​​Болгоомжотой байя!

Амар сайн, хүндэтэ нютагаархид! Үнгэрэгшэ долоон хоногто социальна холбоон соо улад олоной анхарал үлүү ехээр татаһан уйдхартай хоёр мэдээсэл дээрэ тогтоё. Олошорһон эзэгүй зольбо нохойнуудые үсөөлхэ тухай, мүн зэргэлээд оршодог Хитадта коронавирусһээ һэргылхэ тушаа хөөрэлдөөн ябаа. Өөрөө гэрһээ гарангүй, үхибүүдээшье газаашань табингүй һуухаар ха гэжэ бодохоор бологдоно.

Зоболон асарһан зольбо нохойнууд

Улаан-Үдын 111-дэхи хороодо эхин ангиин эдир хүбүүе эзэгүй зайгуул нохойнуудай хазажа байтар, хүршэнэрынь абараа гэһэн һураг суу тараба.

Эжынь нарай үхибүүнтэеэ гэртээ байгаа. Хүбүүнэйнь һургуулиһаа харижа ябатар, нохойнууд добтолоо юм ха. Гар хүлыень, толгойень нилээд гүнзэгыгөөр хазаһан байжа, эмшэд дүрбэн сагай туршада операци хээ. Ээллээл хадаа болоо. Талаан боложо, хүнүүд хараба. Харин хүнэй ябадаггүй газарта нохойнууд добтолог даа...

facebook.com

Иимэ аймшагтай ушар хэнэйшье үхибүүнтэй боломоор лэ. Үнэхөөрөөшье, үлүү олон болоһон зайгуул зэрлиг нохойнуудые үсөөлхөөр болоо. Улаан-Үдэдэ мүнөө дээрээ 100 мянган эзэгүй нохойнууд тоологдоно. Теэд яагаад үсөөлхэб? Шононуудые үсөөлхын тулада ангуушадта шан барюулдаг гүбэ, тэрээн шэнги программа байгуулая гэжэ эдэбхитэн Алексей Гыргенов уряалба. Ангуушад зольбо нохойнуудые баһал хюдахаар ха юм. Зольбо нохойнуудһаа сүлөөлхэ гэһэн эрхэдэ ямаршьеб байгуулганууд хүртөөд, хайшан гээд хүдэлдэгынь эли бэшэ. Харин ангуушадта даалгабал, тэдээн олзо олохын тулада, оролдолго гаргахал һэн.

Тиигэн гэһээнь зайгуул нохойнуудые алажа болохогүй гэһэн норматив федеральна хэмжээндэ баталагданхай гэжэ Вика Фроленко дуулгаба. Стерилизовалхадал болохо юм ха. Тиигүүлһэн нохойнууд хүндэ добтолхогүй аал - ямар тэнэг зон хуулинуудые бэшэнэб гэжэ сэтгүүлшэн Эрдэни Раднаев гайхана. Энэ хуули баталагшад ябагаар ябадаггүй, зайгуул нохойнуудтай ушардаггүй гэжэ заримашуул бодомжолно.

Хумхаарһан гү, али ондоо үбшэнтэй гэһэн гэршэлгэгүйгөөр хоро уулгажа унтуулжа боломоор бэшэ гээд, Елена Шитикова дуулгана.

Гэбэшье арга хэмжээ абахаар болонхой. Амитаниие алажа болохогүй гэнэбди. Нүгэл. Теэд багахан үхибүүдээ холо табингүй һахяад ябаха болоно гүбди? Тиигэхэ аргагүй – ажалтай һаа, яаха болонобибди? Улаан-Үдын энэ бэрхэшээл шиидхэбэри хүлеэһээр үнинэй. Һаяхана гэмтэһэн үхибүүн эзэгүй зольбо нохойнуудые үгы хэхээр болоо гэжэ дахинаа һануулба бшуу. Хэмжээнүүдэй абтаагүй һаань, эгээл иимэрхүү ушар бүри аймшагтай хойшолонтойгоор дабтагдажа магадгүй. Болгоомжотой байя!

Шэнэ түрэлэй вирус

Хитадта тараһан коронавирус тушаа олондо мэдээсэлгын хэрэгсэлнүүд үргэлжэ дуулгажа байна. Хоёр мянга гаран хүн, зарим баримтаар 13 167 хүн халданхай. Мүнөө дээрээ 100 гаран хүн наһан болоод байна гэхэһээ эхилээд, гашуудалтай мэдээнүүд ерэжэл байна. Хубэй провинциин Ухань хотодо анха түрүүн энэ вирус һүжэрөөд, мүнөө дээрээ Хитадһаа холо гадуур – Австралида, Урда Солонгосто, Непалда, Малайзида, Япондо, Америкэдэ, Францида, Канадада үбшэнтэн элирүүлэгдээд байна.

Россиһаа Хитад руу ошохонь хоригдожо, аяншалга эмхидхэдэг байгуулганууд путёвко захигшадта мүнгыень бусаана юм ха. Тиихэдэ Буряадһаа Хитадта амархаяа ябашаһан аяншаднайшье гэртээ харижа эхилээ. Һаяхана мэдээжэ сэтгүүлшэн Лариса Иринцеева нүхэртэеэ хамта Хайнаньһаа Шэтын аэропортдо буугаад, богонихон пост Инстаграмда тунхаглаба. Гэрэл зураг дээрэ хахад нюураа бүглэһэн эмнэлгын маска зүүнхэй байба. Иигэжэ вирусһээ һэргылнэ бэшэб, нюдэ хордохуулмаар хорото утаанһаань бэеэ абархаяа хүсэнэб гэжэ Лариса Кимовна мэдүүлээ.

Буряадһаа бусадшье зон Хайнаньда амаржа байһанаа харуулһан гэрэл зурагуудые дэлгэнэ. Ухань хототой зэргэлээд оршодог Хайнаньда энэ вирус мүн баһа дэлгэржэ байнхай бшуу. Тиимэһээ нютагаархиднай удангүй бусаха аабза.

Буряадта мүнөө дээрээ энэ вирус хүрөөдүй байна. Иимэ аймшагтай вирусээр халданхай гэжэ һэжэг түрүүлһэн 36-тай эрэ хүн уласай инфекционно эмнэлгын газарта амяараа палата соо эмшэдэй нарин харууһан доро байһанаа, сохом энэл вирусээр үбдөөгүй гэжэ эли болоо. Тэрэнэй бага наһанайнь нүхэр - сэтгүүлшэн Болот Ширибазаров Фейсбук холбоондо диагноз тухайнь үсэгэлдэр дуулгаба. Новосибирскһээ бата диагнозынь ерээ юм ха.

Хитад орон Буряадһаа холо бэшэ. Дэлхэй дүүрэн таража байһан халдамал үбшэндэ дайруулхагүйн тулада, олоной газарта түлхисэлдэхэгүй, ханяада хамшагтай зонһоо холуур ябаха, Наньхуей регионһоо ерэһэн 8424 кодтой банан абахаяа сээрлэхэ шухала гээд һэргылэмжын уряанууд ябана. Тиигэе!