрэг яажа байнаб гэжэ жэлэй дүрбэн сагта жэгдэ шэнжэлнэбди. Зунай 35 градус халуунда, үбэлэй янгинама 40 градус хүйтэндэ оройдоошье хубилнагүй. Харин үбэлынь амиды мэтээр сэнтэнэ, - гэжэ Баир ламбагай ушар удхыень ойлгуулба.
Юундэ иимэ шэнжэлгэ хэгдэнэб гэхэдэ, 21 метр үндэртэй гол ехэ Арьяа-Баала баһал урданай буряад заншалаар хуша модоор бүтээгдэхэ. Валентина Урбаевагай туһаламжаар 500 кубометр хуша модон бэлдэгдээ. Тиигээд хахархагүйнь тула урданай ёһоор дүрбэн тээһээ үлеэгдэхэгүйгөөр, наранай элшэдэ тудуулхагүйгөөр, хура бороодо, саһа мүндэртэ сохюулхагүйгөөр тусхай байрада хадагална. Тиихэдээ нэгэ жэгдээр хатаахаяа, узуур үзүүрынь тайрагдаһан талаарнь нэгэ захаһаань избёосхоор болон нүгөө талынь тусхай шэрээр шэрдүүлээ. Иимэ арга хэрэглэхэдэ, хуша (бэшэшье модон) хахаран барингүй, нэгэ жэгдээр, забһар зайгүй хатаха юм.
Гол шухалань, сэнтэйнь гэхэдэ, хуша модон өөрын амитай, алта мүнгэн, зэд, гуулин, болоршье, шабар гүлтэгэнэ (гипсшье) мэтэ амигүй бэшэ, өөрын һайхан хангалтай юм байна гэжэ үнэн дээрэнь ойлгообди. Хэды үргэн ехэ 3096 дүрбэлжэн метр талмайшье һаань, хушаар бүтээгдэһэн 21 метр үндэртэй хүрэг энэ ехэ ордон соо сугларһан бүгэдэ зониие хангалтама һайхан агаараар амилуулха бшуу.
Анна Огороднигой гэрэл зураг
Арьяа-Баалын ордоной гол үүргэ
Буряад орондомнай һүүлэй үедэ хэды олон дасан дуганууд, субарганууд, Бурхан багшын хүрэгүүд бодхоогдооб! Этигэлэй хамбын мүнхэ бэе, хадын хабсагайда яларан толорһон Янжима гээд лэ, арад зоной, һүзэгтэйшүүлэй мүргэхэ, шүтэхэ нангин шүтөөнүүд хүрэхөөр болоо бэшэ юм гү гэхэ хүнүүд бии. Харин Арьяа-Баалын ордон өөрын баһа өөрсэ удхатай юм. Эндэ заншалта хуралнууд үнгэргэгдэхэгүй. Дүйсэн үдэрнүүдтэ: шэнын 8-да, 15- да, 30-да гурбан хоног үдэр һүнигүй үргэлжэлдэг “Нюнэй” хурал, буряадууд “Маани” хурал гэдэг, хурагдажа байха. Уласхоорондын хэлээр ретрит гэдэг.
Гурбан хоногто мүргэхэ мүргэлшэдэй байра байдал жэншэдгүй аятайханаар түхеэрэгдэхэ. Шалань дороһоо тусхай хэрэгсэлнүүдээр дулаасуулагдажа байха юм. Зохид байрада, һайн байдалда мүргэлшэд эхэ зургаан зүйл хамаг амитанай жаргалангаа эдлэхын тулада Арьяа-Баалын зүрхэн тарни болохо “Ум-маа-ни-бад-май-хум” маани таһалгаряагүй уншалсажа, саглашагүй ехэ буян олохо. Мүргэлшэд гэхэһээ, эдэ хуралнуудта ямаршье яһанай, ямаршье һүзэгтэй зон хабаадаха аргатай. Сэдьхэлээрээ амарха, ухаан бодолоо гүйлгэхэ арга хүн бүхэндэ хүсэд дүүрэнээр олгогдохо ха юм.
Анна Огороднигой гэрэл зураг
Мүнөөнэй сэмүүн сагта ямаршье хүн һанаагаа зобожо ябана. Уласхоорондын ойлгосоор хэлэбэл, “стресс” гээшэдэ залуу хүгшэншье, гэр бүлэтэйшье, ганса үрөөһэншье, байра байдалтай, гэр бараа, хаяа ханагүйшье, ажалтай ажалгүйшье, тушаал зэргэтэйшье, юрыншье ажалша малша хүн бүхэн дайруулна. Энэл хуралда хабаадаһан хүн һанаа сэдьхэлээ амаржа, һайн һанаагаар, һайхан сэдьхэлээр, энхэ тэнюунээр, гэр бүлөөрөө эбтэй эетэйгээр ажаһууха, ажал хэрэгээ урагшатай урматайгаар ябуулха аргатай болоно. Мүн баһа Будаадын шажанай ехэ багшанарые саг сагтаа ерэжэ, номнол, һургаалнуудые бүгэдэндэ табижа байхаар уригдахаар хараалагдана.
Анна Огороднигой гэрэл зураг
Үшөө тиихэдэ, мүнөөнэй сагай хүндэхэн байдалһаа боложо, зарим зоной һанал муудаа. Тиигэжэ муу һанаа һанаалжа, нүгөөдүүлдээ мууе хүсэдэг болоо. Хэды тиигэбэшье, олоной һанал нэгэдэбэл, наадыншье гү, али саадыншье (далдын) юумэндэ диилдэхэгүй болоно бшуу. “Субажа ябаһан барасһаа эблэрһэн шаазгай хүсэтэй” гэжэ анханай хүүр тон зүбөөр хэлэгдэһэниинь үнэн. Арьяа-Баалын ордон соо нэгэ доро мянга хахад зон багтаха юм. Һаналаа нэгэдэһэн эды олон зоной хүсэн барагдашагүй!
Анна Огороднигой гэрэл зураг
Энэ ордон арад зоной үгэлигын ашаар бодхоогдоно болон Арьяа-Баалын хүрэг бүгэдэ зоной оролдолгоор бүтээгдэхэ. Хүн бүхэнэй оруулһан хубита - саглашагүй ехэ буян! Үлзы хутагынь үри үхибүүдтэнь, аша зээнэртэнь, гуша дүшэдэнь долоон үедэ доло хүрэхэ.
Баримта:
Ямаршье арад, гүрэн түрэ бүхэн хүгжэлтынгөө ямар нэгэн үе бүхэндэ үе сагаа, арад зонойнгоо хүсэ шадал гэршэлһэн ехэ шүтөөнүүдые бодходог, түүхэдэ ородог. Урдандаа Буряадта Наян тохой Майдари, Зандан Жуу, Этигэлэй хамбын шабинараараа Янгаажан дасанда бүтээһэн 21 метр үндэртэй Бурхан багшын хүрэг гээд, олон шүтөөнүүд байһан. Мүнөө Захааминай Санагада 41 метр үндэртэй Арьяа-Баалын хүрэг табигдахань.
Буряадууд Арьяа-Баала, Ханшан Бодисада, халха монголнууд Жанрайсиг гэжэ мүргэнэ. Анханай санскрит сударнуудта Авалокитешвара гэжэ бэшэгдэдэг. Будда болонгүй, сансарын хүрдэ соо эрьелдэһэн хамаг амитаниие абархаб гэжэ тангариглаһан Арьяа-Баала эхэ зургаан зүйл хамаг амитанда туһалха ухаантай.