​Эдир Дангина – Алия Ринчинова

Оройдоол долоон наһатай аглаг холын Аха нютагай Алия Ринчинова Буряад Уласай “Эдир Дангинын” нэрэ зэргэдэ хүртөө.

 

Хэды эдиршье һаа, Алия хадаа томо тайзан дээрэ түрүүшынхиеэ гараа бэшэ. Үшөө январь һарада Алия Ринчинова Эрхүү хотодо ошожо, уласхоорондын “Россиин субад эрдэни” гэһэн хуралдаанда амжалтатайгаар хабаадалсаа.

 

Орлигой дунда һургуулиин шаби амаршалгын болон танилсуулгын үгэнүүдые түргөөр сээжэлдээб гэжэ хэлэнэ. Хатархадаашье, дуулахадаашье бэрхэ басаганай гоё гэгшын хубсаһа  эжынь оёһон байна.

 

- Тайзан дээрэ гарахадаа, оройдоошье айгаагүйб, - гэжэ эдир дангина мэдүүлнэ.

 

Ахын аймагай захиргаан Мартын 8-най һайндэрөөр бүхы эхэнэрнүүдые амаршалхадаа, бага Алияае мартаагүй. “Эдир Дангина” болоһонойнь түлөө 30 мянган түхэриг барюулаа.

 

Түнхэнэй аймагһаа ерэһэн Алтангэрэл Зурбаева удаа дараалан, хоёрдохи жэлээ мүрысөөнэй һүүлшын шатада орожо шадаа. Тэрэ 3-дахи шангай дипломоор шагнагдаа. Буряадай үндэһэтэнэй 1-дэхи лицей-интернадай  шаби Валерия Иванова 2-дохи шатын дипломдо хүртөө. Үшөө нэгэ ниислэл хотын бага дангина, 9-дэхи һургуулиин һурагша Саран Ендонова 1-дэхи шатын диплом абаа.    

 

Борис БАЛДАНОВ

Авторай фото-зураг