​​Хадхууртай таланууд

Хүндэтэ уншагшад! Удангүй байгша оноо үдэшэжэ, шэнэ жэл руу алхам хэхэмнай. Амаршалганууд мүнөөнһөө социальна холбоон соо таража эхилээ. Хэрбэеэ урда дугаартаа Шэнэ жэлэй шэмэг хасууриие хартаабхаар Белоруссида хээ гэжэ дуулгаа hаа, мүнөө Болгариин омогорхол - перецһээ бүридэһэн хасуури та олонойнгоо анхаралда дэлгэжэ харуулхамни. Энэ дэмы бэшэ.

Уруугаа хараһан ажахынууд

Буряадаймнай хүдөө ажахы уруугаал орожо байна. Гүрэн түрэ, нэн түрүүн Буряад Уласай Хүдөө ажахын яаман, энэ байдалые хубилгахын тулада хэмжээ абанагүй гэжэ социальна холбоон соо Намжил Мардваев үргэлжэ бэшэжэ байдаг. Хүдөө ажахытай нягта холбоотой эмхиие - Буряадта “Россельхозцентрые” хүтэлбэрилдэг Намжил Бадмаевич хүдөө ажахын бэрхэшээл зосооһоонь мэдэхэ тула, байдалыень бодотоорнь сэхэ хэлээд, засаг баригшадай дура гутаагаашье аабза. Теэдшье худал баримтануудые дээшэнь эльгээгээд, тушаалһаа хиидэхэеэ түбхын түрүүндэ айжа һуудаг заримашуул хэлэһэн үгыень буруу тоодо оруулха гэжэ бүхыгөөрөө оролдодог бэзэ. Илангаяа һаяхана Мухар-Шэбэрэй дэбисхэр дээрэ оршодог “Түгнэ” бүлгэм хаагдаха туйлдаа хүрэбэ гэжэ олониитэдэ мэдүүлээд, энэ хэрэгые хараалха уялгатай Буряад Уласай экономикын, хүрэнгэ оруулгын болон хүдөө ажахын яаманууд хаанаб гэжэ бодолгото болобо. Удаан хүлеэлтэгүйгөөр Буряадай хүдөө ажахын болон эдеэ хоолой яаман нюур хуудаһандаа харюу үгэбэ. Тэрээн соохииень тобшохоноор хэлэхэдэ иимэ: “Табан жэлэй туршада 90,56 сая түхэриг хэмжээнэй туһаламжа гүрэнһөө үгтөө. Һүүлэй гурбан жэлдэ уларилһаа боложо, ургаса багаар абтаа... Ажахын захирал Дмитрий Климов Хүдөө ажахын яаманиие зэмэлнэгүй. Мүнөө дээрээ ажахы хаагдаа гэжэ мэдүүлгэ оруулаагүй”.

Гэбэшье Намжил Мардваев энэ харюуень дахинаа шүүмжэлэн, Дмитрий Климов ажахынгаа техникэ худалдаанда табяад байна, худал үгынтнай түлөө хүн зоной урда эшхэбтэр болоно гээд тэмдэглэбэ. Һүүлэй жэлнүүдтэ ганса энэ ажахы бэшэ, Бин-агро, Агролидер+, Борьёогой ажахы, Загустай, Сокол болон бусад байгуулганууд хойно хойноһоо хаагдаа гэжэ нэмэбэ.

Олон тоото шалтагаануудһаа боложо, хаагдаа аабза. Гэбэшье гол шалтагааниинь гэхэдэ, олзо оршо багаһаа болонол даа. Хариһаа асарһан эдеэ хоол хямда тула, олонхи зон худалдан абана.

Москва хүрэһэн «Нээмэл микрофон»

Үнгэрһэн намар һунгалтын удаа уладай тэсэбэри халижа, Улаан-Үдын талмай дээрэ буһалгаан болон алдаа бэлэй. Һунгалтын үмэнэхи идхалгын үедэ арадай баатар Вячеслав Мархаевай нэрэ бузарлаһандань олонхи зон эбсэжэ ядаа һэн.

Тэрэ хүдэлөөнэй үедэ онсо илгарһан Дмитрий Баиров һая болотор Соведүүдэй талмай дээрэ үдэшын 18.00 сагһаа хоёр часай тур­шада “Нээмэл микрофон” эмхидхэ­жэ байгаа. Һаяхана Москва хүрэжэ, Улаан талмай дээрэ үнөөхил микро­фоноо баряад зогсоо. Тэндэһээ үлдүүлээд, мүнөө Манежскэ талмай дээрэ хүн зониие хүлгөөнэ. 39-тэй залуу хүбүүн ямар зорилго даханаб гэжэ олоной гайхал түрүүлһээр. Эгээл тиимэһээ Ютуб каналдань аяар 20 мянган хүн һуудаг байна.

Хүршэнэрнай хүлгөөтэй

Эрхүү можын амбан захирагша Сергей Левченко тушаалһаа гараба гэжэ мэдээн ябана. Зүб бурууень элирүүлжэ ядатар, сурбалжалагшадай урда өөрөө пресс-хуралдаа үнгэргэбэ.