​Соёлой үдэрнүүд- ниислэл хотонуудта

Манай ниислэл хото Улаан-Үдымнай 350 жэлэй ойдо зорюулагдаһан Соёлой үдэрнүүд ноябриин 1-һээ 15 болотор Москва, Санкт-Петербург хотонуудта үнгэргэгдэхэнь.

Буряад Уласай соёлой сайд Тимур Цыбиковэй хэлэһээр, Буряадаймнай ниислэл хотын ойн баярта зорюулагдаһан концерт-нааданууд, үзэсхэлэнгүүд, харалганууд үргэлжэлһөөр. Энэ хэрэгтэ гүрэнэй һан жасаһаа 70 сая түхэриг һомологдоһон байна. Тиигэжэ Москвагай, Санкт-Петербургын хүн зон, айлшад, тэндэ ажаһуудаг нютагаархиднай Буряадай табан зуугаад бэлигтэйшүүлэй зүжэг наада хужарлан хараха, уран гартанай бүтээлнүүдтэй танилсаха аргатай болобо.

Буряадай гүрэнэй цирк ноябриин 1-дэ Москвагай ехэ циркын байшан соо наадаяа харуулха. Эндэхи захирал Эдгар Запашный өөрөө хүндэтэ айлшадаа угтахаар найдууланхай. Оперо, баледэй театрайхид ноябриин 3-да Ехэ театрай шэнэлэгдэһэн тайзан дээрэ Дж.Пуччиниин “Тоска”оперо табиха. Хоца Намсараевай нэрэмжэтэ Буряад драмын театр Евгений Вахтанговай нэрэмжэтэ театр соо хоёр зүжэгөө түб хотынхидта дурадхаха байна. “Байгал” театрайхид Надежда Бабкинагай хүтэлбэрилдэг Москвагай гүрэнэй “Русская песня” театрай тайзан дээрэ бэлиг талаангаа харуулха. Эдэ хоёр театрнууд үнинэй хани барисаатай юм гэжэ тэмдэглэе.

Буряад Уласай Үндэһэтэнэй музей уран бүтээлнүүдэй үзэсхэлэн харуулха. Тус хэмжээ ябуулга нээлгын баяр ёһололдо буряад уран зураашадһаа гадна Ородой Уран зураашадай холбооной түрүүлэгшэ Андрей Ковальчук байлсахаар хүлеэгдэнэ. Буряадай хүүхэлдэйн “Үльгэр” театр иимэ ехэ хэмжээ ябуулгануудта түрүүшынхиеэ хабаадаха гэжэ тэмдэглэлтэй. Арадай хүгжэмэй болон хатарай “Забава” ансамбль, мүнөөнэй хатарай “Угол зрения” театр мүн лэ концерт - наадануудаа олоной һонорто дурадхаха юм . 

Санкт-Петербургда Николай Бестужевай нэрэмжэтэ Ород драмын театр “Фронтовичка” зүжэгөө табиха. Борис Ельцинэй нэрэмжэтэ президентскэ номой сан соо Буряадай мүнөө үеын уран зохёолой үзэсхэлэн дэлгээгдэхэ. Мүн баһа “Улан-Удэ – яркая столица Байкала” гэжэ үзэсхэлэн олоной анхарал татаха байха. Элүүрые хамгаалгын албанай эмхинүүд элүүржүүлгын аяншалга дурадхаха, харин Москвагай, Петербургын эдир ажаһуугшад “Байкальские каникулы” болон “Легенды Бурятии” гэһэн аяншалгын замуудтай танилсаха.

-Соёлой үдэрнүүдтэ ганса манай нютагаархин, айлшад бэшэ, харин мэргэжэлтэд, харюусалгата түшэмэлнүүд, ноёд хабаадалсахаар хүлеэгдэнэ, - гэжэ Тимур Цыбиков мэдүүлбэ.