712
Улаан-Үдэ хотын юрэнхы һуралсалай 49-дэхи дунда һургуулида эгэшэ дүү Янгутова Янжима (4-дэхи ангида) Янгутов Очир (2-дохи ангида) хоёр һурадаг юм. Эдэ хоёр ехэ дуратайгаар номой санда ябажа, олон тоото номуудаар һонирходог, хатарай ба хүгжэмэй һургуулинуудта эдэбхитэйгээр ябадаг. Тэрэнэй хажуугаар эдэ хоёрто өөрын онсо эгээл дуратай хэрэг (хобби) бии юм. Энэ хэрэгтээ «толгойгоороо», үнэн зүрхэнһөө, үдэр һүнигүй шунажа, сэдьхэлээ үгэдэг байна.
Янжима басаган утаһаар хүүхэлдэйнүүдые нэхэдэг, пластилинээр мультфильмэнүүдэй дүрэнүүдые болон саарһаар, бисернүүдээр элдэб дүрсэнүүдые бүтээдэг.
Харин Очир хүбүүхэн ехэ гайхалтай юумээр һонирходог юм. Юуб гэхэдэ, тэрэ хэдэн сая жэлэй саана дэлхэй дээрэ ажамидардаг байһан динозаврай бүхы түхэлнүүдые, нюргандаа болон тархидаа элдэб һоёонуудтай гайхалтай амитадые, ниидэдэг ящур, крокодил болон бусад тэрэ сагай амитадые пластилинээр бүтээхэдээ, үнгэ зүһыень тааруулжа хэдэг юм. Үшөө тиихэдээ алдуугүйгөөр сая жэлнүүдые (мезозой, палеозой, юрский үе г.м) бултыень тоолохоһоо гадуур, ямар амитад хэзээ амидардаг байгааб гэжэ мэдэдэг байна. Гурбатайдаа Очир тон түрүүшынхиеэ пластилин барижа, крокодил хээд, түрэлхидөө гайхуулаа һэн.
- Уншажа һураадүй байһан аад, «д» «и» үзэгые компьютер дээрэ дараад лэ, үнөөхил «урданайнгаа шэдитэ орон» руу аяншалжа, гайхамшагта амитадаараа һонирхожо һуудаг һэн. Гэнтэ һуужа һуутараа, элдэб асуудалнуудые һуражархиха, - гэжэ гэртэхиниинь хөөрэнэ.
Очирай эгээл дуратай хэшээл «Тойроһон дэлхэй» (Окружающий мир) байһаниинь гайхалгүй. Дэлхэйн карта зурахадаа, урданай амитадаар газар уһыень тэмдэглэнхэй байна. Зунайнгаа амаралтада Янжима Очир хоёр Санкт-Петербург хото хүгшэн эжы, абадаа айлшалдаг заншалтай. Тиихэдээ тон түрүүн музей гүйлдэжэ ошодог юм. Хэзээшье, хайшаашье ошоходоо, эдэ хоёр пластилин, карандаш, альбом гурбанаа тэбэреэд лэ ябадаг. Сүлөө сагай гарахадал, «ажалаа» хэжэл захалха.
Мүнөө сагай үхибүүдэй тон дуратай үйлэдэгшэ нюур хадаа Лунтик гэжэ мэдээжэ. Тиимэһээ Янжима Очир хоёр миисгэйнгээ хүбүүе Лунтик гэжэ нэрлэһэниинь ушартай. Пластилинээр хэһэн Лунтигай дүрэ номуудай таһаг дээрэ - эгээл хүндэтэй газарта оршодог юм.
Эжы, абын, түрэлхидэй омогорхол – эдээхэн хоёр хүүгэдэй уран гараараа хэһэн бүтээлнүүд олоной анхарал татажа, саашадаа үшөөл һайнаар хүгжэн һалбараг лэ даа гэжэ үреэе!
Елена ДАМДИНОВА
