​Уран бэлигтэй Түмэн

Захааминай аймагай Нурта нютагай һурагша Түмэн Дармаев уран бэлигээрээ нютагаархинаа гайхуулдаг. Нютагайнгаа һургуулиин 5-дахи ангида һурадаг Түмэн хэндэшье заалгангүй, өөрын түрэлхиин талаангаар дуулажа, хатаржа, нютагаархинаа баясуулдаг. Үшөө һонирхолтойнь гэхэдэ, пластилинээр, шабараар элдэб дүрсэнүүдые тэрэл зангаарнь урлажархидаг бэлигтэй юм.

Харахада, юрын лэ дүрсэнүүд шэнги аад, өөрын онсо удхатай бүтээлнүүд жэрылдэнэ. Түмэнэй бүтээһэн ан амитад бултадаа өөр өөрын амитай, амисхаалтай гэжэ һанахаар. Харин тиихэдэ сэнхир экранаар хаража бүтээһэн мультфильм болон һонирхолтой кинофильмүүдэй персонажууд өөр өөрын ажабайдалтай юм.

Энэ эдирхэн хүбүүн багшын заалтагүйгөөр иимэ һонирхолтой зүйлнүүдые яагаад бүтээжэрхинэ гээшэб гэжэ ехэтэ һонирхобобди. Тиихэдэмнай эндэ таажа ядаха юумэн үгыл даа гэжэ нютагаархиниинь ойлгуулба.

Талаан бэлигтэй хүн гээшэмнай гэб гэнтэ “тэнгэриһээ тэб гэжэ буушадаггүй, газарай габаһаа хүүеэд гарашадаггүй юм” гээшэнь тон зүб юм байна. Түмэнэй уран гартай Сергей Дармаев таабайниинь Ивалгын Хамбын хүреэндэ Ногоон Дара эхын дуганай барилгада эдэбхитэйгээр хабаадажа, хуша модоор хангаһан буянтай юм. Уран зурааша Соло абгайниинь акварель уһан шэрээр, тоһон шэрээр түрэл һургуулияа уран гоёор шэмэглээ бэлэй. Мүн баһа бэлигтэй Аюна абгазыниинь уран зурагаар аймаг соогоо түрүү ябаһан юм. Тиимэһээ энэ бэлигтэй бэрхэ урашуулай угта иимэ уран хүбүүнэй мүндэлһэниинь гайхалгүй.

Иимэ уран эдиршүүлэй ургажа байхада, буряад арадай соёл, гар урлал хэзээни хэзээдэ хүгжэжэ байха гэһэн бата найдал түрүүлнэ.