937
Улаан-Үдын «Авиатор» болон А.П. Вагжановай нэрэмжэтэ соёлой байшангуудта мүнөө үеын муниципальна кинотеатрнууд нээгдэбэ. Ородой Холбоото Уласай Юрэнхылэгшын «майн» тогтоолнуудые бэелүүлхэ зорилготой байгуулагдаһан майн «Соёл» гэһэн үндэһэн түсэлэй хэмжээндэ соёлой байшангуудта заһабарилгын ажалнууд хэгдээ. Буряадай ниислэл хотын Вагжанова, Аэропорт һууринуудай соёлой байшангууд бага хотонуудта кинотеатрнуудые дэмжэхэ талаар жасын федеральна грантда хүртэжэ, дүрбэ-дүрбэн сая түхэриг абаһан байна.
- 2019 ондо улас дотор соёлой юһэн байшан грантда хүртөө. Улаан-Үдэдэ кинотеатрнууд байгаашье һаа, шэнэ кинотеатрнуудта ажаһуугшад ябаха гэжэ бата найданаб, - гэжэ Буряад Уласай соёлой сайдай орлогшо Леонид БудаевА.П. Вагжановай нэрэмжэтэ соёлой байшанда кинотеатр нээлгын баяр ёһололдо хэлээ.
Вагжанова, Аэропорт һууринуудта 20 мянганһаа дээшэ хүн ажаһуудаг. Мүнөө тэдэнэр хотын түб гарангүй, 3D, 2D-формадта кинонуудые хараха аргатай болобо. Тиихэдэ биледэй сэн үнэгүй гээд тэмдэглэлтэй: хүүгэд 120 түхэригөөр кинодо орохо, томошуул – 150 түхэригөөр. Тиихэдэ хараа муутай, шэхэ хатуутай хүнүүдэй кино хараха тусхай хэрэгсэлнүүдээр кинотеатрнууд хангагданхай.
Шэнэ кинотеатрнуудта долоон хоногой дүрбэн үдэр гурба-гурбан кинонууд харуулагдаха, харин шэнэ жэлэй һайндэрэй үдэрнүүдтэ үдэшэ орой болотор хүдэлхэ.
2019 ондо «Соёл» гэһэн үндэһэн түсэлэй хэмжээндэ Каменск һууринда, Бэшүүр, Новая Брянь, Турунтаево, Хэжэнгэ, Нарһата тосхонууд болон Северобайкальск хотодо долоон кинозал нээгдээ гээд һануулнабди.
Буряад Уласай Засагай газарай мэдээсэлэй албанай гэрэл зураг
