669
Улаан-Үдэ хотодо түрэhэн Катьяна Цыдыпова hургуулида орохынгоо урда хэдыхэн жэлэй саана үбгэн аба Владимир Цыдыповичэй түрэhэн тоонто Шэбэртэ ерэжэ, абынгаа дүү Цырен-Дулма Цыдыповнае хүгшэн эжы шэнгеэр hанажа, абга эгэшэ Туяна Цырендондоковнае эхэ шэнгеэр hайнаар һанажа байдаг.
Арбан жэлэй туршада Катьяна басаган hайн хүмүүжүүлгэ доро Шэбэртэдэ байна. Классна хүмүүжүүлэгшэ Елена Цыренжаповна – ород хэлэ бэшэгэй багша. Эхин классуудта хаба шадалыень үргэжэ байhан «Буряадай түрүү хүнүүдэй» лауреат (2015) Чимитова Жаргалма Цыденжаповна багшань болоно. Хоёр багшаяа, мүнөө заалгажа байhан олон багшанараа, түрэлхидөө, нүхэдөө hайнаар сэгнэдэг байна. Өөрынгөө уг гарбалые Катьяна hайн мэдэдэг. Абань Борсой Хуасайн Нохойтон омогтой болоно гээшэ.
Үхибүүн бүхэн онсо өөрын илгаатай байдаг. Олонхи үхибүүд гүйхэ, харайха дуратай байдаг, зариман уншаха, бэшэхэ, зураха дуратай. Шэбэртымнай дунда hургуулида 5-дахи ангиин hурагша Катьяна Цыдыпова уран гартай, hонор ухаатай, элдэб зүйлнүүдые урлажа наадаха дуратай.
Улаан-Үдэдэ hурадаг түрэлэй Норсон хүбүүтэй бэе бэеэ ойлголсожо, пластилинээр олон зүйлнүүдые бүтээжэ наададаг.
Һургуулиhаа ерээд, гэрэйнгээ даабаринуудые дүүргээд, гэртэхиндээ хамһалсаад, сүлөө сагтаа дуратай хэрэгээ хэжэ байдаг. Өөрөө ямар юумые урлахаб гэжэ ухаан бодол соогоо ходо буйлуулжа байдаг. Мультфильмнүүдэй амитадые болон хэдэн сая жэлнүүдэй саана амидарһан динозаврнуудые, тэдэниие hажаажа, үльгэрэй образуудые бүтээдэг. Басаганай гарнуудынь нягта наринаар, уян нугархайгаар, түргэнөөр хүдэлдэг.
Бүтээгдэhэн зүйлнүүдынь миин хэгдэhэн бэшэ, өөрын оньhон аргатай, хэшээжэ харахада, Катьяна уран бүтээлэйнгээ нюдэнэй сүсэгые, шүдэнүүдые гэхэ мэтэ жэжэ божо зүйлнүүдые досооhоонь бүтээдэг байна. Бүхы зүйлнүүдынь үнэн шэнги, нээрээшье үльгэрэй орондо аяншалжа байhан шэнги. «Буряад үбгэнэй хоол» гэhэн урлалай буузыень абаад эдиhээб гэжэ hанахаар, харин үбгэнэй нюдэниинь амиды, галтайхан шэнги, хубсаhа хунарынь, бэшэ хубинуудыншье тэрэл зандаа.
Һаяхан Ивалгын дасанай Хамбын хүрээдэ «Уран баримал» гэhэн мүрысөөндэ бүтээhэн зүйлнүүдые харуулжа, тэндэ үгэhэн даабарииень эрхим hайнаар бүтээхэ 87 командануудай дунда онсо шалгаржа, түрүү hуури эзэлээ. Энэ болбол саашадаа Катьянын ехэ амжалтануудые туйлахаарнь зоригжуулһан түрүүшын hайн алхам болоно.
Хэшээлнүүдтээ бэлэдхэл ехэтэй, эрхим сэгнэлтэнүүдые абадаг, тиихэдэ тамирай хэшээлдэ дуратай. Хотодо түрэhэн хадаа Катьяна буряадаар hайнаар хөөрэлдэжэ hураха гэжэ ехэ хүсэл оролдолго гаргана. Абари зангынь hайн, хүнтэй hайнаар хөөрэлдэдэг, hайн хүмүүжэлтэй гэжэ эли байдаг.
Үбгэн аба Владимир Цыдыпович эжы Роза Шатовна хоёр омогорхожо ябаха байгаа. Гэртээ эхын туhалагша, түлеэ залhа оруулха, гэрэй сэбэрые сахилсажа байдаг Катьянада hайниие хүсэжэ, hайн hуража, эрдэм ном шудалжа, талаан бэлигээ мүлижэ, пластилинээр эхилээд, шабараар, гипсээр урлажа һураха бэзэ, тиигэһээр уран скульптор боложо магад гэжэ Шэбэртын hургуулиин багшанар найдана.
Цырендондок ЗАНДРАЕВ
