​Буряад хубсаһанай үзэсхэлэн

Һүүлэй үедэ буряад угсаатанай ехэ һайндэр «Алтаргана» нааданиие угтуулан, Буряад Уластамнай олон хэмжээ ябуулганууд боложо байна гээшэ ааб даа. Энэ шугамаар Улаан-Үдэ хотын Найрамдалай гэртэ июниин 25-да буряад зоной үмдэжэ ябаһан хубсаһанай үзэмжэ үнгэргэгдэхэеэ байна.

Энэ һайхан үйлэ хэрэг буряад угсаатанай нютагуудай эблэлнүүдэй холбоон эмхидхэнэ. Тиимэһээ энэ эблэлдэ ородог уласай бүхы аймагууд, Агын Буряадай тойрог, Эрхүү можо, Буряад Уласта ажаһуудаг Шэнэхээн нютагаархид булта хабаадаха юм. Тиихэдээ угсаатанайнгаа үеһөө үедэ тахижа ябаһан тусхай маяг хэлбэреэр оёгдоһон буряад хубсаһаяа дэлгээжэ, олоной анхаралда харуулха гээшэ. Тус үзэсхэлэнэй урилдаан гурбан шатаһаа бүридэнэ: арадай (урданай маягтай хубсаһан), стилизованно (мүнөө үеын эрилтээр оёгдоһон хубсаһан) болон хүүгэдэй. Иимэ үзэмжэ болбол буряад арадаймнай хубсаһанай айхабтар ехэ удха шанар, оёдолшодой бэлиг шадабари, баян хараа бодол дамжуулна ха юм.

Мүнөө энэ хэжээ ябуулгые үнгэргэхын тула буряад угсаатанай нютагуудай эблэлнүүдэй холбооной түрүүлэгшын орлогшо Дашиева Нина Тожиловна түрүүтэй элдэб нютагуудай түлөөлэгшэд болохо юһэн хүнһөө бүридэһэн эмхидхэлэй хороон бүридхэгдэнхэй байна. Энэ харалгада хабаадахаяа һанабал, июниин 17 болотор хабаадалсаха мэдүүлгэеэ үгэхыетнай эмхидхэлэй хороон уряална.