​Алтан зүүгээр, мүнгэн хурабшаар

Ноябриин 1-дэ Ага тосхондо «Элинсэгэйм алтан шүрбэһэн» гэһэн үндэһэн хубсаһа урладаг уран гартанай III уласхоорондын урилдаан болобо. Тэрэниие Үбэр Байгалай хизаарай Буряад соёл хүгжөөлгын түб үүсхэжэ үнгэргөө. Буряад Уласһаа, Шэнэхээнһээ, Шэтэһээ, Монголһоо, Ага тойрогһоо бэлигтэй оёдолшод сугларжа, «Амар сайн» театрай тайзан дээрэ уран шадабарияа харуулба. Бүхыдөө 36 уран гартанай һаргама гоё 311 хубсаһан харуулагдаа.

Элинсэг хулинсагнай эртэ урда сагһаа табан хушуу малаа үдхэжэ, хоолойгоо тэжээдэг, арһа шүрбэһөөрнь хубсаһа оёжо хубсалдаг байгаа. Буряад хүн өөрөө өөрыгөө хүлэй улаһаа толгой хүрэтэрөө хубсалуулжа шадаха байһан. Үеһөө үедэ дамжан ерэһэн арһа элдэхэ, шүрбэһэ томохо, арһа утаха, арһа хүбэрдихэ, тууза сохихо, хуняаһа хуниха шадабари эжыһээ басагандань дамжа дамжаһаар ерээ ха юм. Үбэр Байгалай хизаарай Буряад соёл хүгжөөлгын түбэй мэргэжэлтэд энэ урилдаа 2015 ондо эмхидхэжэ эхилхэдээ, арһаар, нооһоор, торго хургыгаар оёдолой уран арга, урлаха шадабари, үнгэ зүһэ тааруулха гэхэ мэтые хойто үедөө дамжуулан үлөөхэ гэһэн зорилго урдаа табиһан байгаа юм.

«Амар сайн» театрай тайзан дээрэ гоё хубсаһа үмдэһэн хүбүүд, басагадай гарахадань, сугларһан арад зон шүүгшэдһээ өөрэгүй илгаруулжа шадаха шэнжэтэй байба. Тиимэһээ мэргэжэлтэдэй гаргаһан дүнгүүд арад зоной һанамжаһаа ондоошье байгаагүйнь гайхалгүй. Буряад хубсаһа үмдэһэн хүүгэдэй тайзан дээрэ гарахадань, тэдэниие хөөршөөн, хүн зон халуун альга ташалгаар угтаба. Монгол, Буряад, Хитад Уласуудта мэдээжэ болоһон уран оёдолшон Цыпелма Бальжинимаевагай, тэрэнэй дахуулан һургаһан шаби Чимита Батодалаевагай, Үбэр Монголой Шэнэхээнэй Сэрэндоржын Сэрэгмаа, Заяатын Ураншэмэгэй хубсаһанай суглуулбаринууд һаргама гоёор, һүр һүлдэ бадаруулмаар харагдаа бэлэй.

Могойто аймагай Ушарбай нютагай Чимита Батодалаева «Элинсэгэйм алтан шүрбэһэн» урилдаанай Гран-при шанда хүртэбэ. Буряад заншалта хубсаһанай шэглэлээр Сэрэндоржын Сэрэгмаа I шатын диплом, хүүгэдэй үндэһэн хубсаһанай шэглэлээр Цыпелма Бальжинимаева мүн лэ I шатын дипломдо хүртэбэд. Могойто аймагай Догой нютагай Баясхаланай Цыгмитжабай зээнсэр Бата Будажаповта хубсаһа харуулхадаа онсо илгарһанайнь түлөө тусхай шагнал барюулагдаба. Гурбахан наһатай Бата шэбэгшэтэй малгай, үбэлэй һагса дэгэл үмдөөд, тайзан дээгүүр зоригтойгоор алхалаа юм.

Намжилма БАЛЬЖИНИМАЕВАГАЙ гэрэл зураг