​Гурбалжан бадагууд

Гушан зургаан үзэгүүд алфавидай гуримаар

Гурбалжан бадагууд боложо мүндэлөөд,

Гуурһан дороһоомни һубаряал даа.

Алтаргана наадан – Буряадайм шэмэг,

Арадайм найруулга – аялга шэмэг,

Аршаан булаг – нютагайм шэмэг.

Байгал далай – дэлхэйн омогорхол,

Байгаалиин баялиг – зоной омогорхол,

Бүхэ барилдаан – бүһэтэйшүүлэй омогорхол.

Валенка гутал үбэлдөө аятай,

Войлок юрта хүйтэндэ аятай,

Волейбол, футбол тамиршадта аятай.

Галзуу хүнэй сухал түргэн,

Ган гасуур хатаахаар түргэн,

Горхон эхиндээ урдахаар түргэн.

Далай ламын һургаал гүнзэгы,

Далайн уһанай оёор гүнзэгы,

Дууша хүнэй амин гүнзэгы.

Енгүүд-буряад Эрхүүдээ суутай,

Ерэн юһэн тэнгэри үльгэр соо суутай,

Ехэ эрдэмтэд дэлхэйдэ суутай.

Ёнгорбойн аршаанай шэди хүндэтэй,

Ёохор наадан Буряадтаа хүндэтэй,

Ёһотой хүлэг адуун соогоо хүндэтэй.

Жалгада хэбтэһэн үнэгэн улаан,

Жаргалтай һамганай хасар улаан,

Жэмэсүүд сооһоо зэдэгэнэ улаан.

Залуу бүлэнэр хүүгэдээр баян,

Захаамин хангай ой модоор баян,

Зунай саг ургамалаар баян.

Инагай яараһан гэшхэдэл хүнгэн,

Иишэг гутал ябадалда хүнгэн,

Ирагуу дуунай аялга хүнгэн.

Йога бэе махабадта туһатай,

Йогурт хоол хүүгэдтэ туһатай,

Йод эм яра шархада туһатай.

Коллектив эбтэй ажалаараа хурдан,

Коля хүбүүхэнэй коньки хурдан,

Космосто хүрэхэ ухаан хурдан.

Лама багшын уншалга солгёон,

Лимбын ирагуу абяан солгёон,

Луу жэлэй лужаганаан солгёон.

Майла хадын ургамал хүхэ,

Майхан тэнгэриин үнгэ хүхэ,

Малгайн шобхо оройнь хүхэ.

Номгон хүнэй абари зан аалин,

Нугаһан шубуунай ябадал аалин,

Нуурай уһанай урасхал аалин.

Орпооной буусын ургамал элбэг,

Олзотой хүнэй хармаан элбэг,

Орон дэлхэйн баялиг элбэг.

Өөдэнь хаяһан шулуун хүндэ,

Өөдэргэн хүнэй ябадал хүндэ,

Өөхэ мяхан халуунда хүндэ.

Поездын ябаха харгы зам холо,

Профессортэ хүрэхэ ухаан холо,

Пүрбэ үбгэжөөлэй галгихань холо.

Радио, телевидениин үүргэ ехэ,

Римбүүшэ багшын һургаал ехэ,

Росси гүрэнэй баялиг ехэ.

Сагаалган - Буряадаа бадаруулһан һайндэр,

Сасуутан нүхэдэй уулзалга – һайндэр,

Сурхарбаан – зунай мартагдашагүй һайндэр.

Тала газар захагүй уудам,

Тоомтой хүнэй досоо уудам,

Тэнгэриин орой оёоргүй уудам.

Һоригдоһон хүлэг – шодоогой шадабари,

Һур харбаан – мэргэшүүлэй шадабари,

Һэер шаалган – дүрэтэйшүүлэй шадабари.

Унаад ябахада үреэ дошхон,

Уһан далайн долгин дошхон,

Ууртай хүнэй абари зан дошхон.

Үбгэн хүнэй олбог зузаан,

Үбэлэй тэнгэй саһан зузаан.

Үнэр айлай байдал зузаан.

Фирменнэ хубсаһа үмдэхэдэ ялагар,

Фонариин гал гэрэлтээд ялагар,

Форточкоор шагааһан гэрэл ялагар.

Хамтаараа хэһэн ажал үндэр,

Хонгоодор зоной зорилго үндэр,

Хурмаста уулын толгой үндэр.

Циркуль хэрэгсэлэй голынь шобхо,

Циркын клоунай малгайнь шобхо,

Цэдэн хүбүүхэнэй хамарынь шобхо.

Часы импортнэ зүүхэдэ бүхэ,

Чечен арадай барилдаашад бүхэ,

Чингис хаанай нэрэ һүлдэ бүхэ.

Шагаажа гараһан наран шара,

Шаргал ута намар шара,

Шэрэнгеэр маряаһан үнэгэн шара.

Щетинкин, Щорс – партизан дарганар,

Щётко гээшэмнай шүдэнэй хэрэгсэл,

Щи гээшэмнай эдеэнэй шэмэг.

Съезд, разъезд, подъезд гэдэг,

Сэбэр буряад хэлэндэ үгы,

Сэхыень хэлэбэл, хатуу тэмдэг.

Харгы, ургы, харанхы гээд,

Хатуу “ы” – гээд хэлэебди,

Хэрэгтэйл юм даа, энэ үзэг.

Арьбан, альбан, хурьган гээшэ

Арбан, албан, хурган бэшэ.

Аялгань зөөлэн тэмдэг гээшэ.

Эбтэй арадта харилсаан үнэтэй,

Эжы, абын оролдолго үринэртэнь үнэтэй,

Этигэл хамбын һургаал үнэтэй.

Юрий Гагарин баатар түүхэдэ мүнхэ,

Юртэмсын байгаали хододоо мүнхэ,

Юһэн туг – Ессентуки хото мүнхэ.

Янжима бурханай үршөөл дүүрэн,

Яаралгүй хүдэлбэл һанаан дүүрэн,

Ямбатай хүн этигэл дүүрэн.