​​Утаан-Үдэ болохогүйнь тула

Декабриин 2-то Улаан-Үдэ хотодо агаар бузарлалгын шиидхэгдээгүй асуудалнуудта зорюулагдаһан дүхэриг шэрээ үнгэргэгдөө.

Гүрэнэй Дүүмын һунгамал Николай Будуевай тэмдэглэһээр, Буряадай ниислэл хотын агаар хамгаалха талаар саашанхи хүдэлмэриин шэглэлнүүд тодорхойлогдоо, тэрэ тоодо “Сэбэр агаар” гэһэн федеральна түсэлдэ Улаан-Үдые оруулха зорилготой ажал ябуулагдаха юм.

1-дэхи болон 2-дохи ТЭЦ-үүд хорото утаанай 85 хубиие “үйлэдбэрилнэ” гэжэ тоологдодог. Зүгөөр хотымнай агаар һүүлэй хоёр- гурбан лэ жэлэй туршада эгсэ муудаа. Илангаяа үбэлэй сагта заримдаа амилхын аргагүй болошодог. Гол шалтагааниинь мэдээжэ – кочегаркаар түлэгдэдэг модон гэрнүүд болон бага ажахынууд.

Улаан-Үдые тойроод, жэлһээ жэлдэ модон гэрнүүд олошорһоор. Заримдаа харахада, яһала баян хүнэй гэжэ тухайлхаар ахаһаа гоё гэр аад, үрхэһөөнь хара тортог утаан бааяжа байдаг. Юугээрээ түлэдэг юм? Сохом түлеэн бэшэ. Нүүрһэншье бэшэ хэбэртэй. Юундэб гэхэдэ, дүрэнхэй резинын үнэр гутахадал гэдэг. Мүнгөө харамнажа, өөртөөшье, бусадташье хоро хүргэдэг зон биил даа, манай дунда.

Энээниие болюулхын тула ашаг үрэтэй ори ганса арга бии: агаар бузарладаг эмхинүүдтэ, хүнүүдтэ гомдол бариха хэрэгтэй. Зүүн Байгалай аймагууд хоорондын байгаали хамгаалгын прокуратурын сайт дээрэ (https://baikalproc. ru/reception-confirmation/) хандалгануудаа оруулжа болохо. Тиигэбэлтнай, зохистой хэмжээнүүд абтаха.