Валентина Дугарова хүүгэдтэ шүлэгүүдээ уншана
24-дэхиеэ үнгэргэгдэһэн можонууд хоорондын Номой дугыланай һүүлшын үдэр Үндэһэтэнэй номой санда эдир уншагшадта “Номой талмай” гэһэн хэмжээ ябуулга эмхидхэгдээ. Улаан-Үдэ хотын һургуулинуудай эхин ангинуудай һурагшад ерэжэ, зохёохы бэлигээ хүүгэдтэ зорюулдаг уран зохёолшод ба ирагуу найрагшадтай уулзаа, номдо дуратай гэр бүлэнүүдтэй танилсаа, һонирхолтой викторинада хабаадаа.
“Тэбэрилдээшхэнүүд”
Хүүгэдтэ зорюулжа бэшэдэг уран зохёолшон Виктория Алагуева, ирагуу найрагшад Валентина Дугарова ба Наталья Красникова гэгшэд үхибүүдтэ ехэ һонин хөөрэлдөө дэлгээ юм. Айлшад шэнэ номууд тухайгаа хөөрөө, шүлэгүүдээ уншаа.
Виктория Петровна буддын шажанай ба буряад домогууд дээрэ үндэһэлһэн үльгэрнүүдые зохёожо, өөрынгөө зурагуудаар шэмэглэжэ, ород хэлэн дээрэ хэдэн хэсэг номуудые хэблүүлэнхэй: “Золотая книга о бурятах”, “Уроки бабушки Этуген”. Тэдэнь буряад арадай соёл, ёһо заншалнууд тухай хүүгэдтэ ойлгуулжа үгэдэг. Хүүгэд ехэ анхаралтайгаар хөөрөөень шагнаа, олон асуудалнуудые табяа.
“Бүхы арадуудай ёһо заншалнууд адлишуу: муу хэрэг үүдхэхые хоридог, һайн үйлэ бэелүүлхые уряалдаг. Манай арад сэсэн, гүнзэгы удхатай ёһо заншалнуудтай, һургаалнуудтай. Жаргалтай байхын тула арадайнгаа соёл, ёһо заншалнуудые мэдэхэ хэрэгтэй. Харин мэдэсэнүүдые номһоо абанабди. Тиимэһээ номуудые уншаха шухала”, - гэжэ уран зохёолшон тобшолоо.
Валентина Чимитовна баһал ород хэлэн дээрэ бэшэдэг. Ирагуу найрагша шүлэгүүдээ уншажа үгөө: “Похвалите малыша”, “Мышка и мишка”, “Про девочек”, “Про мальчиков”... Ехэ хөөрхэн шүлэгүүд. Буряадаар бэшэдэг һаань, гоёл һэн даа.
Наталья Петровнагай дүрбэн хэлэтэй “Тэбэрилдээшхэнүүд” (“Обнимашки”) гэһэн ном хүүгэдтэ ехэ һайшаагдаа. Ород, буряад, англи, хитад хэлэнүүд дээрэ тэрэнь хэблэгдэнхэй. Нэгэ хэһэг уншаябди.
Тэбэрилдээн гээшэ хүсэтэй,
Үбшэниие аргалха аргатай,
Тэбэрилдэжэ ябая,
Эдэ мүрнүүдээ дабтая:
Эжыхэнээ тэбэринэб, абаяа тэбэринэб,
Дүү басагаяа, дүү хүбүүгээ,
Һаглагархан миисгэйгээ.
Обнимашки могут ведь
И больного вылечить,
Чтобы помнить надо тут
Хоть куплетик выучить:
Обнимаю мамочку, обнимаю папочку,
И сестру, и братика,
И котёнка-лапочку.
Энэ шүлэг тухайгаа Наталья Красникова иигэжэ хөөрөө: “Нэгэтэ хүүгэдтэй уулзалгын һүүлээр нэгэ басаган дүтэлөөд, тэбэрилдэхые дурадхаа. Бидэ хоёрой тэбэрилдэхэдэ, бэшэ үхибүүд баһал тэбэрилдэхэ дуратайгаа мэдүүлээ. Би ээлжээгээр бултантайнь тэбэрилдээб. Тиигэжэ энэ шүлэг мүндэлөө юм”.
Үнэхөөрөөшье, ехэ дулаахан шүлэг. Уулзалгын түгэсхэлдэ үхибүүд Наталья Петровнада дүтэлжэ, “тэбэрилдээшхэнүүд” болоо.
Гэр бүлөөрөө уншахада аятай
Уласай хүүгэдэй-эдиршүүлэй номой сан гэр бүлөөрөө уншадаг хүнүүдтэ зорюулан, “Гурбан үеынхидэй уулзалга” гэһэн һайндэр зорюута эмхидхээ. Үхибүүд, эхэ эсэгэнь, хүгшэн эжы абань - булта сугларжа, ямар нэгэн дуратай номоо хамта уншадаг байна. Дагбаевтанай, Екимовскиитоной, Демичевтэнэй гэр бүлэнүүд хүүгэдтэ айлшалжа, дуратай номууд тухайгаа хөөрэжэ үгөө.
Жэшээнь, Юмжана Дагбаева швед уран зохёолшон Свен Нурдквистын “Петсон и Финдус” гэһэн номдо тон дуратай, харин эжынь багадаа Николай Носовой “Мишкина каша” гэжэ ном һайшаадаг байһан.
Юмжана Дагбаева эжытэеэ дуратай номууд тухайгаа хөөрэнэ
Алёна Екимовскаягай дуратай зохёол - Михаил Лермонтовэй “Герой нашего времени”. Эжынэйнь багын дуратай ном – Даниэль Дефогой “Робинзон Крузо”, хүгшэн эжынь онтохонуудые уншадаг байһан.
Эдир уншагша Андрей Демичев эжы абатаяа, номой сангай хүдэлмэрилэгшэтэй
1-дэхи ангиин һурагша Андрей Демичев эжы аба хоёртоёо ерээ, хүгшэн эжынь видео-амаршалга эльгээгээ.
“Минии эгээл дуратай ном – “Робинзон Крузо”. Наһанаймни нүхэр түүхэтэ романуудые сэгнэдэг. Бидэ залуудаа суг хамта Александр Дюмагай “Три мушкетёра” уншадаг һэмди. Хүүгэдтэй болоходоошье, энэ заншалаа алдаагүйбди”, - гэжэ Андрейн хүгшэн эжы хөөрөө.
Гурбан хүүгэдтэй гэр бүлэ булта дүхэриглэн һуугаад, һайшаагдаһан номоо ээлжээ ээлжээгээрээ уншадаг байгаа. Харин мүнөө аша зээнэртэй болоходоо, дүхэригынь бүри ехэ болонхой. Тиигэжэ ургажа ябаһан үетэндэ номдо дурлал хүмүүжүүлэгдэнэ.
Андрейн дуратай ном ехэ олон: Виктор Драгунскиин “Денискины рассказы”, Владимир Воробьёвой “Капризка”... Зүгөөр уулзалгын үедэ хүбүүхэн Николай Носовой “Живая шляпа” ном тухай хөөрэжэ үгөө. Эжынь “Малыш и Карлсон” гэжэ ном һайшаадаг байгаа, абань – Лев Толстойн “Лев и собачка”.
“Уласай хүүгэдэй-эдиршүүлэй номой сан – хүбүүнэймни дуратай газар. Андрюшка номуудта ехэ гамтайгаар хандадаг. Хахархай байгаа һаань, заал һаа няагаад бусаадаг. Илангаяа һүүлэй хоёр жэлдэ ехэ эдэбхитэйгээр уншанабди. Славян үзэг бэшэгэй һайндэртэ шандашье хүртөө, - гэжэ эдир уншагшын эжы хэлээ. - Мүнөө бидэ мультфильм-номуудаар һонирхонобди. Юундэб гэхэдэ, түрүүн мультфильмыень хараад, удаань номыень уншахада гү, али түрүүн номыень уншаад, удаань мультфильмыень харахада ехэ һонин”.
Пушкинай үльгэрнүүдээр аяншалга
Үндэһэтэнэй номой сангай мэргэжэлтэн үхибүүдтэ Александр Пушкинай үльгэрнүүдээр викторина эмхидхээ. “Сказка о царе Салтане”, “Сказка о попе и о работнике его Балде”, “Сказка о золотом петушке”... Одоол Пушкинай зохёолнуудые мэдэхэгүй хүн гэжэ үгы. Хүүгэд ядалдангүй, һамар шэмэһэн мэтэ һард таагаад орхихо байна.
Номой дугыланай хэмжээндэ Үндэһэтэнэй номой санда айлшалһан үхибүүдтэ үнэхөөр һайндэр болоо. Тэдэ олон юумэ мэдэжэ абаа, уран зохёолшодтой харилсаа, мэдэсэеэ шалгаа, наада наадаа, шүлэгүүдые шагнаа. Номой сангай хүдэлмэрилэгшэд иимэ хэмжээ ябуулгануудай ашаар хүүгэдэй анхарал компьютер ба гаджедуудһаа таһалжа, номдо шэглүүлхэеэ оролдоно гээшэ.
Авторай ба Елена Нурбаевагай гэрэл зурагууд