726
Сэтгүүлэймнай 2016 оной түрүүшын дугаар соо “Манай литэ” гэһэн ниитэ гаршаг доро Буряадай элитэ уран зохёолшо Жамсо Тумуновай түрэһөөр 100 жэлэй ойдо бүхэли хэһэг зорюулагдаба. Ким Балковай “Жамсо Тумунов минии хуби заяанда”, Доржи Эрдынеевэй “Түрүүшын буряад романай автор”, Надежда Гармаевагай “Уянгата шүлэгүүдэйнь уян нугархай мүрнүүд” гэһэн зураглалнууд, Жамсо Тумуновай “Тэрэлжын һалбаржа байхада” гэһэн баглаа шүлэгүүд толилогдоо.
Буряадай арадай уран зохёолшо Бадма Шойдоковой түрэһөөр 95 жэлэй ойдо Надежда Гармаевагай “Бадма багшын бата зам”, Бадма Шойдоковой “Дуулимхан Зэдын һэбшээндэ” гэһэн туужаһаа хэһэг, үхибүүдтэ зорюулагдаһан шүлэгүүд ниитэлэгдэбэ.
“Уран үгын дали жэгүүр” гэһэн ниитэ гаршаг Буряадай арадай уран зохёолшо, элитэ эрдэмтэн, олониитын ажал ябуулагша Ардан Ангархаевай 70 наһанай ойдо зорюулагдаа. Галина Базаржапова-Дашеевагай “Агууехэ шэди алтан дэлхэй дээрэ байха ёһотой” гэһэн очерк, Ардан Ангархаевай “Мундарганууд” гэһэн түүрээлгэ, шүлэгүүдынь оробо. Поэт Санжай-Ханда Дармаевагай “Үбэлэй шүлэгүүд” уншагшадай уянгые дайрахал бэзэ.
“Монголой уран зохёолшодой бүтээлнүүдһээ” гэһэн ниитэ гаршаг доро буряад гарбалтай Сэдэнэй Намсарайн “Үхэжэ болодоггүй оршолон” гэһэн туужа, Сэнгын Эрдэнын “Хойто наһандаа уулзахабди” гэһэн романай үргэлжэлэл үгтөө.
“Уран зохёолой урасхал хайшааб?” гэһэн ниитэ гаршаг доро үгтэһэн БГУ-гай доцент, хэлэ бэшэгэй эрдэмэй кандидат Лариса Халхаровагай монгол туургата уран зохёолой мүнөө үеын байдалда зорюулагдаһан Үбэр-Монголдо болоһон зүблөөн тухай һонирхолтой тэмдэглэл уншагшын анхарал татаха байха.
“Оршуулганууд” гэһэн ниитэ гаршагыемнай “Солонгос уран зохёолой дээжэһээ” гэһэн хэһэг шэмэглэбэ. Сеулай үндэһэтэнэй университедэй оюутан Эрдэм Ламажапов яруу найрагша Сим Хунай “Тэрэ үдэрэй ерэбэл”... гэһэн шүлэгыень солонгос хэлэнһээ ородто, ородһоо буряад хэлэн дээрэ оршуулһан байна.
“Шажан мүргэл” гэһэн ниитэ гаршагые Любовь Намжилоной “Алтан эрхи” ёһотоор баяжуулан, олоной һонирхол хужарлуулха бэзэ.
“Зүүн зүгэй зүнтэйхэн зүгы” гэһэн ниитэ гаршаг доро Владислав Түгдэмэйн “Хүүгэдтэ зорюулһан шүлэгүүд”, буряад хэлэнэй бэлиг түгэлдэр багша Баир Гомбоевой кроссворднууд толилогдоо.
“Арадай аман үгын абдарһаа” гэһэн ниитэ гаршагаа Буряадай мэдээжэ уран зохёолшо, прозаик, “Байгал” сэтгүүлдэ олон жэлдэ ажаллаһан габьяатай, хүндэтэ манай аха нүхэр Гарма-Доди Дамбаевай түрэһөөр 75 жэлэй ойдо зорюулхадаа, бэлигтэй зохёолшын оршуулһан монгол онтохонуудые ниитэлбэбди. Уг залган аха нүхэдөө дурдаха гээшэ сэтгүүлэймнай сэнтэй заншал мүн шуу.
“Урлал бэлигэй угалзанууд” гэһэн ниитэ гаршагаа Россиин болон Буряадай Уран зураашадай холбоонуудай гэшүүн, Буряад Республикын габьяата уран зурааша Зандан Даша-Нимаевич Дугаровай зохёохы ажал ябуулгада зорюулаабди. “Буряад скульптурые суурхуулха заяатай” гэһэн Ринчин Цыреновагай тобшо мэдээсэл үгтэбэ.
Галина Базаржапова-Дашеева,
“Байгал” сэтгүүлэй редактор.
