1360
2019 оной декабриин 13-да «Буряадай түрүү хүнүүд» гэһэн конкурсын дүнгүүд соносхогдохонь. Байгша ондо тус урилдаамнай шэнэ гуримаар үнгэргэгдэнэ. Тиигэжэ «Ехэ уг», «Буян хэшэг», «Баатаршалга», «Уран бэлиг», «Найдал», мүн «Эрхим найруулагша» гэһэн шанда дэбжүүлэгдэһэн 60-аад хүн сооһоо эгээл эрхимүүдыень тусхай комисси элирүүлхэ.
- Урилдаанай гуримай ёһоор, 5 гол номинацида гурба-гурбан түрүүшүүл тодоруулагдаха. Гадна уран хурса гуурһатай нэгэл хүндэ «Эрхим найруулагша» гэһэн шан олгогдохо, - гээд, баяр ёһололой найруулагшад уридшалан мэдүүлнэ.
Гадна мүнөө жэл түрүүшынхиеэ «Түмэнэй түрүү» гэжэ шан байгуулагдажа, burunen.ru сайт дээрэ һанал хуряалгын дүнгөөр тэрэнэй эзэн тодорхойлогдохо. Урилдаанда оролсогшод өөрынгөө номинацида шалгараашьегүй һаа, нүхэд һүүдэрэйнгээ, танил талынгаа, түрэл гаралайнгаа, нютаг зонойнгоо эдэбхитэйгээр Интернедтэ дуугаа үгэбэлнь, «Түмэнэй түрүү» болохын хажуугаар, эмхидхэгшэдэй зүгһөө морин эрдэни бэлэгтэ хүртэхэ аргатай.
- Декабриин 2-һоо 13 болотор һанал хуряалга болохо. Шангуудые барюулха баяр ёһололой үнгэржэшье байхада, бүри «Түмэнэй түрүүгэй» нэрын соносхогдохо сагай тулатар дуугаа үгэжэ болоно, - гээд, «Буряад үнэн» Хэблэлэй байшанай захирал Баир Ширапов мэдүүлхэ зуураа: - Хаанашье ажаһууһан буряад аха, дүүнэрэйнгээ дунда үлүү ехэ габьяа гаргаһан, түрүү зэргын туйлалта хэһэн зон тухай сонинойнгоо хуудаһанууд дээрэ бэшэжэ, үргэн олониитэдэ танюулхаһаа гадна, тэдэнээ хүндэлэн ёһолхо гээшэ шухала, - гэжэ нэмэнэ.
«Буряад үнэн» сониной 23-дахияа зарлаһан «Буряадай түрүү хүнүүд» гэһэн урилдаанай шангуудые барюулха баяр ёһолол заншалта ёһоороо Хоца Намсараевай нэрэмжэтэ Буряад драмын театрта болохо.
Эмхидхэлэй хороон
