933
Январиин 28-да Цыренжап Сампиловай нэрэмжэтэ Уран зурагай музей соо уран дархан, Россиин Уран зураашадай холбооной гэшүүн, Буряадай соёлой габьяата хүдэлмэрилэгшэ, “Буряадай түрүү хүнүүд” конкурсын “Баатар мэргэн”номинацида лауреат Анатолий Цыденовэй уран бүтээлнүүдэйнь хоёрдохи үзэмжэ баярай оршондо нээгдэбэ.
Пётр Чайковскиин нэрэмжэтэ колледжын “Жэргэмэл” ансамблиин бэлигтэй оюутад уран дарханиие, сугларһан зониие “Амаршалгын дуугаар” угтаба. Буряад Уласай Соёлой яаманай орлогшо сайд Николай Емонаков Анатолий Александровичые Буряад Уласай Засагай зүгһөө халуунаар амаршалба. Удаа дараалан Буряадай Уран зураашадай холбооной түрүүлэгшэ Евгений Болсобоев, Буряад Уласай Гщрэнэй шангай лауреат, Буряадай арадай,Россиин габьяата уран зурааша Чингиз Шонхоров, Буряадай арадай урлалай түбэй дарга Жаргалма Архинчеева, Үндэһэтэнэй музейн дарга Баир Гомбоев гэгшэд уран дархандаа халуун баяраа мэдүүлбэд.
Амаршалгын һайхан үгэнүүд соогоо Анатолий Цыденовэй амжалтануудые булта тэмдэглэхэдээ, Анатолий Александровичай бага, ехэшье уран зүйлнүүд өөрын гүнзэгы удхатай, энэ уран дархамнай Буряадайнгаа уран зурагта, гар урлалда, бүхыдөө буряад арадай соёлдо шэнэ урасхал оруулаа гэжэ онсо тэмдэглэбэ. Буряадай Гүрэнэй оперо, баледэй академическэ театрай дуушан Доржо Шагдуров ирагуу һайхан дуугаараа амаршалжа, бултаниие баярлуулаа.
Энэ ехэ баяр ёһололдо уран бэлигтэнэй наһанайнь хани нүхэр Римма Хандуевна амаршалгануудта хүртэхөөрөөл хүртэжэ, бултанай урда гаража, Доржо Шагдуров Алёна Мохосова хоёрой ирагуу дуун доро хатар наадаяа уян нугархайгаар гүйсэдхөө.
Удаадахи дугаартаа Анатолий Александрович Цыденовэй уран бүтээлнүүдтэй уншагшадаа бүри дүтөөр танилсуулхабди.
Сэнгэ РИНЧИНОВ,
Аркадий БАТОМУНКУЕВАЙ фото-зурагууд.
