​Уран бэлигынь үндэрөөр сэгнэгдэбэ

Хонгоодор угай буряад бэлигтэй хүбүүн, уран зураашан, график, скульптор, профессор Чингис Бадмаевич Шонхоров эдэ үдэрнүүдтэ Москва хотодо ехэ нэрэ зэргэдэ хүртэжэ, нютагаа бусаба.

Уран зураашадай нэгэдэлэй гэшүүн, Буряадай арадай зураашан, Буряад Уласай ба Россиин габьяата зураашан, Буряад Уласай болон Россиин Гүрэнэй шангай лауреат гэһэн үндэр нэрэ зэргэнүүд дээрээ Оросой Холбооной уран зурагай академиин академик гэжэ үшөө нэгэ үндэр зиндаада хүртэбэ. Иимэ тогтоол сентябриин 9-дэ үнгэрһэн академиин ехэ суглаанда баталагдаһан байна. Буряад Уласта Чингис Шонхоров иимэ нэрэдэ хүртэһэн хоёрдохи хүн болоно гэжэ тэмдэглэе. Тэрэнэй урда мүн лэ бэлигтэй скульптор Александр Миронов болоо һэн.