​​Ород түхэриг - «оёорто»

Нефтиин сэнгэй унахадань, доллар үнэтэй болобо. Американ түхэриг худалдажа абаха гэбэл, 75 ород түхэриг гаргашалха болонобди. «ОПЕК+» гэдэг эмхиин хэлсээнэй эбдэрһэнһээ боложо, нефтиин сэн дээшэлбэ гэжэ мэргэжэлтэд багсаамжална. Эдэнэр дундаа хэлсэжэ, нефть худалдаха сэн тогтоодог юм ха.

«ОПЕК+» гэжэ эмхи хадаа нефть олзоборилдог, тэрэниие худалдадаг гүрэнүүдэй нэгэдэл юм. WallStreetJournal сониной мэдээсэһээр, Саудай Арави хара алта худалдахадаа, Ород Уласые хашаха һанаатай һэдэлгэ ябуулна хаш. Нефть наймаалдаг «Эр-Рияд» гэһэн эмхи ерэхэ һарада нэгэ үдэрэй туршада 10 сая баррель нефть олзоборилдог болохоор түсэблэнэ. Тиихэдэнь дэлхэйдэ хара алтанай сэн 20 доллар болотороо унаха гэжэ хараалагдана.

Хитадта тараһан коронавирусай һүжэрһэнһөөшье боложо, иимэ байдал тогтоһон байжа магадгүй. Ушар юуб гэхэдэ, Хитад гүрэн дэлхэй дээрэ нефть эгээл ехээр худалдажа абадаг юм.

Ород Уласай Мүнгэн һангай яаманай мэдээгээр, энэ тохёолдоһон байдал манай гүрэнэй арад зоной ажабайдалда балай һаад ушаруулхагүй юм ха. Иимэ сэн дэлхэйдэ 6-10 жэл соо тогтобошье, уласай һанда хадагалаатай мүнгэн манай гүрэнэй аюулгүй байдал хангалгада хүрэхэ гэжэ мэргэжэлтэд найдуулна.