"Алтан сэргэ" айлшадаа үдэшэбэ

Табан хоногой туршада хотын театрнуудай тайзан дээрэ Эстониһоо, Хакасиһаа, Башкириһаа, Монголһоо, Үбэр-Монголһоо ерэһэн үндэһэтэнэй театрнуудай зүжэгүүдые зон хаража баясаба гээшэ. Тиигэжэ сентябриин 16-да Уласхоорондын «Алтан сэргэ» гэһэн гурбадугаар Россиин үндэһэтэнэй театрнуудай фестиваль түгэсэжэ, эрхимүүдынь элирһэн байна.

Жюриин гэшүүдтэ хүнгэн бэшэ ажал тудабашье, тэдэнэр энэ хэрэгээ эрхимээр дүүргэжэ, найман номинацяар эгээл һайнуудыень элирүүлээ. Тэрэнэй хажуугаар гурбан тусхай шагналнууд байгаа: «Эрхим зүжэгшэдэй ансамбль» – Мажит Гафуриин нэрэмжэтэ Башкириин академическэ театр, «XXI зуун жэлэй Ромео» – Д. Нацагдоржын нэрэмжэтэ Монгол гүрэнэй театрай зүжэгшэн Баасанбуу Шинэбаярта хүртөө, «Мүнөө үеын үндэһэн прозодо хандалга» мүн лэ Башкириин академическэ театр абаһан байна.

Ямар найман номинацяар байгааб гэхэдэ:

1. «Эрхим зураашанай ажал» – Геннадий Скоморохов Анастасия Шенталинская хоёр («Ромео и Джульетта»);

2. «Эрхим аялга найруулагша» – Чинбат Батмөнх («Ромео и Джульетта»);

3. «Хоёрдохи ээлжээнэй эхэнэрэй эрхим дүрэ» – эхын дүрэ наадаһан Жамсранжав Оюундарь («Ромео и Джульетта»);

4. «Хоёрдохи ээлжээнэй эрын эрхим дүрэ» – Меркуциогай дүрэ наадаһан Эрдэнэ-Туяа Тодгэрэл («Ромео и Джульетта»);

5. «Эхэнэрэй эрхим дүрэ» – Джульеттые наадаһан Ольга Ранжилова – («Ромео и Джульетта»);

6. «Эрын эрхим дүрэ» – тэнэг Муклайн дүрэ наадаһан Алексей Сагатаев – («Сумасшедший Муклай»);

7. «Режиссёрой эрхим ажал» – «Тэнэг Муклай» найруулһан Сергей Потапов;

8. «Эрхим зүжэг» – Гүрэнэй Хоца Намсараевай нэрэмжэтэ Буряад драмын академическэ театр хүртөө («Ромео и Джульетта»).

Автор: Буряад драмын театрай сайтһаа абтаа
Описание: Буряадай соёлой сайд Тимур Цыбиков амаршалгын үгэнүүдые хэлэжэ байна

Автор: Буряад драмын театрай сайтһаа абтаа

Описание: Гүрэнэймнай мэдээжэ критик Татьяна Техновец театрнуудта үндэр сэгнэлтэ үгөө

Энэ фестивальда хабаадаһан театрнуудай зүжэгшэд булта урматай, хүхюутэйгээр хаалтын ёһололдо байгаа гэжэ тэмдэглэхэ шухала.

- Ехэ һонин фестиваль үнгэрбэ гээшэ. Юугээрээ һайшаагдааб гэхэдэ, эхинһээнь һүүл болотор бүхы театрнууд булта байгаа. Анхан нэгэ үдэрөөр ерээд ябашадаг байһан һаа, мүнөө булта табан үдэрэй туршада артистнар бэе бэетэеэ нягта холбоотойгоор хүдэлһэн байна. Тиихэдээ дүй дүршэлөөрөө хубаалдажа, айхабтар ехэ һургуули абаба гээшэбди. Ехэ һайнаар, дулаанаар эмхидхэгшэд бидэниие угтан абаһан байна. Тэрээндэнь сэдьхэлэй баярые хүргэнэб,– гээд, А.М. Топановай нэрэмжэтэ Хакасиин «Читиген» гэһэн үндэһэтэнэй драматическа театрай захирал Виталий Николаевич Канзычаков хубаалдаа.

- Фестиваль хоёр жэлэй нэгэ дахин болодог юм. Хитадай Ордоос хотоһоо ерэһэн зүжэгшэд ехэл оролдожо ерээбди гэжэ хэлэнэ. Тиихэдээ Ураалһаа нааша энэ фестиваль үндэһэ яһатанай гансахан лэ урилдаан болоно гээшэ. Айлшаднай булта «Бурятия» зочид буудалда тогтоһон байна. Монголһоо ехэ олон зон ерээ, аяар 46 хүн. «Гэгээн муза» гэһэн фестивальнай үндэһэ яһатанай бэшэ, юрын театральна фестиваль ха юм даа. Харагдаһан зүжэгүүд шэнжэлэлгэдэ ороно, лекцинүүдые шагнанабди, хөөрэлдөөнэй талмайнууд эмхидхэгдэһэн байна. Энэнь бидэндэ, зүжэгшэдтэ, ехэ туһатай үйлэ хэрэг болоно, – гэжэ Буряадай габьяата зүжэгшэн, уран һайханай хүтэлбэрилэгшын туһалагша Надежда Мунконова хөөрэжэ үгэбэ.

- Бүхы Росси соо үндэһэ яһатанай оройдоол гурбан иимэ фестиваль бии юм. Манай энэ «Алтан сэргэ» фестивалиин хажуугаар «Навруз» гэһэн Казань хотодо тюркэ хэлэтэй зоной фестиваль, тиихэдэ гурбадахинь финно-уйгар хэлэтэнэй Йошкар-Ола хотодо үнгэрдэг байна. Росси гүрэн соомнай мэдээжэ театрай критигүүд, «Алтан баг» мүрысөөнэй жюриин гэшүүд Татьяна Техновец, Нияз Игламов гэгшэд театрнуудыемнай хаража, үндэрөөр сэгнээ. Аяар Эстониһоо үндэһэтэнэй театр ерээд байна гээшэ. Юундэб даа тэдэнэр манай буряадуудта энэрхыгээр хандадаг зон юм. Бага яһатан болоходоо тиигэдэг гээшэ гү гэжэ һанагшаб. Энэ фестивальнай, минии һанахада, ехэ үрэ дүнтэйгөөр үнгэрөө. Хаража байхада, ерэһэн театрнууд булта өөрынгөө хэлэн дээрэ наадана. Аргагүй һонин үндэһэтэнэйнь хубсаһа, гоёолтонуудые хаража, ульгам хэлыень, дуунуудыень шагнажа, хужарлаһан байнабди. Ерэһэн айлшад булта сэдьхэлээ хананги бусахань гээшэ, – гэжэ тус фестиваль тухай өөрынгөө һанамжатай Буряадай театрай найруулагша Саян Цыдыпович Жамбалов хубаалдаа һэн.

Автор: Буряад драмын театрай сайтһаа абтаа