​"Бууралхан Буряадайм аялга" булган талаар зэдэлхэнь

Эдэ хабарай hайхан дулаахан үдэрнүүдтэ Буряадай «Нютаг» гэhэн онлайн–радио түрүүшынгээ түрэhэн үдэр тэмдэглэжэ байна. Россиин Буддын шажанай Заншалта Сангхын үүсхэлээр байгуулагдаhан энэ радио гансашье манай уласта бэшэ, харин хүршэ Забайкалиин хизаар болон Эрхүүгэй можодо, Россиин олон нютагуудаар болон хари гүрэнүүдээр манай буряад яhатан зон түрэл дуунуудаа, шүлэгүүдээ, дамжуулгануудые шагнажа, сэдьхэлээ хужарлана.

Байгша оной июлиин 1-hээ 3 болотор манай улас дотор үнгэрхэ Бүгэдэ Буряадай «Алтаргана» нааданда зорюулжа, өөрынгөө түрүүшын түрэhэн үдэрые тэмдэглэн, «Нютаг» радио зунай hайхан сагта, Росси гүрэнэй ехэ hайндэрэй урда үдэр, июниин 11-нэй үдэшын 18 сагта уласай түб стадионой талмай дээрэ «Бууралхан Буряадайм аялга» гэhэн буряад дуунай концерт-наада эмхидхэнэ.

Стадионой тайзан дээрэ Усть–Ордын, Агын Буряадай тойрогуудай болон манай уласай эстрадын одод, бүхэроссиин «Kinder МУЗ Awards 2015» конкурсдо илагша Лудуб Очиров, Эрдэни Батсух, Ринчин Дашицыренов "Heroes" бүлгэмтэеэ, Saryuna и DZE, Инна Шагнаева, Зоригто, Нонна Тогочиевтан, Елена Борохитова, Дарима Цырендондопова, Дулма Сунрапова, дүшэн жэлэйнгээ ойн баярые угтажа байhан "Yетэн" бүлгэм, уран гоёор хатардаг Азиза «Exotic» гэhэн шоу – бүлгэмтэеэ, Татьяна Штырева, Роман Попов, Мэдэгма Доржиева, Алагуй, Вера Шобосоева, hүүлэй хоёр жэлэй туршада регионууд хоорондын болон уласхоорондын дуушадай олон урилдаануудай лауреат, арбан гурба наhатай Дарья Новицкая, Светлана Санжитова, Александр Бороев, Дашима Цынгуева, «Талын аялганууд» гэhэн Усть – Ордын тойрогой ансамблиин дуушан Валентина Ободоева, Галсан-Нимын Гандиг, Валико Гаспарян, Ирина Шагдурова, Ольга Шарапова "Аядон" бүлгэмтэеэ, Аюрика, Сагаанай Дэмид, оюутадай мэдээжэ ансамбль "Байгалай долгинууд", Виктор Малдаев, Булат Гомбоев, Эржена Санжиева, Чингис Хандажапов гэгшэд талаан бэлигээ олоной урда дэлгэхээр хүлеэгдэнэ.

Түрэл буряад дуунуудтаа дуратай хүн зониие дулаахан энэ үдэшэдэ хабаадажа, hайндэрлэжэ, сэдьхэлээ, нюдэеэ, шэхэеэ хужарлахыень уринабди. Биледэй сэн тон хямдахан, 250 түхэригтэ байхаар хараалагдана.