​​Сагаалганай «бууза»

«Санкт-Петербургда иимэ тортнуудые барина» гэһэн соносхолой Инстаграмда гарамсаар, дары түргэн хэдэн мянгаад хүн һонирхожо хараба.

- Яагаа гоё юм! Юумэ һанажа ядадаггүй хүнүүд биил даа. Хаана байһан санкт-петербургынхидай хэжэ байхада, буряад эхэнэрнүүд бууза-тортнуудые барижа эхилэел, - гэхэ мэтын һанамжанууд, уряанууд тус толилолго доро ябана. Гадна бууза-торт амталжа үзэһэн заримашуулынь: “Хаягтыл даа! Амтатай юумэниинь нэгэшье үгы. Мяхаяа татажа, талханда орёоһон буузаяа эдибэл, холо дээрэ”, - гэжэ харюусана.

Гэхэ зуура буряад арадай жэнхэни хоол гэжэ тоологдодог бууза Ород гүрэндэ хаа-хаанагүй үйлэдбэрилэгдэдэг болонхой. Алтайда хэгдэжэ хүргэгдэһэн бууза Южно-Сахалинскда худалдагдана, гадна Камчаткын арад зондо хайшан гээд бууза эдихэб гэһэн заабари үгтэнэ гэжэ дуулдаа һэн.

Улаан-Үдын дэлгүүрнүүдтэ “Буузада дуратайб” гэһэн бэшэгээр шэмэглэгдэһэн жэгнүүрнүүд наймаанда табигдана, мүн буузын түхэлэй конфетэнүүдые хэдэг “Санса” гэһэн эмхи тухай сонинойнгоо хуудаһанууд дээрэ хөөрөө һэмди. Мүн бүдөөр бүригдэһэн бууза- нааданхайнуудшье бии болонхой аабза. Эдэ бүгэдөөр тобшолходо, буузамнай бүмбэрсэг дэлхэйдэ мэдээжэ боложол байна.

vk.com/Подслушано Бурятия