792
Майн 21-дэ бүхы Росси дотор иимэ гаршагтай хэмжээ ябуулганууд эмхидхэгдээ. Хүн зоной дунда үнинэй һайшаагдаһан энэ хэмжээ ябуулгада хэдэн мянган хүн хабаадалсаа.
Улаан-Үдэ хотын ажаһуугшад болон айлшад хүдэлмэриингөө һүүлдэ үдэшэлэн гэр бүлэтэеэ музей ошохо аргатай байгаа. Теэд урдахи жэлнүүдтэй жэшээлбэл, музейнүүд оролгын сэн табяа. Харин томо Москва, Санкт-Петербург ба ондоо хотонуудта бүхы хэмжээ ябуулга миинтэ байгаа гээд хэлэхэ шухала. Энэ голхормо ушарһаа боложо, зоной музейдэ ерэхэеэ арсаха ушар үзэгдөөгүй. Буулгагдаһан сэнгээр олон хүн ниислэлэй музейнүүд соо суглараа.
Цыренжап Сампиловай нэрэмжэтэ уран һайханай, Буряад Уласай Түүхын, Байгаалиин музейнүүдтэ түлхилсэхөөр олон хүн ерээ. Эндэ һонирхолтой хэмжээ ябуулгануудһаа гадна, сугларагшад өөһэдөө музейн экспонадуудые гартаа барижа үзэхэ аргатай байгаа. Мүн тиихэдэ хуушанай хубсаһа үмдөөд, фото-зураг буулгаха эрхэдэ хүртөө.
“Орда” гэһэн этногалерей анха түрүүшынхиеэ “Музейн һүнидэ” хабаадалсаа. Бусад музейнүүдһээ дутуу бэшэ хэмжээ ябуулга үнгэргэһэниинь һайшаалтай. Манай “Буряад үнэн” Хэблэлэй байшанай дэргэдэ толилогдожо байдаг суута “Байкал” болон “Байгал” сэтгүүлнүүдтэй танилсалга эндэ эмхидхэгдээ.
Автор: Борис БАЛДАНОВ
