1814
Декабриин 13-да Буряадай гүрэнэй драматическа театрта үнгэрһэн “Буряадай түрүү хүнүүд-2019” гэһэн баяр ёһололдо мүнөөнэй болон ерээдүйн эдир “одод” һайн дураараа оролсожо, олоной зүрхэ сэдьхэл доһолгоо.
2019 оной октябрь һарада Яруунада болоһон “Буряадай дууша бүлэ” гэжэ урилдаанда эрхимлэһэн Оюна Будаева дүрбэн дангина басагадтаяа тайзан дээрэ гаража, “Абадаа” гэжэ монгол дуу бэлэглээ. Алтана, Янжима, Баирма, Бэлигма басагадынь багаһаа хүгжэмэй һургуулида ябадаг - “Мүнгэн хонхонууд” гэжэ ансамблиин эдэбхитэй гэшүүд юм.
Буряадтаа мэдээжэ дуушан Вера Шобосоева “Аба эжыдээ” гэжэ өөрынгөө зохёоһон дуугаа олоной һунгалтаар “Түмэнэй түрүү” болоһон хадам эжы, абадаа - Дамби Залхаевич Мэдэгма Борисовна хоёртоо зорюулаа. Харин Очирма басаганиинь интернет холбоондо олоной дура буляаһан «Табан хушуун мал” гэжэ дуу олон тоото харагшадтамнай бэлэглээ. Энэ дуунай үгыень Нина Артугаева, хүгжэмыень Вера Шобосоева бэшэһэн байна.
Гадна НТВ телесубагаар «Ши – супер!» гэжэ уласхоорондын урилдаанда хабаадаһан Василина Панамарёва Гунга Чимитов Анатолий Андреев хоёрой бэшэһэн “Инаг дураяа гамнаарай” гэжэ дууень дуулажа, олоной альга ташалганда хүртөө. Ород басаган ехэ зохидоор буряадаар дуулаа бшуу. Багшань Изабелла Гольдберг юм.
Хэрбэеэ эстрадын одон Ирина Абидуева «Шүнэ дундын бүжэг» гэжэ монгол дуу дуулаа һаань, Буряадай гүрэнэй оперо болон баледэй театрай гол дуушан, уласхоорондын хэмжээнэй урилдаануудай шагналтан Александр Хандажапов «Сагаан дали» гэжэ буряад дуугаа гүйсэдхөө.
Гэбэшье “Хадаг” гэжэ бүлгэмые харагшаднай ехэ дулаанаар үдэшэһэн байна. Тус бүлгэмые Буряадай арадай артист Ешин-Хорло Гомбоин хүтэлбэрилдэг юм.
Ехэ шадамараар энэ үдэшыемнай Сэсэг Бадмаева хүтэлөө.
“Буряад үнэн” мэдээсэлэй албан
Алексей Жилинэй болон Анна Огороднигой гэрэл зурагууд
