667
Буряад Уласай “Баатар, Дангина” мүрысөөндэ Гран- при абагша, Хэжэнгын аймагай 11-дэхи классай һурагша Бато Шойнжонов иигэжэ хэлээ һэн.
Бүхы наһандаа тайзанһаа холо ошожо үзөөгүй Бато хүбүүнэй һанаагаа зобожо, олон үдэр унтаагүй байһандань гайхамаар. Юуб гэхэдэ, үшөө бага наһанһаа хойшо Хэжэнгын абьяас бэлигтэй хүбүүн шадамар бэрхээр арадай театрай дэргэдэ элдэб түхэлэй рольнуудые наададаг, мүн тиихэдэ хатарха, дуулаха дуратай юм. Бато Шойнжонов хадаа уласай хэмжээнэй “Будамшуу” гэһэн мүрысөөндэ илаһан намтартай.
-Тус мүрысөөндэ оролсоходо, ехэ хүндэ байгаа. Шата бүхэндэнь һайнаар лэ бэеэ барижа, шанга бэлэдхэл хэһэндээ түрүүлжэ гарааб гэжэ һананаб. Юуб гэхэдэ, “Баатар” болохо һанаатайшуул булта ганса бэрхэ талаһаа өөрыгөө харуулжа шадаа. Үсэгэлдэр финалда орооб гэжэ дуулаад, тэһэ баярлааб. Харин һүни һайнаар унтажа шадаагүйб, - гэжэ Бато Шойнжонов хөөрэнэ.
Хэжэнгын баатар хүбүүн анха түрүүшынхиеэ иимэ түхэлэй мүрысөөнүүдтэ үшөө 4-дэхи классай ябахадаа хабаадаа бэлэй. Тиихэдэ тэрэ шүүгдэхэдээ, бархираад үлөө һэн. “Эгээл тэрэ үедэ 11-дэхи классай һурагша болоод лэ, бултандатнай бэлиг шадабарияа харуулжа, “Баатарай” үндэр нэрэ зэргэдэ хүртэхэб гэжэ тангариглааб”, - гэжэ Бато Шойнжонов үргэлжэлүүлнэ.
Энэ мүрысөөндэ Сэлэнгын аймагһаа буужа ерэһэн һур харбалгаар Россиин спортын мастер Булат Султумов гурбадахи шатын диплом абаба. Захааминай аймагай Бимба Тогмитов хоёрдохи һуурида гараа. Харин нэгэдэхи шатын дипломоор Түнхэнэй аймагай Жэмһэг һууринай
Жамбал Никифоров урмашуулагдаа.
Борис БАЛДАНОВ
Авторай фото-зураг
