​Буряад ороноо суурхуулаа

Бэлигтэй дууша, хатарша үхибүүдые тодорхойлхо зорилготой 2013 онһоо хойшо Монголой «TV 9» телекомпани жэл бүри «Гэгээн аласай одод» гэһэн телевизионно хүүгэдэй фестиваль үнгэргэдэг болоһон.

Хэрбэеэ 2013 он болотор энэ мүрысөөн ганса Монгол орон дотороо болодог байбал, мүнөө Уласхоорондын гэһэн зиндаатай болоо. Эндэ Росси гүрэнһөө Буряад Уласай, Эрхүүгэй можын, Үбэр-Байгалай хизаарай болон Хальмаг Уласһаа эдиршүүл хабаададаг юм.

2016 ондо тус фестиваль абарга бүхэ барилдаашадаараа, арадай дуунуудые дууладаг дуушадаараа суутай Хитадай Үбэр-Монголой Шэлын Гол аймагай Баруун Үзэмшэн хушуунда үнгэрһэн байна. Баруун үзэмшэнэйхид «Эрын гурбан нааданай» тон олон хабаадагшадаараа Гиннесэй номой гурбан сертификат абаһан юм гэжэ һануулая.

Манай Буряад ороной хүбүүн Эрдэни Гармаев Россиһаа, Монголһоо, Үбэр-Монголһоо ерэһэн хоёр зуугаад гаран хабаадагшадые илажа, медаль болон нэгэ миллион монголой түгригтэ хүртэбэ. Эрдэни хүбүүн Бай Чун Шинай үгэ дээрэ Н.Нар-Оюугай зохёоһон «Монгол морь» гэһэн дуу гүйсэдхэһэн байна.

Бүхы дээрээ Буряад Уласые 30-аад үхибүүд түлөөлөө: «Мүнгэн хонхонууд» гэһэн студиин эдир дуушад, «Байгал» театрай дэргэдэхи «Уян бэлиг» хатарай бүлгэм, дуушад Дарья Новицкая («Түрүүшын дуран»), Арина Габитова («Басаганай дуун») болон бусад эдир бэлигтэн.