​Ниислэл хотодоо зохёолшоднай хэрэгтэйл

Сентябриин 21-дэ «Буряад үнэн»Хэблэлэй байшанда Улаан-Үдын мэр Александр Голков зорюута ерэжэ, захирал Баяр Балдановтай, «Байгал», «Байкал» сэтгүүлнүүдэй редакторнуудтай, сэтгүүлдэ саг үргэлжэ бэшэжэ байдаг уран зохёолшодтой улаан нюураараа уулзажа хөөрэлдэбэ. Ород хэлэн дээрэ гарадаг уран зохёолой «Байкал» сэтгүүл (журнал), мүн баһа хэблэлэй байшангай нүхэд ёһоной харилсаа тогтоохо хэрэг хөөрэлдөөнэй гол сэдэб боложо үгөө.

Автор: Зорикто Дагбаев
Описание: Александр Голков, Баяр Балданов, Татьяна Баженова, Галина Дашеева-Базаржапова, Баяр Жигмитов

«Буряад үнэн» Хэблэлэй байшангай захирал Баяр Балданов сэтгүүлшэдэй хэжэ байдаг ажал хэрэгүүд тухайнь тодорхойгоор хөөрэжэ үгэбэ:

- Бидэ мүнөө «Буряад үнэн», «Бурятия» гэжэ сонинуудые гарганабди. Уран зохёолой «Байгал» сэтгүүл буряад хэлэн дээрэ гаража байдаг. «Байкал» сэтгүүл ород хэлэн дээрэ бэшэдэг уран зохёолшодой урманда гарана. Үшөө тиихэдэ байгша ондо burunen.ru гэжэ сайттай болообди. Үнгэрэгшэ гарагай нэгэндэ, Гүрэнэй Дүүмын һунгамалнуудай һунгагдаха үдэртэ, сентябриин 18-да, гүрэнэй хоёр хэлэн дээрэ Буряадайнгаа арад зондо мэдээсэжэ байгаа. Тэрэ үдэр манай мэдээсэлэй албан гүрэнэй хоёр хэлэн дээрэ гансаараа хүдэлжэ гараа. Уншагшадайнгаа һонорто гаража байдаг хэблэлнүүднай өөр өөрын амжалтануудтай, өөрын бэрхэшээлтэй. Гарзануудые бага болгохо талаар абтаһан хэмжээнүүдһээ уламжалан, 15 жэлэй саана «Буряад үнэн» гэһэн Хэблэлэй байшан мүндэлөө. Уран зохёолшоднай олон бэрхэшээлнүүдтэй юм аабза. Тиимэһээ Улаан-Үдэ хотын захиргаантай нүхэд ёһоной холбоо тогтоожо, урданайнгаа һайхан заншал һэргээжэ байһандаа баясанаб.

Улаан-Үдэ хотын дарга Александр Голков ехэ анхаралтайгаар, сэдьхэлдээ һонирхол түрүүлжэ шагнаба. Удаань үгэ хэлэхэ ээлжээниинь ерэбэ.

- Хөөрэлдөөгөө эхилхэһээнь урид, Баяр Дашеевич, би танаа «Буряад үнэн» Хэблэлэй байшангай захиралаар томилогдоһоноортнай хани халуунаар амаршалнаб! «Буряад үнэн» Хэблэлэй байшангые эмхидхэн байгуулагшад иимэ шиидхэбэри дэмы абаагүй ёһотой. Хэблэлэй байшангайажал хэрэгүүд урагшатай байхань дамжаггүй. Улаан-Үдэ хотые Буряад Уласһаа илгажа болохогүй гэжэ би бододогби. Улаан-Үдэмнай Буряад Уласаймнайшье, буряад нютагта ажаһуудаг олон арадуудай ниислэл ха юм даа.

«Байкал» сэтгүүл бага ябахадаа нилээдгүй уншадаг һэмби. Минии хүршэ Сергей Сультимович Цырендоржиев «Байгал» сэтгүүлэй редактораар хүдэлдэг байгаа. Мүнөө болоходо, сүлөө сагни арайл бага болошоо гээшэ гү, сэтгүүлээ уншажа амжанагүйб. Иимэ ном һудар уншадаг зон мүнөөнэй сагта үсөөн болошоо. Бултадаа интернет лэ шагаанабди. Арад зонойнгоо оролдохо, һанаагаа зобохо уялга маанад дээрэ буугаад байна ха юм. Хэнэйшьеб сэдьхэлээ хүдэлгэжэ байжа уншаха, уншахада һонин зохёолнууд эгээл мүнөө сагта тон шухала болоо, - гэжэ Александр Голков хөөрэбэ.

Улаан-Үдэ хото жэлэй туршада элдэб янзын 50 грант жэл бүхэндэ тараадаг байна. Тэрэ тоодо һая эхилжэ байһан бэшээшэдые дэмжэхэ талаар һонин һонин дурадхалнууд хотын захиргаанда бии. Уран зохёолшо Исай Калистратович Калашниковай шагнал Буряад орондомнай ажаһууһан бүхы уран зохёолшодто зорюулагдана.

«Байкал» сэтгүүлэй редактор Булат Аюшеев үгэ хэлэхэдээ, иимэ эрилтэнүүдые мэрэй урда табиба:

- Уран зохёол бэшэдэг 35 хүрэтэр наһатай залуушуулда Улаан-Үдын мэрэй шагнал хэрэгтэй. Хоёр жэлдээ нэгэ дахин 50 мянган түхэригэй иимэ шагнал барюулдаг болоболтнай, ехэ һайн байгаа. Ерэхэ жэлдэ сэтгүүлэй байгуулагдаһаар 70 жэлэй ой тэмдэглэгдэхэ. Уран зохёолой захил дэмжээ һаатнай, ехэ һайн байгаа. Мүнөө дээрээ «Байкал» сэтгүүлнай хоёр һарын нэгэ дахин гарана.

«Байкал» сэтгүүлэй авторнуудай нэгэн эрдэмтэн, багша, уран зохёолшо Андрей Игумнов хотын засаг даргатай уулзаһанаа һамбаашалан, иигэжэ дуулгаба:

- Би хоёр лэ зүйл дурадхаха байнаб. Уран зохёол бэшээд, Нобелиин шанда хүртэхэ арга боломжо олгохо шухала. Хоёрдохёор, манай бэшэһэн юумыемнай уншаха зоноо олон болгохо хэрэгтэй. Бэшэ бэрхэшээлнүүдээ өөһэдөө шиидхэнэ аабзабди.

Олон зоной хабаадалгатай хэмжээ ябуулгануудта Улаан-Үдын захиргаан, «Буряад үнэн» Хэблэлэй байшан суг хамта хабаададаг болохо тухай хэлсэгдэбэ. Уран зохёолшодой олонхинь Улаан-Үдэ хотодо ажаһуудаг тула Улаан-Үдэ хотодоо зорюулһан янза бүриин зохёолнуудые «Байкал» сэтгүүлэй табадахи дугаарта хэблэебди гэжэ баталагдаа.

Уулзалгын түгэсхэлдэ заншалта ёһоор дурасхаалта бэлэгүүдээр андалдаан болоо.