818
Буряадаймнай Хүүхэлдэйн “Үльгэр” театр Сагаан һарада ямар зүжэгүүдээр хүүгэдые баярлуулнаб гэжэ манай сурбалжалагша һонирхоо.
Үльгэр домогуудай удхаар.
- Сагаан һарада манай “Үльгэр” театр багашуулда хэдэн һонин зүжэгүүдые харуулна. Буряад арадай үльгэр домогуудай удхаар табигдаһан: “Чудесный клад”, “Тархайн хүбүүн Зархай”, “Һэеы гэрэй домог”, “Сагаан Үбгэнэй үльгэр”, “Мудрая мышь и волшебный камень” гэжэ зүжэгүүд олоной һонирхол татана, - гэжэ театрай ахамад режиссёр Эрдэни Жалцанов хөөрэнэ.
- Тиихэдэ Санкт-Петербургһаа режиссёр Мария Александрова уригдажа, “Puppet partу” гэжэ зүжэг англи хэлээр табиха. Зүжэгэй премьерэ февралиин 28-да үнгэргэгдэхэ, - гэжэ Эрдэни Бато-Очирович мэдээсэбэ.
Хун шубуун гарбалтай
Хуһан модон сэргэтэй...
- Энэ сезондо анхан 2006 ондо табигдаһан “Хун шубуун” зүжэг дахинаа һэргээн табибабди. Зүжэгэй либреттые мэдээжэ драматург Михаил Батоин найруулжа, Эрдэни Бато-Очирович найруулан табяа. Бэрхэ уран зурааша Ольга Акимова шэмэглээ. Хүгжэмдэнь ехэ анхарал хандуулагдажа, Баттувшинай, Бадма-Ханда Аюшеевагай дурадхаһан буряад арадай урданай аялганууд зэдэлнэ. Америкын индеецүүдэй флейтэшье хэрэглэгдээ, - гэжэ орлогшо захирал Зинаида Улаханова хөөрэбэ.
Домогоо саашань түүрээе,
Дундаршагүй түүхэеэ хөөрэе...
Энэ зүжэгтэ үльгэршэ үбгэнэй, Байгал далайн, Хоридой мэргэнэй, хун шубуудай, мэлхэйн, хүнэй нүхэр Нохойн, үхибүүдэй рольнуудые бэлигтэй артистнууд: Арсалан Бидагаров, Дымбрыл, Билигма Улзытуевтан, Оксана Лодоева, Анхбаатар, Буд, Булган, Арюунзул гэгшэд наадана.
“Үльгэр” театрай бэлигтэйшүүлэй уран аргаар арадаймнай домог манай үри үхибүүдтэ ойлгуулагдажа, һанаа сэдьхэлыень хүдэлгэжэ, сээжэ зүрхэндэнь хадуугдана.
Театрай фойе соо Сагаан Үбгэн, Саһан Хүүхэн, энэ жэлэй һүлдэ Һармагшан туһалагшанартаяа хүүгэдые угтажа, һонирхолтой, шогтой хүхюутэй наадануудые наадхуулна.
Сэнгэ РИНЧИНОВ
