​"Алтарганын" бэлдэлгэ түлэг дундаа

Бүгэдэ буряадуудай уласхоорондын “Алтаргана” наадан Буряад Уласай ниислэл Улаан-Үдэ хотодо июлиин 1-һээ 3 хүрэтэр үнгэрхэ.

Мүнөөдэрэй байдалаар, бэлэдхэлэй ажал эршэм ябуулагдана. Бүхы хэмжээ ябуулгануудай үнгэрхэ хэмжээнэй гаршаг соносхол бэлдэгдэнхэй, июниин 6-һаа бүхы хэмжээнүүдтэ билет худалдалга эхилбэ. Энээн тухай Буряад Уласай соёлой сайд Тимур Цыбиков заншалта брифинг дээрэ мэдээсэбэ.

- Фестивалиин шугамаар үнгэргэгдэхэ харалгануудай болохо хотын театрнуудай болон филармониин онлайн-кассануудта биледүүдые худалдан абахада болоно. Фестивалиин нээлгэн болон хаалгануудта билет 200-600 түхэригтэ байха, харин харалгануудта - 100 түхэригөөр орожо болохо. Мүнөө жэлэй Нааданай ехэ илгаа юуб гэхэдэ, биледүүдые хари гүрэн болон ондоошье хотын зон онлайн-аргаар худалдажа абаха аргатай байха, - гэжэ Тимур Гомбожапович тэмдэглээ.

Үнэхөөрөө урдахи жэлнүүдэй наадануудта нютаг дээрэхи зон уридшалан билет абажа үрдеэд лэ, ерэһэн айлшад ямаршье наадануудые үзэхэ аргагүй байгаа бшуу. Тиигэжэ энэ алдуу манай Буряад оронһоо эхилжэ заһагдаба гээшэ.

Үшөө тэмдэглэлтэй юумэн гэхэдэ, «Алтарганын» бэлдэлгын шугамаар “Зорька”, “Берёзка” гэһэн лагерьнуудта хүүгэдэй зохёохы хаһанууд ажаллаха.

- “Берёзка” лагерьта Буряад Уласай аймагуудай болон Улаан-Үдэ хотын 200-гаад үхибүүд сугларха. Эндэ хоорой коллективүүдэй зунай зохёохы тусхай хаһа июниин 13-һаа июлиин 3 хүрэтэр үнгэрхэ. Энэ хаһада Буряад ороной түрүү хүгжэмэй бүлгэмүүдэй хормейстернүүд хэшээлнүүдые зааха. Эдэ 200 үхибүүд “Алтарганын” нээлгэнэй ехэ нааданда хабаадуулагдаха юм, - гэжэ соёлой сайд тайлбарилба.

Харин “Зорька” лагерьта хатарай хүүгэдэй бүлгэмүүдэй 100 гаран үхибүүд ерэхэ, тэдээнтэй Буряад Уласай эгээл эрхим хореографууд ажаллаха юм.

- Хүүгэдэй лагерьнуудта тамирай зунай хаһанууд үнинэй эмхидхэгдэдэг юм, харин зохёохы шэглэлэй хаһанууд юундэ ажаллаха аргагүй юм. Минии һанахада, энэ жэлэй дүршэл һайшаалтай, саашадаа жэл бүри үргэлжэлүүлэгдэхэ. Үхибүүд бэеэ элүүржүүлхын хажуугаар тамир болон зохёохы бэлигээр бэеэ хүгжөөхэ бшуу, - гэжэ Тимур Цыбиков мэдээсэбэ.