​Харбинда үнгэрһэн буряад уран зурагай үзэсхэлэн

Хабарай эхин һарын һүүл багаар манай республикын бүлэг уран зураашад Хитад гүрэнэй Харбин хото хүршэнэрэй урилгаар ошожо, уран һайханай выставкэ тэндэхи зоной үзэмжэдэ дэлгээһэн байна.

- Манай бүлэгтэ намһаа гадна Россиин Фе­дерациин арадай уран зурааша, Россиин Уран зурагай академиин гэшүүн-корреспондент Сол­бон Раднаевич Ринчинов, Буряад Республикын габьяата уран зурааша Баясхалан Лыгсоков, манай республикын соёлой габьяата ажая­буулагша Анатолий Александрович Цыденов болон манай бүлэгэй хүтэлбэрилэгшэ, Уран зураашадай холбооной түрүүлэгшын орлогшо Евгений Анатольевич Болсобоев гэгшэд оро­обди, - гэжэ Буряад Республикын арадай уран зурааша, РБ-гэй болон РФ-гэй гүрэнэй шангу­удай лауреат, Россиин Федерациин габьяата уран зурааша Чингиз Бадмаевич Шонхоров хөөрөөгөө эхилнэ. - Маанадые Харбин хотын захиргаанай хүдэлмэрилэгшэ нүхэр Лю Мин Цзю Росси болон Хитад гүрэнүүдэй хамтын эмхиин зүгһөө урижа, бидэнэр арбаад үдэрэй турша соо выставкэеэ тэндэхи үзэсхэлэнэй түб соо дэлгээгээбди. Лю Мин Цзюгэй ударидадаг эмхи манай гүрэнэй бусадшье регионуудай уран зураашадаар холбоо байгуулжа, тэдэнтэй сугтаа хамтын ажал ябуулдаг байна. Энэ удаа тэдэнэр маанадые урижа, выставкын хажуугаар бидэнэр сүлөө сагтаа өөһэдынгөө сэхэ ажал ябуулаабди. Хэлсээнэй ёһоор хүн бүхэмнай уриһан таладаа гурба-гурбан бүтээлнүүдээ бэлэг болгон үгөөбди. Би өөрөө 20-ёод жэлэй саада тээ Хитад гүрэн айлшаар ошоһон байхаб. Харин энэ удаа тиишэ ошоходомни, танихын аргагүй гоё болошонхойл. Үзэсхэлэн нээлгын үедэ Харбин хотын мэр, бусад ноёд сайд, тэндэ­хи уран зураашад, юрын харагшад тоогүй олоор ерээ. Тиихэдэ ганса нэгэ үдэр бэшэ, харин бүхы арбан үдэрэймнай туршада харагшадай ээлжэ­эн һубарин ябаа гэхэдэ, алдуу болохогүй хаш. Выставкэмнай Сунгари (Зүүн гар) мүрэнэй эрье дээрэ оршодог музей соо үнгэргэгдэһэн юм. Ажалаа хэхэ хэрэгтэмнай уряашаднай хэрэгтэй шэрэ будагуудые, байра, хоол, хонолгын газар миинтээр маанадта дурадхан үгэһэн байна. Энээнэй хажуугаар манай бүлэгэй гурбан уран зураашад Монголой ба Үбэр Монголой найза­нарай урилгаар Бээжэн хото ошожо ажал ябу­улаа. Тэндэ бидэ “Мандуухай” гэһэн ресторан болон зохид буудалай комплекс соо байрлажа ажалаа ябуулаабди. Бүхы дээрэнь хэлэхэ бо­лоо һаа, энэ айлшалгамнай яһала үрэ дүнтэй байгаа гэжэ тоолохоор. Хожом хойшо үшөөшье дүтөөр харилсажа байхаар хэлсээ баталаабди. Хитад нүхэднай манай орондо харюу болгон айлшалжа ерэхэ.
Лопсон Гергенов