​«ХУХЮУ БУРЯАД» MYРЫСООНДЭ

АЛТАН ШҮДЭНЭЙ ҺУУРИ

Зэдын Инзагатаһаа уг гарбалтай Даша-Дабаа Мункуев үшөө мэдээжэ зохёолшон болоогүй ябахадаашье, ехэл хүхюутэй, хүгтэй һэн. Уран хурса хэлэтэй даа, нээрээл улаан хэлэтые урдаа оруулхагүй хэлэндээ хэдэргэ, амандаа адалга гэжэ суутай һэн. Ноёд сайдтайшье таарахагүй, даб гэбэл лэ шогложорхиһон гү, али ёгтолжорхиһон һэн лэ байха. Тиимэһээ номуудаашье хэблүүлээгүй, Уран зохёолшодой холбоондошье абтагдаагүй. Һая «Байкал» сэтгүүлдэ үнэн нүхэр Мэлс Самбуевай уран гоёор ородто найруулһан оршуулгынь уншажа баярлахадаа, энеэдэтэй нэгэ ушар һанаандамни оробо.

Буряадай АССР-эй ниислэл Улаан-Үдэ хотын оперо болон баледэй хойто хойморто нэгэ кафе хүдэлдэг байгаа. Даша- Дабаамнай тэндэ хүүежэ, ханхинажа һууба даа, нүхэд гээшэ олон! Теэд духаряамнай олошорходоо, мэдээжэ ха юм даа: Даша-Дабаамнай уран хурса хэлэеэ дэлгэхэдээ, хажуудахи нүхэрөө голынь таһа, толгойгынь ходо хэлэжэрхихэдэнь яахабши?! Нүхэрнай бодожо ерээд лэ, сэхэ нюур руунь мунсаяа буулгажархиба....

Түү сохюулһан үүдэн шүдэнүүдээ альган дээрээ бариһан Даша-Дабаа оройдоошье муу һанангүй, наадан болгоод үнгэргөө бэлэй:

-Харыт, хүбаад, алтан шүдэнэй һуури гарашабал!

ШАДАЛГҮЙ ХҮН-ШАБГАНСЫН ЗАРАСА

Нэгэтэ үглөөгүүр хонхо хангираад,янгираад, Владимир Нимаевични ута зугаагаа дэлгэбэ. Ажал хэрэгээхэлсээд, аятайхан хөөрэлдэжэ байһанаа, гэнтэ аха нүхэрни ажабайдалдаа гомдобол даа.

- Үгы, яашабабта, юун болошооб?- гэһэмни, ахатамни иигэжэ харюусахадаа, яа гэнэбши!

- Хүбаа, шагныш.Хара үглөөгүүр бодоод лэ, сай сабагаа шананаб, үхэр малаа эдеэлүүлнэб, шэбхэ шээһынь арилганаб, уһалнаб, туужа заланаб… Заа, тиигээд лэ, арай шамай гэртээ ороходомни, наһаараа эб хамта һууһан шабга улаан шабгансамни шангарыш:

-Ууха гэхэдэ, сайшни хүйтэн; нэгэ зааха эдеэшье эдихэ гэхэдэ, халуунһаа байха бүлеэншье юумэ байхагүй. Үхэжэ эдиһэн,үтэлһэн үхэмэр, үглөөнөө дүүрэн юугээл хэжэ ялтаргажа ябанаш ..!- гээд лэ эхилбэ даа. Эй, тиигэжэ байхадань яахабши, һуужа үгөөд лэ, нээрээл:

- Үтэлхэ гээшэмнай үйлэл юм байна даа, «шадалаа барагдахадаа, шабгансын зараса» болохым гэжэ ямаршье сэсэн улад хэлэһэн юм, мүнөө болоһон хойно ухаандам оробол даа.

Фото selorodnoe.ru.