​Хани нүхэсэлэй дүхэриг соо

Энхэрэл тээшэ

Уран үгэ үлхөө боложо,

Улаан нараяа угтабаб,

Дурдам ехэ дайда хээлэжэ,

Дүхэриг тээшээ яаранаб.

Дулаахан ошониинь бадаржа,

Даараһан сэдьхэлым эльбэхэ,

Дундаал намайе һуулгажа,

Дууһан гунигым тарааха.

Саагуур наагуур тойронгүй,

Сэхынь намда хөөрэхэ,

Хооһон абяа холбонгүй,

Хошон үгөөр найруулха.

Хойнотоош гэжэ гэмэрэнгүй,

Ходол угтан тэбэрихэ,

Удаарааш гэжэ зэмэлэнгүй,

Угтан, хүлеэн энхэрхэ.

Найзын нютаг

Үбэр-Байгалай хизаарай

Үргэн дайдын гоё гээшэнь,

Үнгын олон сэсэгүүдэйнь

Үнэр хангалай гоё гээшэнь.

Хуһа нарһаар хушагдаһан

Хонгор тайгынь гоё гээшэнь,

Халин, дээрэһээ дэбэрһэн

Хадын горхоной гоё гээшэнь.

Ногоон торгоёо хэдэрһэн

Номгохон талын гоё гээшэнь,

Наранай элшээр туяарһан

Найзын нютагай гоё гээшэнь.

Алим жэмэсэй жэгдэрһэн

Арюун дайдын гоё гээшэнь,

Аршаан булагай дэлбэрһэн

Алхана нютагай гоё гээшэнь.

Абьяастай

Булган талата Буряадайм

Булан бүхэниинь илгаатай,

Буужа ерэһэн нүхэдүүдэйм

Бүтээдэг хэрэгынь абьяастай.

Булта зоной байрлаһан

Буряад дайдам буянтай,

Баабай, эжын тэнжээһэн

Баатар хүбүүд зоригтой.

Хадын түргэн горхоной

Харьяа урасхал шадалтай,

Халюун талын ногооной

Хоншуу үнэрынь хангалтай.

Адуу малай бэлшэһэн

Аглаг талам хэшэгтэй,

Аба, эжын энхэрһэн

Арюун басагад бэлигтэй.

Баяр нүхэртөө

Түрэһэн шинии үдэршни

Түүхэтэ ёһоороо ерэбэл даа,

Түрэлхид, нүхэдыш –

бултымнай

Тэмдэглэхые уряалбал даа!

Наһанайш намтар һананабди –

Нэгэш толбо олдохогүй,

Наартай зангыш мэдэнэбди –

Нюуса һанал байхагүй.

Баатар эсэгынгээ нэрые

Баяр хүбүүниинь нэрлүүлнэш,

Байдалай далайн дошхые

Баяр нүхэрнай, мэдэрнэш.

Орьёл эгсэ дабаанууд

Олдоод лэ байха урдашни,

Орёол хэсүү бодолнууд

Ороод лэ байха ойндошни.

Һаншаг сагаан эжышни

Һаруул сэдьхэлээ дэлгээхэ,

Хатуу зоригтой абашни

Харалсан шамай дэмжэхэ.

Һайхан зантай инагшни,

Һанаха байха хүүгэдшни,

Хамта ябаһан нүхэдшни

Хажуудаш ходо байхабди.

Дабажа гарахаш бултыень,

Даажа шадахаш хамагыень,

Амжалта түгэс ажалаараа

Арадтаа хэрэгтэй ябахалши!

Баярыем тогтоогыт

Дээдын зэргэдэ намайгаа

тогтоожо,

Дэмбэрэлтэ үдэрөөрни амаршалбат,

Дэлхэйн олониие тоолон үреэжэ,

Дэлбэртэр зүрхым баясуулбат.

Долоо дортожо, найма гэнтэ

нартажа,

Дохолоодш хаа-яа ябахадам

орхёогүйт,

Дорюун hайхан нүхэдни

газартажа,

Доогуур хүнhөө хэзээдэш ябаагүйт.

Доhолхо шадалтай зүрхөө

бөөмэйлжэ,

Дорюун зандаа урагшаа

дабшагты,

Дабаануудай олые шармайн

дабажа,

Дайдын холоhоо нютагаа

бусагты.

Дардам байг лэ зориhон харгытнай,

Дуулим байг лэ түбхинэhэн

газартнай,

Дүүтэй байг лэ үргэһэн

үринэртнай,

Дуутай байг лэ ханилhан

нүхэдтнай!

Дууһашагүй байг лэ инаг ехэ

дурантнай,

Дэлисэтэй байг лэ бүтээһэн

хэрэгтнай,

Дүүрэн байг лэ эдлэhэн

жаргалтнай,

Дээгүүр хиидэг лэ нангин хии

моридтнай!