661
Мартын 1-дэ «Орда» этногалерейн харагшадай танхим соо «Алтан баг» шагналай номинант, Буряад Уласай гүрэнэй шангай лауреат, Росси болон хари гүрэнүүдээр найруулагдаһан гушаад гаран зүжэгүүдэй режиссёр Олег Юмовай «Шоно баатар» гэһэн зүжэг табигдаба.
Урданай монгол туургата арадуудай нэгэ домог соо мэлхэйн мүлхижэ ябатар, ангууша баатар номо годлёор харбажа, шархатаажархиба ха. Годлинь ходоро гарабашье, бэедэнь торошоһон байба. Мэлхэй нюрган дээрээ хэбтээд, наһа барашаба. Зүүн таладань үлэһэн үдэһөөнь ой тайга бии болобо, нүгөө зэбэтэй талыень ашагта малтамалай баруун тала гэжэ нэрлэгдээ. Урдажа гараһан шуһаниинь уһан боложо, хойто зүг, харин тархинь урда зүг болоһон байна. Һабар соонь байһан газарһаань – үрэжэлтэ тала дайда гэжэ газар дэлхэйн бии болоһон тухай энэ домог соо хэлэгдэнэ.
Олег Юмовай өөрынь зохёоһон мэлхэйн инсталляци дээрэ «Шоно баатар» домогой үйлэ харуулагдана. Энэ зүжэгые хүүхэлдэйнүүдээр Буряад Уласай габьяата артист Жаргал Лодоев гансаараа гүйсэдхэһэн байна. Домогой үгэнүүдые ород хэлэн дээрэ Россиин Уран зохёолшодой холбооной гэшүүн Алексей Сергеевич Гатапов оршуулаа.
Энэ зүжэгэй удха дамжуулхадаа, автор ехэ гүнзэгы бодол багтаагаа. Зүжэгэй түгэсхэлдэ Шоно баатар: «Муу сагай ерэхэдэ, би бусажа, таанадые абархаб»,- гэжэ хэлэнэ. Тиимэһээ мүнөө сагта хүн зон ямар эрмэлзэлтэйб, бусажа ерэхэ баатарнай ямар түхэлтэй, хэн гээшэб гэһэн асуудал зониие бодожо үзэхыень режиссёр уряална.
Елена ДАМДИНОВА
