668
Зэдын аймагай 12 наһатай Чимит Раднаев хабарай эхин үдэр олон тоото түрэл гаралаа, нютагаархинаа тон ехээр баярлуулба гээшэ. Тэрэ республиканска хэмжээнэй заншалта болоһон “Баатар, Дангина” гэһэн мүрысөөнэй “Эдир Баатар” гэһэн хүндэтэ нэрэ зэргэдэ хүртөө.
Һүүлшын шатын эхиндэ 2015 ондо шалгарһан үхибүүд мүнөө жэлэй финалистнуудта һайхан үгэнүүдые хэлэжэ үреэбэ. Тэрэ үедэ Зэдын аймагай Цагаатай һууринай Аюр Осоров “Эдир Баатарай” илагшын “Мүнгэн аяга” гол шан түрэл нютагайнгаа хүбүүндэ дамжуулхаб гэжэ үшөө мэдээгүй байгаа бшуу. Чимит Раднаев түрүүлхэб гэжэ найдабашье, лаб шүүхэб гэжэ баһа һанаагүй. “Январь һарын нэгэ һайхан үдэр Чимит гэртээ ерээд, “Баатар, Дангинын” мүрысөөндэ хабаадахамни гэжэ хэлээ. Бидэ, түрэлхидынь, хүбүүгээ абаһаар лэ дэмжээбди”, - гэжэ “Эдир Баатарай” эжы Намсалма Владимировна Лубсанова хөөрэнэ.
Чимит хүбүүн гэртээ зургаан үхибүүдэй эгээл ахань болоно. Харин тон багань оройдоол гурба хахад һаратай юм. Хэды тиигэбэшье, эжынь Чимит хүбүүгээ һургуулиин багшанартай, Инзагата нютагайнгаа соёлой байшанай хүтэлбэрилэгшэ Надежда Борисовна Жугдурова гэгшэдтэй хамта бэлдэжэ эхилээ.
- Манай Намсалма Владимировна уран гартай, һайн мэдэсэтэй гэжэ нютагтаа суутай. Абаһаар лэ хүбүүндээ буряад гуримаар һайхан хубсаһа оёжо үгэһэн байна. Үшөө тиихэдэ түрүүшын шатада хэлэхэ үгэнүүдые шадамар бэрхээр зохёогоо. Гэхэтэй хамта, энеэдэтэй шог зугаа баһа өөрөө бэлдээ, - гэжэ Надежда Жугдурова хөөрэнэ.
Чимит бэрхэ байһандаа, тайзан дээрэ анха түрүүшынхиеэ гарабашье, өөрыгөө зохидоор харуулжа шадаа. Түрэл Зэдэдээ түрүүлжэ гараһан байна. Харин Улаан-Үдэдэшье ерээд, олон тоото хабаадагшадай хойно байгаагүй юм. Иигэжэ Чимит Раднаев мүрысөөнэй “Эдир Баатар” боложо, Гран- при шанда хүртөө. Эгээл энэ үедэ Чимидэй шадамар бэрхэ аба табан үхибүүгээ хүмүүжүүлжэ гэртээ үлэһэн байгаа.
Шангай һууринуудые Ивалгын аймагай Мэргэн Галсанов, Ахын аймагай Алдар Ошоров болон Түнхэнэй аймагай Ринчин Жамбалов гэгшэд эзэлһэн байна.
Борис БАЛДАНОВ
Авторай фото-зурагууд
