​Эрдэни Батсухтай суг гитара барижа, буряад дуунуудаа хангюурдая!

Буряадай габьяата артист Эрдэни Батсух нэн түрүүн Бүгэдэ Буряадай «Алтаргана-2016» гэһэн найрые угтуулан, «Буряад үнэн» сониной уншагшадые сагаан сэдьхэлһээ амаршална:

- Бүхы Буряадайнгаа зониие энэ ерэжэ байһан, долоодохи һарын 1-эй, 2-ой, 3-ай үдэрнүүдтэ болохо «Алтаргана-2016» гэһэн найртаа һайнаар сугларжа, ехээр, гоёор наадажал, энэ зундаа бэетнай ехэл элшэ хүсэ абажа, буряад угсаатанаа үргэжэ, бултадаа һайн ябаял даа гэжэ хэлэнэб.

Эрдэни Батсух гоё гэгшээр буряад, монгол, ородшье дуунуудые гүйсэдхэхынгөө хажуугаар ятага дээрэ наададаг юм гэжэ үсөөхэн хүн мэдэнэ ёһотой. Харин бидэ Эрдэни ахатаниие ятагын саана һуулгангүй, олохон зоной гэртэ байдаг гитара дээрэ шэхэнэй шэмэг дуунуудые удаа дараалан гүйсэдхэхыень урибабди. Энэ дуунуудайнь видео burunen.ru гэжэ сайт дээрэ мүнөө гартаа баригша сониной гараха үдэр толилогдохо юм. Харин уншагшадайнгаа һонорто энэ дуушанай гүйсэдхэдэг дуунуудайнь нэгые толилнобди.

Инагай дуун

Үгэнь Ш.-Х.Базарсадаевагай

Хүгжэмынь Б. Бальжинимаевай

Эхин түрүүшын дуһалхан

Эгээл халуухан дуран бии.

Холын мүшэндэл ялас гээд,

Хуби заяанайш эхин гээ.

Дабталга:

Эльгэн сахюусан юртэмсын

Инаг дуранай уула дээр

Үеын сасуутан нүхэд соо

Үшөөл шамайгаа хүлеэхэб.

Набша намаатай нютагтаа

Наһан залуухан хаһандаа

Нажар зунайнгаа үдэшэнь

Аляа зүрхыем доһолгоош.

Дабталга:

Эльгэн сахюусан юртэмсын

Инаг дуранай уула дээр

Үеын сасуутан нүхэд соо

Үшөөл шамайгаа хүлеэхэб.

Үлзы заяатай хоёр һаа,

Утын дабаанда уулзажа,

Ульһа дулаахан дуранда

Аза талаантай һуухаяа.

Дабталга:

Эльгэн сахюусан юртэмсын

Инаг дуранай уула дээр

Үеын сасуутан нүхэд соо

Үшөөл шамайгаа хүлеэхэб.