1207
Цыренжап Сампиловай нэрэмжэтэ Уран һайханай музей соо Наһажаал зоной үдэртэ зорюулагдажа, “Намарай үнгэ будагууд” гэһэн үзэсхэлэн нээгдэбэ.
Энэ хэмжээ ябуулга Буряад Уласай Соёлой яаман, Ородой Холбоото Уласай Буряадай таһагай Пенсионно жасын болон Буряад Уласай Пенсионернүүдэй холбооной үүсхэлээр эмхидхэгдэбэ.
Үзэсхэлэндэ наһанайнгаа амаралтада гараад, уран зураг болон уран урлал эрхилжэ, амжалта туйлажа эхилһэн зоной хамта дээрээ зуугаад бүтээлнүүд дэлгэгдэбэ. Эндэ ганса Улаан-Үдэ хотын бэшэ, мүн Хойто-Байгалай болон Зэдын аймагуудай уран гартан хабаадаа.
Буряадай Пенсионно жасын хүтэлбэрилэгшын орлогшо Вячеслав Барнадаевай тэмдэглэһээр, наһатайшуулай ажалнууд мэргэжэлтэ уран зураашадай, уран дархашуулай бүтээлнүүдһээ дутуу бэшэ, уран шанараараа үндэр хэмжээнэй.
Автор: Цырегма Сампилова
Описание: Гайхамшаг бүтээлнүүд
Автор: Цырегма Сампилова
Описание:Үнэхөөрөөшье, наһатайшуулай ажалнууд мэргэжэлтэ уран зураашадай, уран дархашуулай бүтээлнүүдһээ дутуу бэшэл
- Сүлөө сагтаа элдэб бүтээлнүүдые урлажа, амжалта туйлажа байһандатнай бидэ ехэ баяртайбди. Эдэ ажалнуудаараа мүнөө үеын залуушуулда өөрынгөө һанал, һайхан бодол дамжуулжа байнат. Эндэ үнгэргэгдэжэ байһан үзэсхэлэниие үшөө олон залуушуул хараха ёһотой, - гэжэ Вячеслав Барнадаев онсолбо.
Ородой Холбоото Уласай Пенсионернүүдэй холбооной Буряад Уласай таһагые даагша Майя Мадасон энэ хэмжээ ябуулга үнихэнэй бэлдэгдэжэ эхилһэн гээд мэдүүлбэ.
- Энэ үзэсхэлэн тон түрүүшынхиеэ эмхидхэгдэжэ байгаашье һаа, олон шэглэлнүүдтэй. Харин удаадахи үзэсхэлэнгүүдтэ үшөө олон янзын - шабараар, түмэрөөр, элһээр бүтээгдэһэн - ажалнууд харуулагдаха. Сэдьхэлэй “тэжээлтэй” хүн бата бэхи, ута наһатай байдаг. Тиимэһээ бидэ наһаяа утадхана гээшэбди, - гэжэ Майя Ильинична хэлэнэ.
Пенсионернүүдэй холбоон найман жэлэй туршада Буряад Уласай Үндэһэтэнэй музейтэй нягта холбоотойгоор ажалаа ябуулдаг юм. Ниитын эрдэмүүдэй университет байгуулагданхай, тэрэнэй ректорээр тус музейн захирал Татьяна Анатольевна Бороноева эдэбхитэй ажаллана. Тэрэ һургуулиин соёлой шэглэлэй таһагта наһатайшуул ябадаг. Тэдэнэр музейн уран һайханай бүхы үзэсхэлэнгүүдые ямаршье түлбэригүйгөөр хараха аргатай.
Буряадай Арадай уран урлалай түбэй таһагые даагша Альбина Гомбоева үзэсхэлэндэ хабаадагшадые һайндэрөөр амаршалаад, саашанхи зохёохы ажал ябуулгадань амжалта хүсэбэ.
- Таанад иимэ һайхан бүтээлнүүдээрээ эдиршүүлые хүмүүжүүлгын талаар ехэ туһа хүргэжэ байнат. Юуб гэхэдэ, танай ажалнуудые хаража, үхибүүд уран һайханай талаар хүгжэнэ, өөһэдынгөө гараар уран урлал бүтээжэ һурана бшуу, - гэжэ Альбина Николаевна тэмдэглээ.
Автор: Цырегма Сампилова
Описание: Ц.Дугарова бүтээлнүүдэйнгээ дэргэдэ
Шэрэ будаг, батик, бисер, нооһо, торго гэхэ мэтые хэрэглэн бүтээһэн зүйлнүүд, бүдүүн утаһаар гүрэмэл бүтээлнүүд-макраме һонирхолтой. Людмила Даниловна Танхаева бүхы наһаараа Буряадай гүрэнэй университедтэ немец хэлэ зааһан юм. Уран зураг гээшые энээнһээ урда тээ нэгэшье туршажа үзөөгүй байгаа.
- Наһанайнгаа амаралтада гараад, гансаардажа, уйдажа байха ушар эли ха юм даа. Харин иигэжэ үшөө ондоо шудалаагүй юумэ туршажа байха гээшэ гоё бшуу. Би Антон Поляковай уран зурагай кружогто 2013 онһоо ябажа эхилээб. Тиигэһээр зурагуудые зурадаг болошооб. Мүнөө би 40-өөд зурагуудые бүтээнхэйб, заримыень бэлэглээб, худалдаадшье үзөөб. Намайе дахаад, наһатайшуул уран зурагта һуража эхилээ. Бидэ ходол харилсажа байдагбди. Наһатайшуулда харилсаха гээшэ тон шухала бшуу, - гэжэ Людмила Даниловна хөөрэнэ.
- Зураг зуража эхилхэдээ,тад ондоогоор юртэмсэ дэлхэйе харадаг, ойлгодог болохоор байна. Намарай хаһада мүн лэ өөрсэ бүтээлнүүд мүндэлхэ юм, - гэжэ уран зурааша һанамжална.
Автор: Цырегма Сампилова
Описание: Л.Санжиева, М.Мадасон, Л.Танхаева
Роза Хохлова хониной нооһоор бүтээһэн зүйлнүүдээрээ холо ойро мэдээжэ болонхой. Сүлөө сагтаа бэеэ һамааруулжа хэжэ эхилһэн ажалынь мүнөө өөртэнь олзо асаржа байдаг. Тэрэнэй нэхэһэн хубсаһан, зүүдхэлнүүд тус үзэсхэлэнэй горитойхон һуури эзэлнэ.
Харин Цыбжид Дугарова һаяшаг наһанайнгаа амаралтада гарабашье, уйдажа гажаржа, нэгэшье үдэр байгаагүй. Буряадай арадай артист Ешин-Хорло Гомбоинай байгуулһан “Буряад арадай дуунай һургуулида” һураад, мүнөө ансамбльда дууладаг болонхой. Энэ жэлдэ үнгэрһэн “Алтаргана” нааданай “Буряад арадай дуунуудай” харалганда Улаан-Үдэ хотые түлөөлжэ, дуулаа бэлэй. Ганса дуу дуулаха бэшэ, мүн уран урлал – макраме бүтээдэг болонхой. Цыбжид Сампиловнагай табан ажалынь энэ үзэсхэлэндэ табигдажа, өөрын онсо маягтай түхэлөөрөө илгарна гэжэ харагшад тэмдэглээ.
Үзэсхэлэниие хаража, нюдэеэ хужарлуулһан зоной дунда Буряад Уласай Хүгжэмшэдэй холбооной түрүүлэгшэ, композитор Лариса Санжиева өөрынгөө һанамжаар хубаалдаба:
- Энэ мүнөөдэрэй үзэсхэлэн юугээрээ гайхамшаг бэ гэхэдэ, эдэ ажалнууд булта мэргэжэлтэ бэшэ уран зураашад, уран дархашуул болон оёдолшодой гараар бүтээгдэһэн. Наһаараа зураагүй, юумэ бүтээгээгүй зон уран һайханай шэдитэ мэдэрэлдэ абтан, гоё һайхан үзэмжэеэ, бүтээлнүүдээ дэлгэжэ байхадань, ямар гоё гээшэб! Наһатайшуулһаа бусад зон жэшээ абаха ёһотой. Наһанайнгаа амаралтада гараад, ажабайдалаа уран һайханай, зохёохы ажалаар шэмэглэхээр байна ха юм, - гэжэ Лариса Николаевна тэмдэглэбэ.
Үнэхөөрөөшье, наһанай амаралтада гарахада, наһан дүүрэшэнэ бэшэ, харин эдэбхи үүсхэлтэй байбал, ажаһуудал улам һонирхолтой болоно гэжэ мүнөөдэрэй хэмжээ ябуулга гэршэлнэ.
Автор: Цырегма САМПИЛОВА
