Оюун бэлигээ дамжуулха заяатай

Хүүгэдэй урлалай багша болохо гээшэ баһал дээрэһээ үгтэһэн бэлиг ха юм даа. Үхибүүдые уран урлалда заажа байхадаа, өөрөө онсо ондоо харасатай, бодолтой байна гээшэ.

Эгээл иимэ багшанарай нэгэн Дарима Болотовна Маюрова Бэшүүрэй аймагай Шэбэртэ нютагта түрэһэн намтартай. Һургуулиин һүүлээр Агын багшанарай училищи дүүргэһэнэй удаа гэр бүлэ түбхинүүлжэ, Могойтын хүүгэдэй зохёохы гэртэ уран урлалай, аман зохёолой кружок эрхилһэн байна. Дарима Болотовна бүри шаби ябахаһаа юумэ нэхэхэ, оёхо, зураха, шэмэглэхэ дуратай юм һэн. Тэрэ дадалаа орхингүй, үхибүүдээр хүдэлжэ байгаашье һаа, сэдьхэлдээ дүтэ ажалаа сүлөө сагтаа хэһээр лэ ябаа.

Дарима Болотовна хониной дала, үхэрэй эбэр елылгээд, үнгэтэ будагаар элдэб зурагуудые зурадаг, арһаар дүрэнүүдые бүтээдэг, бүдэй үртэһэнүүдээр панно нэхэдэг юм. Нэгэтэ бэшэ Агын тойрогой үзэсхэлэнүүдтэ, мүрысөөнүүдтэ түрүү һууринуудые эзэлһэн габьяатай. Ажалнуудыень хаража байхада, дала дээрэ зураһан гоё һайхан, нугархай бэетэй дангинанар өөр өөрын маягтай, абаритай байдаг. Яһануудаар хэһэн олон бүтээлнүүдынь бүтэн композицинууд болодог.

Мүнөө Дарима гэр бүлэтэеэ Загарайн аймагай Новая Брянь тосхондо ажаһууна. Гурбан хүүгэдээ хүмүүжүүлжэ, хани нүхэрэйнгөө тулга боложо, дуратай ажалаа хэһээр зандаа.

Автор: Елена Дамдинова
Описание: Үхэрэй эбэрээр хэһэн бүтээлынь