​Уран гартайшуулай бүтээлнүүд табигданхай

Бүгэдэ буряадуудай уласхоорондын “Алтаргана” наадые арадай дархашуулай уран бүтээлнүүдэй үзэсхэлэн-мүрысөөн хододоо шэмэглэдэг заншалтай. Энэшье удаа “Алтаргана” нааданда хабаадагшад болон олон тоото сугларһан айлшад энээниие хүлеэн ядашоод байна ёһотой.

Найр нааданай үшөө эхилээгүй байхада, уран гартайшуулай бүтээлнүүдые манай ажаһуугшад хараха аргатай. Юуб гэхэдэ, эдэ үдэрнүүдтэ Цыренжап Сампиловай нэрэмжэтэ уран һайханай музей соо “Алтарганые” угтуулан” гэһэн һонирхолтой үзэсхэлэн-мүрысөөн эмхидхэгдэнэ.

Манай Буряад Уласта, илангаяа буряад угсаатанай дунда уран гартайшуул тон олон юм. Тиимэһээ булта тэдээниие суглуулжа, эгээл эрхим ажалнуудые хаража, шэлэн абалгын шата болоно гээшэ. “Алтаргана” нааданда хабаадаха дурадхал эрхим ажалнуудта үгтэхэ гээд, тус хэмжээ ябуулга эмхидхэгшэ Арадай урлалай улас түрын түб мэдүүлнэ.

Модо отолжо, тэрээниие һиилэжэ, үйһөөр бүтээһэн зүйлнүүд үзэсхэлэндэ олоноор табигдаа. Түмэрөөр, арһаар, бүдөөр, мүн бусад юумээр хэгдэһэн бүтээлнүүд онсо һуури эзэлээ. Буряад зураг, угсаатанай түхэл шэнжэтэй гарай бэлэгүүд олоной анхарал татаа.

Уран гартан Максим Гомбоев, Алдар Санжиев, Анатолий Цыденов, Булат Жамбалов, Баирма Дамбиева, Надежда Супонина болон бусадай ажалнууд һонирхолтой байна. Манай урдаа хараха аха захатанай хажууда залуушуулшье өөрынгөө бүтээлнүүдые дурадхаа. Тэдээниие хаража нюдөө хужарлуулаад, Буряадаймнай уран урлалай ерээдүйдэ һанаа зоболтогүй гэхээр.

Энэ һонирхолтой үзэсхэлэн-мүрысөөн июниин 12 болотор үргэлжэлхэ.

Автор: Борис Балданов
Описание: үзэсхэлэн-мүрысөөндэ шалгарһан бүтээлнүүд "Алтарганада" хабаадаха

Автор: Борис Балданов
Описание: Түмэрөөр, арһаар, бүдөөр, мүн бусад юумээр хэгдэһэн бүтээлнүүд онсо һуури эзэлээ.

Автор: Борис Балданов
Описание: Буряад зураг олоной анхарал татаа