​Нютагаа ондоо нюдөөр хараха

Һүүлэй үедэ Буряад Уласта олон тоото кинофильмүүд буулгагдана. “Прикосновение ветра” гэһэн кино харалга тээмэндэ Үндэһэтэнэй номой санда эмхидхэгдэбэ.

Тус фильмын продюсер, Санкт-Петербургын дасанай хэблэлэй-атташе Алла Намсараева оролто үгэ хэлэхэдээ, “кино соохи зурагуудые элдэб социальна сетьдэ табижа болохогүй” гэжэ абаһаар лэ сугларагшадта мэдүүлбэ. Шалтагаан гэхэдэ, энэ фильм хэдэн томо кинофестивальнуудта эльгээгдэнхэй. Тиимэһээ фото-зурагууд болон киногой сценкэнүүд олоной анхаралда табигдажа болохогүй гэжэ ойлгуулаа. Олоной анхаралда тус кино ерэхэ зун табигдаха юм.

“Прикосновение ветра” хадаа Ивалгын болон Баргажанай аймагуудта буулгагдаа. Тэндэ Ивалгын дасанай болон Янжима бурханай хажууда киногой үйлэ хэрэг болоно. Гол рольнуудые Буряадай оперо болон баледэй театрай дуушан Эдуард Жагбаев болон Россиин мэдээжэ киноартистка Юлия Ауг гэгшэд наадана. Юлия Ауг хадаа 2014 ондо олондо танигдадаг болонхой. “Россия” телеканалаар харуулагдаһан “Екатерина” гэһэн телесериал соо Елизавета Петровна хатан хаанай роль шадамар бэрхээр наадажа, харагшадай үндэр сэгнэлтэдэ хүртөө бэлэй.

Тус фильм хадаа 2013 ондо буулгагдаа. Тэрэ сагта Юлия Ауг тиимэ мэдээжэ бэшэ ябаа. Москвагай “Камертон-Фильм-Русь» студиин генеральна захирал Анастасия Разгуловагай хэлэһээр, оройдоол нэгэ хоног соо Юлия Ауг энэ фильмдэ наадаха тухайгаа мэдүүлээ. Иигэжэ Буряад ороноймнай үргэл мүргэлтэй газарнуудаар ябажа, Байгал далайн агаараар амилжа, Юлия Россиин мэдээжэ артистнуудай тоодо ороһониинь һайшаалтай.

Энэ кино хадаа баруун нютагуудай хүнүүдэй нюдөөр манай Буряад орониие харуулна. Манай нютагай шэг шарай, ажабайдал һонирхожо харамаар. Юуб гэхэдэ, эндэ байһан хүн зон өөһэдыгөө хажуу талаһаань харана гэхэдэ, алдуу болохогүй.

Фильм соохи гол герой болохо Юлия залуу ябахадаа, буряад хүбүүнтэй танилсажа, инаг дуранай абьяаста абтагдана. Тэрэ үедэ “минии һамган боложо, Буряад орон ошоё” гэхэдэнь, Юлия зүбшөөлөө үгэнэгүй. 20 гаран жэл үнгэрхэдэ, тэрэ энээниие ехэ халаглан, анха түрүүшынхиеэ манай нютаг ерэнэ, залуугайнгаа инагые бэдэрнэ. Хүдөөдэ ажаһуудаг хүнүүдэй ажабайдал, Ивалгын дасанда үнгэргэгдэдэг Майдари хурал тон һайнаар харуулагдана.

Энэ кинодо наадаһан Юлия Ауг түрүүшынхиеэ модон гэр соо хоножо, сеник соо унтаа. Өөрынгөө социальна сүлжээ хуудаһанда энээн тухай бэшэһэн байна.

Оперно дуушан Эдуард Жагбаев түрүүшынхиеэ кинодо наадаа. Сугларагшадтай хамта тэрэ тус фильм түрүүшынхиеэ хаража, гайхан һуугаа һэн.

- Түрэл нютагтаа һуугаад, ажабайдалайнгаа олон һонирхолтой юумэ харанагүйбди. Кинодо наадахадаа, нютагаа ондоо нюдөөр хаража эхилээб, - гэжэ Эдуард Жагбаев хөөрэнэ. – Фильм соохи нэгэ үйлэ хэрэг автобусой буудал дээрэ болоно. Оройдоол нэгэ-хоёр минутын сценкэ харуулхын түлөө бүхэли үдэр тэндэ хүлеэгээбди. Юуб гэхэдэ, тэрэ буудал бог шоройдо дарагдашаһан байгаа. Харин бидэ өөһэдөө тэрээниие харанагүйбди, али маанадта хамаагүй болоно гү. Москва, Санкт-Петербургһаа ерэһэн кино буулгалгын бүлэгэй хүнүүдэй урда улайжа-сайжа ябааб, нютагайнгаа хүн зоной түлөө ехэ эшхэбтэр байгаа. Хэды тиигэбэшье, булта нэгэдэжэ, тэрэ автобусой буудал сэбэрлээбди, бүхы бог шорой абаашажа хаяабди.

Хүгжэмшэн, режиссёр болон сценарист Анджей Петрас кино соо һайхан хүгжэм оруулжа, фильмые үшөө бүри һонирхолтой болгоо. Тэрэнэй хэлэһээр, бидэ угаашье гоё нютагта ажаһуунабди. Хирэ болоод лэ, Анджейдэ Буряад орон ошохо һанаа бодол түрэнэ. Энэ хэмжээ ябуулгада хабаадахыень уриһан хүнүүдтэ тэрэ баяраа мэдүүлнэ.

Кино хараһанай удаа сугларагшад Анастасия Разгуловатай, Анджей Петрастай болон Эдуард Жагбаевтай үни удаан харилсаба.