Буряадай Арадай уран бэлигэй түб “Буряад хүнэй юртэмсэ” гэһэн урданай ёһо гуримуудые һэргээхэ түсэлөө үргэлжэлүүлһээр. Энэ удаа Ойхоной буряадуудай загаһашалха ёһо гуримые Буряадай Арадай уран бэлигэй түбэй “Ойхон” гэһэн арадай аман зохёолой ансамблиинхид ехэ һонирхолтойгоор харуулаа.
Ойхоной буряадууд үдэшын наранай орохолоор загаһа баридаг тү- хеэрэлгэнүүдээ Байгал далайдаа табидаг байһан. Гүр, губшуур, гүльмэнүүдые эхэнэрнүүд томожо, гүрэжэ бүтээдэг һэн. Эрэшүүл тэдэнииень хэрэглэжэ, омоли, хадаран, һэлбэрүүһэн, хаб загаһа олзолдог байгаа.
Түүхын дансанууд Ойхоной буряадуудай шадамар бэрхэ загаһашад, мүн зориг ехэтэй далайн тамарагшад байһыень гэршэлнэ.
“Ойхон” гэһэн суута ансамбль буряад арадай үндэһэн соёл һэргээхэ, хамгаалха, уг удхыень хазагайруулангүй дамжуулха талаар ехэ урагшатай хүдэлдэг. Тиин хүнүүд, илангаяа залуушуул элинсэг хулинсагуудайнгаа дуулажа, хөөрэжэ, сахижа ябаһан урданай дуунуудтай, арадай аман зохёолтой, ёһо заншалнуудтай танилсана гээшэ.
Павел Молчановай гэрэл зураг
Дарима ДАШИЕВА, Буряадай Арадай уран бэлигэй түбэй таһагай ахамад мэргэжэлтэн